متّی 1 - متّی دی راہِیں اِنجِیل سرائیکی بولی اِچ

یِسُوع مسِیح دا شجرہ

¹ یِسُوع مسِیح جیرھا داؤد اَتے ابرہام دی لَڑی اِچوں ہا اُوندا شجرہ اِیویں ہے۔

² ابرہام، اِضحاق دا پیِوُ ہا اَتے اِضحاق، یعقُوب دا پیِوُ ہا اَتے یعقُوب، یہُوداہ اَتے اُوندے بِھراویں دا پیِوُ ہا۔

³ اَتے یہُوداہ، فارص اَتے زارح دا پیِوُ ہا جیرھے تمر کنُوں ڄائے، اَتے فارص، حصرون دا پیِوُ ہا اَتے حصرون، رام دا پیِوُ ہا۔

⁴ اَتے رام، عمّینداب دا پیِوُ ہا اَتے عمّینداب، نحسون دا پیِوُ ہا اَتے نحسون، سلمون دا پیِوُ ہا۔

⁵ اَتے سلمون، بوعز دا پیِوُ ہا جیرھا راحب کنُوں ڄایا اَتے بوعز، عوبید دا پیِوُ ہا جیرھا رُوت کنُوں ڄایا اَتے عوبید، یَسی دا پیِوُ ہا۔

⁶ اَتے یَسی، داؤد بادشاہ دا پیِوُ ہا۔ اَتے داؤد، سُلیمان دا پیِوُ ہا جَیندی ماء پہلے اُورِیاہ دی ذال ہَئی۔

⁷ اَتے سُلیمان، رحُبعام دا پیِوُ ہا اَتے رحُبعام، اَبِیّاہ دا پیِوُ ہا اَتے اَبِیّاہ، آسا دا پیِوُ ہا۔

⁸ اَتے آسا، یہوسفط دا پیِوُ ہا اَتے یہوسفط، یُورام دا پیِوُ ہا اَتے یُورام، عُزِّیاہ دا پیِوُ ہا۔

⁹ اَتے عُزِّیاہ، یُوتام دا پیِوُ ہا اَتے یُوتام، آخز دا پیِوُ ہا اَتے آخز، حِزقیاہ دا پیِوُ ہا۔

¹⁰ اَتے حِزقیاہ، مُنسّی دا پیِوُ ہا اَتے مُنسّی، امُوس دا پیِوُ اَتے امُوس، یُوسیاہ دا پیِوُ ہا۔

¹¹ اَتے یُوسیاہ، یکونیاہ اَتے اُوندے بِھراویں دا پیِوُ ہا جیرھے اُوں ویلے ڄائے جݙّاں بابلی قوم اِسرائیلی لوکیں کُوں قیدی بݨا کرائیں اپݨے مُلک اِچ گھِن ڳئی۔

¹² اَتے یکونیاہ، سیالتی‌ایل دا پیِوُ ہا اَتے سیالتی‌ایل، زرُب‌بابل دا پیِوُ ہا جیرھے بابلی قوم دی اِیں قید دے دوران ڄائے۔

¹³ اَتے زرُب‌بابل، اَبِیہُود دا پیِوُ ہا اَتے اَبِیہُود، اِلیاقِیم دا پیِوُ ہا اَتے اِلیاقِیم، عازور دا پیِوُ ہا۔

¹⁴ اَتے عازور، صدوق دا پیِوُ ہا اَتے صدوق، اخیم دا پیِوُ ہا اَتے اخیم، الِیہُود دا پیِوُ ہا۔

¹⁵ اَتے الِیہُود، الیعزر دا پیِوُ ہا اَتے الیعزر، متّان دا پیِوُ ہا اَتے متّان، یعقُوب دا پیِوُ ہا۔

¹⁶ اَتے یعقُوب، یُوسف دا پیِوُ ہا اَتے یُوسف اُوں مریم دا پَے ہا جَیندے اِچوں یِسُوع ڄایا جَینکُوں مسِیح اَہدِن۔

¹⁷ اِیویں ابرہام کنُوں داؤد تَئیِں چَوݙَاں پِیڑھیاں ہَن اَتے داؤد کنُوں بابلی قوم دی قید اِچ وَنڄن تَئیِں چَوݙَاں پِیڑھیاں ہَن اَتے اُوں قید کنُوں مسِیح تَئیِں چَوݙَاں پِیڑھیاں ہَن۔

یِسُوع مسِیح دا ڄاوَݨ

¹⁸ ہُݨ یِسُوع مسِیح دا ڄاوَݨ اِیں تھِیا جَیں ویلے اُوندی ماء مریم دی منگݨی یُوسف نال تھئی پئی ہَئی تاں اُنہیں دے پرنیڄݨ کنُوں پہلے او خُدا دے پاک‌رُوح دی قُدرت کنُوں پیٹ نال تھی ڳئی۔

¹⁹ اِیں کیتے اُوندے منگیندے یُوسف جیرھا نیک ہا اَتے اُونکُوں بَدنام کرَݨ نہ چاہندا ہا، اپݨے دِل اِچ منگݨی تَروڑ ݙیوَݨ دا فیصلہ کیتا۔

²⁰ او اِیں بارے سوچیندا پِیا ہا جو خُداوند دا فرِشتہ اُوندے خاب اِچ آیا اَتے آکھیا، ”اَے یُوسف! تُوں جیرھا داؤد دی نسل اِچوں ہَئیِں مریم نال پرنیڄݨ کنُوں نہ ݙَر کیوں جو اُوندا حمل خُدا دے پاک‌رُوح کنُوں ہے۔

²¹ اُونکُوں پُتر ڄَؤسی اَتے تُوں اُوندا ناں یِسُوع رکھیں کیوں جو او اپݨے لوکیں کُوں اُنہیں دے گُناہیں کنُوں چھُٹکارا ݙیسی۔“

²² ایہ سب کُجھ اِیں کیتے تھئے جو خُداوند دی او ڳالھ پوری تِھیوے جیرھی اُوں اپݨے نبی دی راہِیں آکھی ہَئی،

²³ ”ݙیکھو ہِک کُواری پیٹ نال تھیسی اَتے اُونکُوں پُتر ڄَؤسی اَتے اُوندا ناں عِمانُوایل رکھیسِن“ جَیندا مطلب ہے،خُدا ساݙے نال۔

²⁴ وَل یُوسف نیندر کنُوں اُٹھی پِیا اَتے اُونویں کیتا جیویں خُداوند دے فرِشتے حُکم ݙِتا ہا اَتے مریم کُوں پَرنیڄ کرائیں گھِن آیا۔

²⁵ پَر جے تَئیِں اُونکُوں پُتر نہ ڄایا اُوندے نال نہ سُتا۔ اَتے جݙّاں او ڄایا تاں یُوسف اُوندا ناں یِسُوع رکھیا۔