तीतस 3 - घले नयाँ करारच ज्य ख्यङ् हम्बने ची 1 सरकार मेस्ये सरकारजे मीयूजे हक नङ्ने टुङ पर्दीय यदेबे विश्वासीयूने लोम्मी। भलो चेब कर कामनेयली फरने तयार क्यूरो यदेबे थमयूने ह्वेरला चीम्मी। 2 थमयूदे सूजेये विरोध अन्चीस्स्य, होर्दे च्य-फाये अन्चीस्स्य तर मीयू क्वाप्रेने चीद क्यूत्देबे मील्ले ख्वब क्यूस्स्य। 3 चेनेयलो त्याफे ङीनये मुर्ख, यब अन्-ङ्यीन्, सीत्तीने ट्वाब, थर्-थर्जे अन्ज्य वेश्य काम मेस्ये मोज-मजाने फस्तीकब ख्य। नमयू दुष्ट मेस्ये ठेनब कामने दिन चब, मीदे घिन चीक्कब मेस्ये त्यादे त्याने घिन चेबयू ख्य। 4 तर कन्छ्वाब ङीनने मुक्ति पीनब परमेश्वरजे दया मेस्ये मीयूने चेब प्रेम तङ्दे, 5 हन्छ्वाब ङी रङ्सेदेने ज्य काम चीत्देबे दी, तर ङूजे दयाजे कारणदे ङूदे ङीनने बच्दीमीदे। ङूदे ङीनजे पापयू ठूमीदेबे ङीनने पवित्र आत्माने क्यूत्देबे सर् जन्म मेस्ये सर् जीया पीन्दे। 6 मुक्ति पीनब प्रभु येशू ख्रीष्टदे चीत्देबे परमेश्वरदे हम्ब पवित्र आत्मा ङीन फ्याने बेस्से कूम-क्यूल्लाबे फम्मीदे 7 ङूजे अनुग्रहदे धर्मी ठर्तीदेबे ङीनदे आशा चेब कलङ्बेये अन्सीबब जीयाजे हक प्रेब मी क्यूर खूस्य। 8 अम्ब तम्दम् पो ख्यङ्। नदे अम्ब पोयूने बोङ् ची, थमयू सुदे परमेश्वरने विश्वास चे ख्यङ्, रङ्सेदे ज्य काम चेने येतार्ने चङ्ख क्यून्नू, चेनेयलो अम्ब पो मीयूजे लागि सोरो ज्य मेस्ये फाइदाजे ख्यङ्। 9 तर मुर्ख स्वाल्-जवाफ, रेङ रेङ मेमेजे कथा, फुट् मेस्ये मोशाजे नियमजे बारेने च्य फाप्रे आलाक्के क्यूर्, चेनेयलो अम्ब क्वाने फाइदा त्वो, काम अन्लादेब पो क्यूक्क्य। 10 फूट् रेब मीने त्याफे-ङ्हीफे सम्झीदीमी, मेस्ये अन्क्यूत्देयलो कलङ्बेये नता अन्-येल्लाची, 11 नमयूदे स्ये ख्यङ्, येर मीयूदे तम्दम्ने क्यापीक ख्यङ्, मेस्ये थमयूजे पापयूदे थमयू रङ्सेने दोष ख्यबयू ठर्दीक ख्यङ्। आखिरीजे मोतो 12 कन्छ्वाब अर्तिमास या तुखिकसने नैट्याने कूल्बीय, हन्छ्वाब न निकोपोलिसने कादेने यली ङैने त्वने ख। चेनेयलो ङ हैयाने सर्कतूम् टुङस्ये मन ख्यङ्। 13 वकिल जेनास मेस्ये अपोल्लोस लम् लादीदे प्रब खूदा सेमे थमयूने तोङ्मी मेस्ये थमयूने चेपोजेये हर्जो अम्पर्तीस्य। 14 ङीनजे मीयू ज्य काम चेब लोम्स्य, येर्बे सोरो हर्जो पर्तेब बीलने थमयूदे सूजोयूने तोङ्मे खूस्य। थमयू चेकम्तेब जीया च अम्पर्तीस्य। 15 ङैप्रे ख्यब क्वादेने नने नमस्कार येबे ख्यङ्। विश्वासने ङीनने प्रेम चेबयूने नमस्कार येमी। नमयू क्वाप्रेने परमेश्वरजे अनुग्रह क्यूस्स्य। |
Ghale New Testament © Nepal Bible Society, 2011.
Nepal Bible Society