तीतस 2 - घले नयाँ करारकूम थर्जे मी हुलने लोम्मेब शिक्षा 1 तर नदेब तम्दम् शिक्षाने ख्यब पो लोम्मी। 2 कम्बयू रङ्सेने काबूने येनब, गेसेन् प्रेब लायकजे, पो क्व, विश्वास ज्य चेब, प्रेम चेब मेस्ये मीसा ठ्वा क्यूत्देबे सैदे ख्व क्यूरब शिक्षा लोम्मी। 3 येर्बेने यूमयूजे बनी व्यवहार ज्य क्यूर पर्दीय, सूजोजे न अम्प्वेब, कूम ची-नादू अन्थूङब क्यूर पर्दीय यदेबे आज्ञा पीन्। कम्ब ज्य ख्यङ्, ङूने हम्बने लोम्मीस्य। 4 थमयूदे चम्चयूने रङ्से-रङ्से पती मेस्ये च-चीमीयूने माया चेने, 5 मेस्ये थमयू पो क्वब, कीम्-नम् चील्ले ख्वब, गेसेन् ख्यब, रङ्से-रङ्सेजे प्ल्यङ्जे हक नङ्ने टूङब क्यूरने तालिम पीन्, होरेक्यूत्देयलो परमेश्वरजे वचनने न प्वे अम्प्रेस्य। 6 होरप्रने चम्च स्योर्बयूनेये रङ्सेजे सेम्-कबूने येन् यदेबे अर्ती पीन्। 7 नदेने साप्ता पोने ज्य कामजे नमूना पीन्देबे थमयूने तन्, नैजे शिक्षाने इमान्-जेमेन् क्यूरब, मेस्ये होस्स्यार क्यूर्। 8 शिक्षा पीन्ब तम्दम् मेस्ये ज्य बोली ची, सूदेये पो च अन्ख्वब पक्क शिक्षायू पीन्। होरेक्यूल्लो शत्रुयूये चैये य अन्खूदेबे रङ्सेने त्वा पर्दीस्य। 9 त्वो-त्वोमयू रङ्से मालिकयूजे हक नङ्ने टूङ्देबे रङ्से मालिकने साप्ता पोनेने सूग्लाबे ची यदेबे हुकुम पीन्, होर्दे थमयू मालिकने ङूर् ल्वाब अङ्क्यूस्स्य। 10 थमयूदे अङ्खूलाचीस्स्य, तर पूरा रूप्दे विश्वास चे खल्जे क्यूस्स्य। येरेने साप्ता पोने थमयूदे ङीनने मुक्ति पीनब परमेश्वरजे शिक्षाजे न-मीन् येस्स्य। 11 चेनेयलो परमेश्वरजे अनुग्रह मीयू क्वानेने मुक्ति पीनजे लागि तङ्क ख्यङ्। 12 अम्ब अनुग्रहदे ङीनने अन्ज्य जीया मेस्ये संसारजे लाल्ची क्याबीसे पीन्क्य, अम्ब अनुग्रहजे कारणदे ङीन रङ्सेने कबूने येत्देबे अम्ब संसारने तम्दम् मेस्ये धर्मी क्यूत्देबे जीया च खूइय। 13 यरप्रने पात्ता केन् परमेश्वर मेस्ये ङीनने मुक्ति पीनब येशू ख्रीष्ट महिमाने रब दिनजे ङीन आशा चीन्न ख्यङ्। 14 येशू ख्रीष्टदे ङीनने साप्ता किसिमजे पापदे छुर्तेजे लागि रङ्से प्राणये पीन्दे। ङूदे ङीनने पवित्र चेने रङ्से मी बन्दीदे, मेस्ये ज्य काम चेने जोसीलो क्यूरने येरे चीत्दे। 15 नदे अम्ब पोयू बोङ्बे य, पूरा हकदे लोम-तन ची मेस्ये फ्राची। सूदेये नने ह्यल अन्चीस्स्य। |
Ghale New Testament © Nepal Bible Society, 2011.
Nepal Bible Society