तीतस 1 - घले नयाँ करार1 परमेश्वरजे त्वो मेस्ये येशू ख्रीष्टजे मूल स्यूस्स्या पावलदे, परमेश्वरदे सेलबयूजे विश्वास मेस्ये ङूने सेम् पर्तेब जीया अनुसार थमयूजे तम्दम्जे ज्ञान थेप् चेने, 2 हम्ब विश्वास मेस्ये ज्ञान कलङ्बेये अन्सीबब जीयाजे आशाने छ्यान ख्यङ्, होर्दे कलङ्बेये लूच्च अङ्-क्यमब परमेश्वरदे मीयूङ्मेस्येने कबुल चीत्दे। 3 ठीक बीलने ङूदे रङ्सेजे वचन स्य्वेस्ये पीन्दे। ङीनने मुक्ति पीनब परमेश्वरजे आज्ञा अनुसार ङूदे ङैने अम्ब वचन पीन्दे। 4 विश्वासने त्याप्र ख्यब ङैजे तम्दम्जे च तीतसने- प परमेश्वर मेस्ये ङीनने मुक्ति पीनब येशू ख्रीष्टजे अनुग्रह मेस्ये शान्ति। क्रेटने तीतसजे काम 5 येरेक्यूत्देबे ङैदे नने क्रेटने पोङ्इदे, यी ङैदे नने येयेप्र नदे हैयाने अन्जेनब कामयू पूरा ची, मेस्ये सहर क्वानेने एल्डरयू चून्दी। 6 एल्डरयू मदी तीत्यात्या ङ्येन् चेब मेस्ये मीयूदे दोष लैदे अङ्ख्वब, ङूजे च-चीमीयू विश्वास चेब क्यूस्स्य, मेस्ये ज्य आनि-बानी मेस्ये ज्य आज्ञा मन्देब क्यूस्स्य। 7 परमेश्वरजे सेवा चेपर्दे क्यूरबदे बिशपब दोष त्वब क्यूर पर्दीय। ङू जिद्दी या छ्योट्टो छी चेब, या ची-नादूदे स्य्वब, या च्य-जीङ मेस्ये धनजे लोभ चेब क्यूर अङ्क्यूर्, 8 तर ङ्योव रब गेसेन् चेब, मीने भलो चेब, रङ्सेने काबूने येन, इमान्-जेमेन् ख्यब, पवित्र मेस्ये नियम नङ्ने टूङब क्यूर पर्दीय। 9 रङ्सेदे प्रेब तम्दम् शिक्षाने लादीनब मेस्ये सूजोनेये अम्ब शिक्षा पीन्देबे बोङ् पीन ख्वब क्यूस्य। अम्ब शिक्षा ङीदे लोम्मेप्र क्यूरपर्तीस्य। होर्दे अम्बजे बिरोध चेबयूजे गल्तीनेये तम्मेब क्यूर पर्तीस्य। 10 चेनेयलो कूम मीयू सूजो मीजे नङ्ने अन्टोङ्, सीती-सीतीजे पोयू चे, छल्लेबयू ख्यङ्। थेप्प्र खतना चेबयू ब येरने क्यूक्क्य। 11 थमयूजे ङूर् ल्वा अङ्ख्व चेपर्दीय, चेनेयलो थमयूदे रङ्सेजे फाइदजे लागि खलकजे क्वानेने खैलाबैला चीन्न ख्यङ्। येर शिक्षा थमयूदे पीन अङ्क्यूर ख्य। 12 थमयू नङ्जे अगमवक्ता त्यादे य ख्यङ्, “क्रेटजे मीयू येतार्ने लूच्च क्यम, सोरो क्वा रोलायूजेप्र व्यवहार तनब मेस्ये म्यास्सी मेस्ये चने स्येबयू ख्यङ्।” 13 अम्ब गवाही तम्दम् ख्यङ्। होरेक्यूत्देबे थमयूने बोङ्बे ङर्मी, मेस्ये थमयू विश्वासने बूल्ल्यो क्यूक्क्य। 14 तम्दम् पोने अङ्-ङ्यीनब मीयूजे आज्ञा मेस्ये सीत्तीने बन्दीयेब यहूदीजे दन्त्याकथा अन्-ङ्यीन्लाची। 15 शुद्ध मीजे लागि साप्ता थोकने शुद्धने क्यूक्क्य। तर अशुद्ध मेस्ये विश्वास अन्चेब मीयूजे लागि यलो चैपोये शुद्ध अङ्क्यूर्, थमयूजे सेम् मेस्ये विवेकये च्याप्पाने नोङ्येब क्यूक्क्य। 16 थमयूदे परमेश्वरने स्ये ख्यङ् यदेबे स्वाङ् त्या चीक्क्य, तर थमयूजे रङ्से कामदेब परमेश्वरने अम्मन्देब तङ्क्य। थमयू अन्ज्य घिन मेस्ये आज्ञा अम्मन्दे क्यूक्क्य, मेस्ये कम्बनेये ज्य काम चेब लायकजे त्वो। |
Ghale New Testament © Nepal Bible Society, 2011.
Nepal Bible Society