रोमी 9 - घले नयाँ करारइस्राएलजे लागि पावलजे सेम् नङ्जे बीगन 1 ङ ख्रीष्टजे क्यूत्देबे तम्दम् पो क्यम्न ख्यङ्, ङ लूच्च पो अन्क्यम्। पवित्र आत्माजे नङ्ने ख्यब ङैजे विवेकदेये ङ लूच्च पो अन्क्यम् यब गवाही पीन्क्य। 2 ङैजे सेम्ने सोरो शोक् मेस्ये कलङ्नेयली सेम् ठोन ख्यङ्। 3 ङैजे यहूदी अत-अची च्योन्यूदे उद्धार प्रेस्य यब त्या ङैजे इच्छा ख्यङ्, बरू ङ श्राप प्रेत्देबे ख्रीष्टप्रे चीन्तङ् क्यूल्लीने, ङ सूग ख्यङ्दे। 4 थमयू इस्राएलीयू ख्यङ्, मेस्ये परमेश्वरदे थमयूने रङ्से च-चीमी क्यूस्से पीन्दे। ङूदे रङ्से महिमा थमयूने तम्मीदे, थमयूप्रेने करार ख्यादे, मोशाजे नियम पीन्दे, ङूने पूस्तेने लोम्मीदे, मेस्ये ङूदे चेब बाजायू थमयूदे प्रेख्यङ्। 5 यहूदीयू न-मीन् ख्यब मेमेयूजे छगूम्-पूरगूम्यू ख्यङ्, मेस्ये ख्रीष्टये थमयूजे वंशजे ख्यङ्। साप्ता थोक फ्याने राज्य चेब परमेश्वरजे येतार्ने जै-जै क्यून्नीस्य। आमेन। 6 परमेश्वरजे वचन होरेने खेर अङ्गीली। चेनेयलो इस्राएलने ख्यब मीयू क्वाने तम्दम्जे यहूदी दी, 7 अब्राहामजे ङ्वदे प्रेब, छगूम्-पूर्गूम् क्वाने परमेश्वरजे छगूम्-पूर्गूम् अन्क्यूर्। तर “इसहाकजे छगूम्-पूर्गूम् त्या नने चेब कबुलजे छगूम्-पूर्गूम् क्यूक्क्य।” 8 अम्ब यमेब अब्राहामजे छगूम्-पूर्गूम् क्वाने परमेश्वरजे च-चीमी दी। तर परमेश्वरदे पीन्क्य यदेबे करार चेब च-चीमी त्या अब्राहामजे छगूम्-पूर्गूम् क्यूक्क्य। 9 चेनेयलो परमेश्वरदे येर्बे कबुल चे ख्य, “रीय यब बीलने ङ रीय, मेस्ये नैजे कीम्म सारादे च त्या प्रेब क्यूक्क्य।” 10 अन्छ्वात्या दी, होरप्रने ङीनजे मेमे इसाहकजे कीम्म रिबेकादेये चूङ्ल्या च प्रेमेख्य। 11 मेस्ये चोङ्ल्यायू ख्वाजेने केल्रबने, थमयूदे ज्य या अन्ज्य काम चेयली खूम्ने, परमेश्वरजे सेलब काम मीयूजे काम लेत्देबे दी, तर ङूजे इच्छा अनुसार पक्क क्यूक्क्य यदेबे, 12 रिबेकाने येर्बे य ख्य, “जेठदे कन्छजे सेवा चीक्क्य।” 13 येर्बे लिख्दीये ख्यङ्, “याकूबने ङैदे प्रेम चीत्दे, तर एसावने ह्यल चीत्दे।” 14 जेम्से ङीनदे च य? परमेश्वरदे अन्-न्याय चीक्क्या? चेने अन्क्व! 15 चेनेयलो परमेश्वरदे मोशाने यदे, “ङैदे सूने कृपा चीतीङ्रीय हम्बने कृपा चीक्क्य, मेस्ये ङैदे सूने ङ्येम्दीरीय हम्बने ङ्येम्क्य।” 16 येरेक्यूत्देबे मीदे चेब इच्छा या धम चेब फ्याने अम्ब भर् अम्पर्दी, तर परमेश्वरजे कृपा फ्याने भर् पर्दीय। 17 धर्मशास्त्रदे फारोजे बारेने य ख्यङ्, “ङैजे बोङ् नने तन्देबे, संसारजे का-मुलुक मीयूदे ङैजे मीन् तस्य यदेबे ङैदे नने मूरूम् चीम्मीदे।” 18 येरेक्यूत्देबे ङूदे सूने कृपा चीतीङ्रीय हम्बने कृपा चीक्क्य, मेस्ये ङूदे सूने सेम् कोङ चीम्मीतीङ्रीय ङूने सेम् कोङ चीम्मीय। 19 होर्दे नदे ङैने य खूइय, “परमेश्वरदे चेने थेप् दोष लैदे? चेनेयलो ङूजे इच्छाने सूदे विरोध चे खूइय?” 20 तर मी क्यूत्देबे परमेश्वरने ङूर ल्वाब न सू? सदे बन्देब तीयाँदे “चैने ङैने येर बन्दे” यखूइया? 21 कुमालदे च्योप्बेब स छ्योङ्ब त्यादे तीयाँ त्या सोरो काम लादेब, मेस्ये तीयाँ त्याब सोरो काम अन्लादे बन्देब हक ङूने त्वया? 22 कादेये होरप्रने परमेश्वरदे रङ्से छी फैनने मेस्ये रङ्से बोङ् तेन्देबे नाश चेने तयार चीतेब दुष्ट मीयूजे लागि सोरो धेरेन् क्यूत्देबे सैदीन ख्यङ् यलो, च क्यूत्दे स्व? 23 कादेये रङ्से महिमाजे लागि खूम्मेस्येने तयार चीत्देब ङूजे कृपा प्रेब मीयूने रङ्से महिमाजे सम्पत्ति तनने ङूदे येरे चीत्दे। 24 चेनेयलो ङूदे ङीनयूने यहूदी मीयू नङ्देत्या अङ्को, तर यहूदी तेब मीयू नङ्देये कोदे। 25 केर्बे अगमवक्ता होशेजे किताबने येरे लिख्दे ख्यङ्- “थमयू ङैजे मी तीलीने, ङ थमयूने ‘ङैजे मीयू’ यीय, मेस्ये ङैदे सूने माया अन्चे ख्य, ङूने ‘ङैदे छे ख्यङ्’ यीय।” 26 “होर्दे केने ‘नमयू ङैजे मीयू दी।’ यदेबे थमयूने यख्य, हैयाने थमयूने ‘सोम्बो ख्यब परमेश्वरजे छगूम्-पूर्गूम्’ यीय।” 27 इस्राएलजे बारेने यशैयादे बोङ्बे य ख्यङ्, “इस्राएलजे मीयूजे छगूम्-पूरगूम्यू समुद्रजे पीस सर् ख्यङ्लीनेये, छ्यीत्या मीयूदे त्या उद्धार प्रेक्क्य। 28 चेनेयलो प्रभूदे संसारने छ्योट्टो मेस्ये पक्क दण्ड पीन्क्क्य।” 29 यशैयादे अगमवाणी चे ख्य, “कादेये सोरो शक्ति ख्यबदे प्रभूदे ङीनजे लागि छगूम्-पूर्गूम् अन्हीदेयलो ङीन सदोमजे मीप्रने क्यूर ख्यङ्दे, मेस्ये गमोराजे मीयूप्रने नाश क्यूर ख्यङ्दे।” इस्राएलजे मीयूदे विश्वास अन्चेब 30 जेम्से ङीन च य? धार्मिकताजे ङ्येदे अन्लादेब यहूदी तेब मीयूदे धार्मिकता प्रे ख्यङ्, अम्ब धर्मिकता विश्वास चीत्देबे प्रे ख्यङ्। 31 तर इस्राएलजे मीयूदे धर्म चेने मोशाजे नियमजे ङ्येदे कोलाने लादीलीने धर्मी ठर्दे अङ्खू। 32 चेने अङ्ख्व? चेनेयलो थमयूदे धार्मिकता विश्वास चीत्देबे दी, तर काम चीत्देबे प्रेखूइय मन्दे। येरेक्यूत्देबे थमयू “च्या थूङ्बब लूङ्ने” च्या थूङ्देबे फी क्यरी। 33 येर्बे धर्मशास्त्रने लिख्दीय ख्यङ्, “ले, ङैदे सियोन्ने च्या थूङ्ब लूङ् त्या येक्क्य, हम्ब लूङ्ने मीयू च्या थूङ्बीय, लूङ् पोलोम् त्या, हम्बदे थमयूने फी क्यर्बीय, तर सूदे ङू फ्याने विश्वास चीक्क्य हम्ब कलङ्बेये त्वा अम्पर्दी।” |
Ghale New Testament © Nepal Bible Society, 2011.
Nepal Bible Society