रोमी 8 - घले नयाँ करारपवित्र आत्मादे प्रेब जीया 1 येरेक्यूत्देबे जेम्से ख्रीष्ट येशूने ख्यब मीयूने दण्ड पीनब आज्ञा त्वो। 2 चेनेयलो जीया पीनब आत्माजे नियमदे ङैने पाप मेस्ये सीबसे पीनब नियमट्यादे ख्रीष्ट येशूने उद्धार चीम्मे ख्यङ्। 3 पापी स्वभावदे मीने कमजोर चेब क्यूत्देबे मोशाजे नियमदे च चे अङ्खू हम्ब परमेश्वरदे चीम्मीदे। परमेश्वरदे रङ्से चने ङीन्जे ङ्वप्रेने ङीनजे पापजे लागि बलि क्यूरने कूल्बीदे येर्बे ङीन फ्याने राज्य चेब पापी स्वभावने नाश चीप्पीदे। 4 येर्बे पापी स्वभाव अनुसार प्रब दी, तर पवित्र आत्मा अनुसार प्रब मीयूजे लागि मोशाजे नियमदे चैतेब पो पूरा चे ख्यङ्। 5 चेनेयलो पापी स्वभाव अनुसार प्रब मीयूदे ङ्वने चैतेब सेयूने सेम् चीक्क्य, तर पवित्र आत्मा अनुसार प्रब मीयूदे पवित्र आत्माजे पोने सेम् चीक्क्य। 6 चेनेयलो पापी स्वभाव अनुसार प्रब मीयूब सीब पर्दे ख्यङ्, तर पवित्र आत्मा अनुसार प्रब मीयूदेब मेस्ये शन्ति प्रेक्क्य। 7 पापी स्वभाव अनुसार प्रब मी परमेश्वरजे शत्रु ख्यङ्। चेनेयलो ङूदे मोशाजे नियम अम्मन्दी मेस्ये मन्देये अन्खू। 8 पापी स्वभावजे अनुसार प्रब मीयूदे परमेश्वरने सूग्ला चे अन्खू। 9 कादेये तम्दम्ने परमेश्वरजे आत्मा नमयूने ख्यङ्दे यलो, नमयू पापी स्वभाव अनुसार प्रब दी, तर पवित्र आत्मा अनुसार चील्लेब क्यूक्क्य। तर कोइ मीयूप्रे ख्रीष्टजे आत्मा अन्क्यूत्देयलो हम्ब ख्रीष्टजेने दी। 10 कादेये ख्रीष्ट नमयूप्रे ख्यङ्देयलो, पापजे कारणदे नमयूजे ङ्व सीयेब ख्यङ्लीने धर्मी क्यूरब कारणदे नमयूजे आत्मा सूय। 11 येशूने सीयेब ङ्वदे फेरि सोम्बो चीम्मेब परमेश्वरजे आत्मा नमयू नङ्ने बास टूङ्देयलो, ख्रीष्ट येशूने सीयेबदे सोम्बो चीम्मेब परमेश्वरदेने नमयूप्रे बास टूङब ङूजे आत्माने क्यूत्देबे नमयूजे सीयेब ङ्वनेये सोम्बो चीम्मीय। 12 येरेक्यूत्देबे अत-अची च्योन्यू, ङीनजे पापी स्वभावदे मनप्र जीया चजे लागि ङीनने कर अन्लादी। 13 चेनेयलो नमयूजे पापी स्वभावदे मनप्र प्रदेयलो, नमयू सीबीय, तर कादेये पवित्र आत्माजे बोङ्दे पापी स्वभावदे चेब कामयूने नाश चीक्क्ययलो, नमयू सोम्बो क्यूक्क्य। 14 परमेश्वरजे आत्मादे तनब लम्ने प्रबयू परमेश्वरजे छगूम्-पूर्गूम् ख्यङ्। 15 चेनेयलो फ पर्देब त्वो-त्वोमजे आत्मा नमयूदे प्रेब दी, तर नमयूदे परमेश्वरजे च-चीमी क्यूरब आत्मा प्रे ख्यङ्। येरेक्यूत्देबे ङीन परमेश्वरने “अब्बा, प” यदेबे कोय, 16 अम्ब परमेश्वरजे छगूम्-पूर्गूम् ख्यङ् यब पवित्र आत्मादे ङीनजे आत्माप्रे गवाही पीनब ख्यङ्। 17 कादेये ङीन ङूजे च-चीमी यीय यलो, परमेश्वरदे रङ्से मीजे लागि फूङ् चीत्देब असीजे हकये प्रेक्क्य। मेस्ये ख्रीष्टप्रेने गोसारी हक प्रेक्क्य। ङूजे दु:खने ङीन सामेल् क्यूक्क्य यलो ङूजे महिमानेये ङीनयू सामेल् क्यूक्क्य। नङ्ग प्रेब महिमा 18 ङ विचार चीक्क्य, अम्ब जीयाने ङीनदे भोक्तीनब सकस्यू, नङ्ग ङीनदे प्रेब महिमाप्रे करब लायकजे त्वो। 19 सृष्टि चेब साप्ता सेयूदे ङूजे च-चीमीयूने परमेश्वरदे फेरि कलङ् तम्मीय यदेबे सोरो आशा चीत्देबे रेन्न ख्यङ्। 20 सृष्टि चीक्कब सेयू क्वाने रङ्सेदे सेम् अन्चील्लीने काम अन्लादे क्यूरे ख्यङ्, परमेश्वरदे येर क्यूस्से पीन्दे। येर केन् आशा चीत्देबे, 21 सृष्टि रङ्सेने नाश क्यूरब बन्धन्दे छुटकारा क्यूक्क्य, मेस्ये परमेश्वरजे च चीमीयूदे प्रेब महिमाजे छुटकाराने सामेल् क्यूक्क्य। 22 ङीनने था ख्यङ्, चूजोसेमे सूत्केरी बीद लादेप्र सृष्टि क्वाने दु:ख प्रेत्देबे बोल्न ख्यङ्। 23 तर सृष्टित्या दी, ङी रङ्सेये, सूप्रे पवित्र आत्माजे पात्ता खूम्जे फल ख्यङ्, छगूम्-पूरगूम्जे रुप्ने ग्रहण चेने, या ङीजे ङ्वजे उद्धार क्यूरजे लागि रेन्देबे ङी रङ्सेये नङ्-नङ्ने बोल्न ख्यङ्। 24 अम्ब आशा चीत्देने ङीनदे उद्धार प्रेत्दे। जेम्से तङ्ब आशाब आशाने दी। चेनेयलो खूम्ने प्रेक्कब सेजे आशा सूदे चीक्क्य? 25 तर कादेये ङीनदे अन्तङब सेजे आशा चीक्क्य यलो, ङीन धेरेन् चीत्देबे हम्ब रेन्नीय। 26 होरप्रने पवित्र आत्मादेये ङीन बोङ् त्व क्यूप्प दोङ्मीय। केर्बे प्रार्थना चे पर्दे होर ङीनदे अन्स्ये, तर स्य्वेस्ये अन्डब पोयूजे के योन्देबे पवित्र आत्मादे ङीनजे लागि प्रार्थना चीम्मीय। 27 मेस्ये मीजे सेम्जे पो तङब परमेश्वरदे पवित्र आत्माजे विचार च ख्यङ् स्येय, चेनेयलो पवित्र आत्मादे परमेश्वरजे पवित्र मीयूजे लागि परमेश्वरजे इच्छा अनुसार ङूप्रेने प्रार्थना चीम्मीय। ट्याबयूयली झन् थेप् 28 ङीनदे स्ये ख्यङ्, परमेश्वरने प्रेम चेब मीयू मेस्ये ङूजे इच्छा अनुसार क्वब मीयूजे लागि साप्ता पोनेने ङूदे भलो चीम्मीय। 29 सू-सूने ङूदे खूम्देमेस्येने सेल ख्यङ्, ङूदे थमयूने रङ्से चप्रने क्यूरने कूम च्योन्यू नङ्ने ख्रीष्ट जेठ क्यूस्स्ये पीनने खूम्मेस्येने खेर्दीपीदे। 30 सू-सूने परमेश्वरदे खूम्ने सेल्दे, थमयूने ङूदे मीन क्यूदेबे कोदे मेस्ये सू-सूने ङूदे कोदे थमयूने ङूदे धर्मी ठर्दीमीदे, मेस्ये सू-सूने धर्मी ठर्दीमीदे थमयूने ङूदे महिमा पीन्दे। 31 अम्ब पोने ङीन च य स्व? कादेये परमेश्वर ङीन तेले ख्यङ् यलो ङीनजे विरुद्ध सूदे चे खूइय? 32 ङूदे रङ्से चनेये जूक्तीदेबे अन्ही, तर ङीन्जे लागि पीन्दे। ङीनयूजे लागि रङ्से चये पीनबदे झन् ङूप्रे सूजो साप्ता पोने ङीनने अम्पीनया? 33 परमेश्वरदे सेलब मीयूने सूदे दोष लैदे खूइय? परमेश्वरदेने थमयूने धर्मी ठहर्दीय यलो, 34 होर्दे थमयूने सूदे दण्डजे आज्ञा पीन खूइय? चेनेयलो ख्रीष्ट थमयूजे सट्टने दण्ड भोक्तीदेबे सीये ख्यङ्। ङू सीये त्या दी, अम्ब यली केन् काम सीयेबदे फेरि सोम्बो चीम्मीदे। चूजो ङू परमेश्वरजे स्येत्तेयोर् टूङ्देबे राज्य चील्लीन ख्यङ्। होर्दे ङूदे ङीनजे लागि परमेश्वरप्रे बिन्तीये चीन्न ख्यङ्। 35 जेम्से ङीनने ख्रीष्टजे प्रेम ट्यादे सूदे स्या खूइय? सकस्दे, या दु:खदे या सतनम्दे, या अनिकालदे, या ह्वे अम्प्रेत्देबे, या खतरा या पार्ज्यादे? 36 धर्मशास्त्रने येरे लिख्दीये ख्यङ्, “नैजे लागि ङी येतार्ने सेक्कीय। ङी तूपने-मेब स्वान्प्र क्यून्न ख्यङ्।” 37 दी, ङीनने प्रेम चेब ख्रीष्टदे ङीनने अम्ब साप्ता पोयू यली थेप् ट्यास्ये पीन ख्यङ्। 38 चेनेयलो ङैने पक्क था ख्यङ्, चै पोदेये ङीनने ख्रीष्टजे प्रेमप्रे स्या अन्खू। मृत्यूदे, या जीयादे, या स्वर्गदूतयूदे, या शैतानजे शक्तिदे, या दीनीजे पोयूदे या नङ्गजे पोयूदे, या शक्तियूदे, 39 या मोजे संसारदे या तोजे संसारदे या सृष्टि चीतेब पोयूजे कम्ब बोङ्देये ङीनने ख्रीष्ट येशू ङीनजे प्रभुने ख्यब परमेश्वरजे प्रेम ट्यादे छूर्तीबे अन्खू। |
Ghale New Testament © Nepal Bible Society, 2011.
Nepal Bible Society