रोमी 3 - घले नयाँ करारपरमेश्वर भर् पर्दे ख्वब ख्यङ् 1 होरेयलो यहूदी क्यूत्देबे चै फाइदा क्यूत्दे? खतना क्यूत्दे त्या चै फाइदा ख्यङ्? 2 तम्दम्ने, यहूदी क्यूरब फाइदा ख्यङ्। पात्ता खूम परमेश्वरदे रङ्सेजे पवित्र वचन यहूदीयूने पीन्दे। 3 कादेये थमयू नङ्ने कोइ कोइदे विश्वास अन्चीत्देयलो, च क्यूत्दे स्व? च थमयूदे विश्वास अन्ची यबने परमेश्वर भर् पर्दे ख्वब अङ्क्यूर क्यूप्पीया स्व? 4 होर अन्क्यूस्स्य, परमेश्वर तम्दम् मेस्ये मीयू क्वाने लूच्च ठर्दीस्य। येरे धर्मशास्त्रने लिख्दीये ख्यङ्, “नदे क्यमब पोने ठीक ठर्दीस्य, मेस्ये न्याय चे बीलने न ट्यास्य।” 5 तर ङीनदे धर्मत्वब कामयूदे परमेश्वरजे धार्मिकताने चेलाबे तन्क्य यलो, ङी च य स्व? च परमेश्वर ङीनप्रे छी लङब गल्ती ख्य औ? (ङ मीदे क्यमब पोप्र ङैदे येन ख्यङ्।) 6 अम्ब क्यूरने अङ्खू! होरे यलो परमेश्वरदे संसारजे न्याय चीप्प केरे चेखूइय स्व? 7 तर कादेये ङैदे चेब लूच्चदे परमेश्वरजे तम्दम् पोने केन् चीत्देबे ङूजे महिमा क्यूक्क्य यलो चेने पापीनेप्र ङैजे न्याय क्यूर पर्दे? 8 होरेयलो, ज्य क्यूस्स्य यदेबे चेने अन्ज्य कामयू अन्चे स्व? कोइ कोइ मीयूदे ङीदे होरने य ख्यङ् यदेबे ङीने अन्ज्य दोष लैदे ख्यङ्। थमयूदे दण्ड प्रेब पो ठीकने ख्यङ्। धर्मी मी सूत्याये त्वो 9 होरेयलो च ङीन यहूदीयूब सूजोयू यली थेप् ज्य ख्य औ? त्वने त्वो, चेनेयलो यहूदी मेस्ये यहूदी तेब मीयू क्वाने त्याप्रने पापजे नङ्ने ख्यङ् यदेबे ङैदे दोष लैदीक ख्यङ्। 10 येर पो धर्मशास्त्रनेये लिख्दीये ख्यङ्, “परमेश्वरजे खूम्दे सूमीये धर्मी त्वो अँह तीत्याये त्वो, 11 बुद्धि ख्यब मी सूत्याये त्वो, परमेश्वरने सूदेये अम्मल्। 12 ख्वात्तादेने लम् येल्क ख्यङ्, मेस्ये क्वाने काम अन्लादे क्यूरे ख्यङ्, सूदेये ज्य काम अन्ची, ज्य काम चेब मी तीत्याये त्वो।” 13 “थमयूजे ङूर् अङ्उप्केब तूर्सप्र ख्यङ्, थमयूदे रङ्सेजे लीदे लूच्च क्यम ख्यङ्।” “थमयूजे बोली र्वेजे तूक्प्र ख्यङ्।” 14 “थमयूजे ङूर् ले तप्नब मेस्ये अन्ज्य खब पोदे फ्यान ख्यङ्।” 15 “थमयूजे तोप् मी सेने च्योर ख्यङ्। 16 थमयू कने-कने प्रीय, होने-होने नाश चीक्क्य मेस्ये छरङ् पीन्क्य, 17 मेस्ये शान्तिजे लम थमयूदे अन्स्ये।” 18 “मेस्ये थमयू परमेश्वरप्रे अम्फ ख्यङ्।” 19 जेम्से ङीदे स्ये ख्यङ्, मोशाजे नियमदे च यीय, हम्ब नियमजे नङ्ने क्यूरबयूने य ख्यङ्, येरेक्यूत्देबे मी क्वाजे ङूर पारा अम्पूस्स्य, मेस्ये का-मुलुक संसार न्यायजे लागि परमेश्वरजे खूम्दे मेर् पर्दीय। 20 मोशाजे नियम त्या मन्दीदेबे सूमीये परमेश्वरजे खूम्दे धर्मी ठर्दीस्ये त्वो, चेनेयलो मोशाजे नियमदेब मीजे पाप तम्मीय। विश्वास चीत्देबे मी धर्मी ठर्तीय 21 तर चूजो परमेश्वरदे मोशाजे नियम अम्मन्दीलीने मीयूने धर्मी ठहर्दीय यदेबे ङूदे तन ख्यङ्। अम्ब पो मोशाजे नियम मेस्ये अगमवक्तायूदे स्य्वेदे ख्यङ्। 22 येर्बे परमेश्वरदे येशू ख्रीष्टने विश्वास चेब क्वानेने धर्मी ठर्दीय, चेनेयलो परमेश्वरदे सूनेये साक्पूजा अन्ची। 23 चेनेयलो क्वादेने पाप चीक्क ख्यङ्, मेस्ये परमेश्वरजे महिमाजे ट्याने फ्योब अम्प्रे ख्यङ्। 24 परमेश्वरजे अनुग्रहजे बर प्रेत्देबे, ख्रीष्ट येशूने ख्यब उद्धारदे थमयू होरेने धर्मी ठर्दे ख्यङ्। 25 ङीनदे चीक्कब पापजे दण्ड भोक्तेने ङीन्जे विरुद्धने ख्यब परमेश्वरजे छी थम्देने, परमेश्वरदे येशू कूल्बीदे होरदे ख्रीष्ट येशू ङीनजे लागि बलि क्यूत्देबे ङूजे का बग्दीकदे यदेबे विश्वास चेब कारण परमेश्वरदे ङीनने धर्मी ठर्दीक ख्यङ्। मीयूङ्ने चीक्कब पापयूजे दण्ड अम्पीनबदे परमेश्वर धर्मी ख्यङ् यदेबे च्येलाबे तेम्मे ख्यङ्। 26 परमेश्वर रङ्सेने धर्मी ख्यङ् मेस्ये येशूने विश्वास चेबयूने परमेश्वरदे धर्मी ठर्दीय यब पो गवाही तनने ङूदे चूजोजे बीलने अम्ब काम चे ख्यङ्। 27 होरेयलो ङीन चै पोने केन् त्वे? जेम्सेमेस्ये ङीन्जे केन् त्वेब नेने त्वो। ङीनदे मोशाजे नियमदे यब पो मन्देब क्यूत्देबे ङीन केन् त्वे औ? अम्बब विश्वासदे क्यूरब ख्यङ्। 28 येर्बे ङीन मोशाजे नियम मन्दीदेबे धर्मी अन्ठर्दी, तर ख्रीष्टने विश्वास चीत्देबेत्या धर्मी ठर्दे खूइय। 29 च परमेश्वर यहूदीयूजे त्या परमेश्वर औ? यहूदी तेब मीयूजेये परमेश्वर ते? तम्दम्ने ङू ख्वोताजेने परमेश्वर ख्यङ्। 30 तम्दम्ने परमेश्वर तीत्यात्या ख्यङ्। ङूदे खतना चीक्कब मेस्ये खतना अन्चेब मी क्वानेने, थमयूजे विश्वासदेने धर्मी ठर्दीय। 31 परमेश्वरजे खूम्ने विश्वास चीत्देबे धर्मी ठहर्दीय यलो च मोशाजे नियमब काम अन्लादे क्यूप्पीया? अँह दी। बरू ङीयू मोशाजे नियमने मन्दीनीय। |
Ghale New Testament © Nepal Bible Society, 2011.
Nepal Bible Society