प्रकाश 7 - घले नयाँ करारलाख त्या ङ्यील्लङ्दे हजार स्यी फ्याने छाप 1 होर्दे ङ्येदे पृथ्वीने या समुद्रने या तोङ्बोयूने उन्दू अन्चील्लीस्य यदेबे पृथ्वीजे सूर् स्यीने स्वर्गदूतयू स्यीदे उन्दू स्यीने कादेबे मेर्नब ङैदे तङ्दे। 2 होर्दे सोम्बो परमेश्वरजे छाप प्रेटेल्देबे सूजो स्वर्गदूतत्या पूर्ब-सदे स्वर्गतेले टेरीनब ङैदे तङ्दे। पृथ्वी मेस्ये समुद्रने हानी चेजे लागि हक पीनेब स्वर्गदूतयू स्यीने ङूदे के केन् योन्देबे येरे यदे, 3 “ङीन्जे परमेश्वरजे त्वो-त्वोमयूजे प्वेने ङीदे छाप अम्पूत्तासेमे पृथ्वीने, या समुद्रने, या तङ्बोयूने चैये हानी अन्चील्लाची।” 4 मेस्ये छाप पूक्कब मीयूजे संख्या ङैदे तदे। थमयू लाख त्या ङ्यील्लङ्दे हजार स्यी ख्य, मेस्ये थमयू इस्राएलजे छगूम्-पूरगूम्जे बाह्र खलकदेने रब ख्य। 5 यहूदाजे खलकदे बाह्र हजारने, रूबेनजे खलकदे बाह्र हजारने, गादजे खलकदे बाह्र हजारने, 6 आशेरजे खलकदे बाह्र हजारने, नप्तालीजे खलकदे बाह्र हजारने, मनश्शेजे खलकदे बाह्र हजारने, 7 शिमियोनजे खलकदे बाह्र हजारने, लेवीजे खलकदे बाह्र हजारने, इस्साखारजे खलकदे बाह्र हजारने, 8 जबूलूनजे खलकदे बाह्र हजारने, योसेफजे खलकदे बाह्र हजारने, बेन्यामीनजे खलकदे बाह्र हजारने छाप पूत्दे। कोला कर् ह्वेब मी-हुल केन् 9 होर्देङ्येदे सूमीदेये चील अन्ख्वब मी हुल केन् त्या ङैदे तङ्दे। थमयूब खलकयू, केयू, मीयू मेस्ये जात-जातजे नङ्दे थमयू र-ख्य, होर्दे थमयू कोला कर् होत्देबे लाने खजूर तोङ्बोजे हाँगा टेल्देबे सिंहासन मेस्ये थुमाजे खूम्ने मेर्नब ङैदे तङ्दे। 10 थमयू बोङ्बे पारा पूत्देबे यदे: “सिंहासनने देन् छ्यानब ङीन्जे परमेश्वर मेस्ये थुमादे मुक्ति पीन्क्य।” 11 होर्दे सिंहासन, धर्म-गुरुयू, सोम्बो प्राणीयू स्यीजे ख्यूर्ने स्वर्गदूतयू क्वाने मेर्दे, सिंहासनजे खूम्ने थमयू पून्छ्यल् क्यूत्दे, मेस्ये येरे यदेबे परमेश्वरने स्यूव पीन्दे। 12 “आमेन! ङीन्जे परमेश्वरजे सार्या, महिमा, बुद्धि, धन्यवाद, गेसेन्, शक्ति मेस्ये बोङ् येतार्ने क्यून्नूस्य। आमेन!” 13 धर्म-गुरुयू नङ्ने त्यादे ङैने लोत्दे, “अम्ब कोला कर् ह्वेब मीयू सू ख्यङ्, मेस्ये थमयू कैयादे रख्यङ्?” 14 होर्दे ङैदे ङूने यदे, “प्रभु, नदेने स्ये ख्यङ्।” ङूदे ङैने यदे, “थमयूब सोरो फत्या सतनम् सैदीदेबे रब मीयू ख्यङ्, मेस्ये थमयूदे रङ्सेजे कोलायू थुमाजे काने ठूदेबे कर् चे ख्यङ्। 15 येरेक्यूत्देबे, “थमयू परमेश्वरजे सिंहासनजे खूम्ने ख्यङ्, मेस्ये नो-मून् ङूजे मन्दिरने ङूजे सेवा चीन्न ख्यङ्, मेस्ये सिंहासन्ने देन् छ्यानब थमयूप्रेप्रे टूङ्देबे रक्षा चीक्क्य। 16 थमयू फेरि कलङ्बेये ठीस्ये त्वो मेस्ये क्यू फैस्ये त्वो, मीयाजे रप् या सूजो सोरो ठ्वब रप्ये थमयू फ्याने पर्दीस्ये त्वो, 17 चेनेयलो सिंहासनजे अन्द्रने ख्यब थुमा थमयूजे प्रङ्ब क्यूक्क्य, मेस्ये थमयूने प्रेस्योल्देबे सोम्बो क्यू प्ल्यानब मूरुम्सेमे कूबीय, मेस्ये परमेश्वरदे थमयूजे म्यादे योङ्रब म्यामूयू क्वाने फील्मीय।” |
Ghale New Testament © Nepal Bible Society, 2011.
Nepal Bible Society