प्रकाश 6 - घले नयाँ करारलग छपयू नङ्जे नङ्सू पोयू 1 कन्छ्वाब थुमादे हम्ब लग छाप ङ्यी नङ्ने पात्ता खूम्जे छाप ल्वाबेब ङैदे तङ्दे, हन्छ्वाब हम्ब सोम्बो प्राणीयू स्यी नङ्ने त्यादे मू गर्जेदेप्र आवाजदे “ख!” यब ङैदे तदे। 2 होर्दे ङैदे मी टदेबे प्रब त कर् त्या तङ्दे, हम्ब फ्याने टदेबे प्रेनबदे धनू त्या टेल्न ख्य, मेस्ये ङूने मुकुट त्या पीन्दे, होर्दे ङूदे शत्रु फ्याने ट्यादेबे फेरि थेप् ट्याने योङ्गीदे। 3 कन्छ्वाब ङूदे दोस्रो लग छाप ल्वादे, हन्छ्वाब दोस्रो सोम्बो ख्यब प्राणीदे “ख” यब ङैदे तदे। 4 मी टदेबे प्रब सूजो मल्लम त त्या फीने योङ्रदे। मीयू त्यादे त्याने सेस्स्य यदेबे अम्ब त फ्याने टदेबे प्रबने पृथ्वीजे शान्ति मल्बेब हुकुम पीन्दे। ङूने तरवार केन् त्या पीन्दे। 5 कन्छ्वाब ङूदे तेस्रो लग छाप ल्वादे, तेस्रो सोम्बो ख्यब प्राणीदे “ख” यब ङैदे तदे। ङैदे मी टदेबे प्रब त लङ् त्या तङ्दे। हम्ब त फ्याने टदेबे प्रबजे लाने करब पर् त्या ख्य। 6 हम्ब सोम्बो प्राणी स्यीजे अन्द्रने येरे यब आवाज तीत्या ङैदे तदे, “तीयाजे मेला किलो त्या ह्व, तीयाजे मेला किलो सोम् जूकू, तर जैतूनजे मूर्गू मेस्ये अङ्गुरजे चीने हनी अम्पीन्लाची।” 7 कन्छ्वाब ङूदे लगजे चौथो छाप ल्वादे, हन्छ्वाब सोम्बो ख्यब चौथो प्राणीदे “ख!” यब ङैदे तदे। 8 ङैदे मी टदेबे प्रब पीसरङ् त तङ्दे, मेस्ये हम्ब तने टदेबे प्रबजे मीन् “मृत्यू” ख्य, मेस्ये “पाताल” ङूजे ङ्येङ्ये प्रेन ख्य। होर्दे थमयूने पृथ्वीजे भा स्यीजे भात्या फ्याने हक पीने ख्य, मेस्ये थमयूदे होने ख्यब मीयूने तरवार, अनिकाल, कोर् मेस्ये नाजे जन्तूयू चील्लीदेबे से ख्वख्य। 9 कन्छ्वाब ङूदे पाचौँ लग छाप ल्वादे, हन्छ्वाब ङैदे चाक्क्याजे नङ्ने थमयूजे आत्मायू तङ्दे, थमयूब परमेश्वरजे वचन प्रचार चीप्प, मेस्ये ङूजे गवाही पीम्ब सेक्कबयू ख्य। 10 मेस्ये थमयूदे के केन् योन्देबे पार पूत्दे, “पात्ता केन् शक्ति ख्यब पवीत्र मेस्ये सत्य प्रभु, न कलङ्सेमे पृथ्वीने ख्यबयूजे न्याय अन्चील्लाबे टूङ? मेस्ये कलङ्सेमे ङीने सेबयूजे खी अम्फालाबे टूङ?” 11 थमयू क्वानेने कोला कर् त्या-त्या पीन ख्य, थमयूप्रे-प्रे काम फरबयू मेस्ये अत-अची च्योन्यूये थमयूप्रने सेक्क पर्तेब संख्या पूरा अन्क्यूत्दासेमे खात्यात्या गैन-सङ् यदेबे थमयूने यदे। 12 कन्छ्वाब ङूदे लगजे छैटौँ छाप ल्वादे, हन्छ्वाब ङैदे सूङ्गू केन् गीलेब तङ्दे। मीयादे सेर् पीन अङ्ख्व क्यूत्देबे लङ् रेगेरेगे कोलाप्र मून्दूङ् क्यूरी, मेस्ये पूर्न्याजे लीनी काप्र मल्लम क्यूत्दे। 13 उन्दूदे अञ्जीरजे तङ्बोने लीङ्ब सी अङ्बयू सने तल्लप्र मूजे कर्चेन्यू पृथ्वीने तल्रदे। 14 खूस्यजे मूठ तोलप्र तोल्देबे मू सू-मली, मेस्ये टापूयू मेस्ये गङ्यू रङ्से-रङ्सेजे नेदे सर्दीयी। 15 हन्छ्वाब पृथ्वीजे मूरुम्जे, मूरुम्जे चयू, सिपाईजे मी केन्यू, फ्योबोयू, बोल्योयू, त्वो-त्वोमयू, मेस्ये स्वतन्त्र मीयू क्वाने गङ्तेले ख्यब पूक्यूने मेस्ये लूङ् पोलोम्यूजे अन्द्रने गीलीदेबे छ्यूप्दे। 16 थमयूदे गङ्यूने मेस्ये लूङ् पोलोम्यूने यदे, ङीफ्याने तल्ख, मेस्ये सिंहासनने देन् छ्यानबदे ङीने अन्तङ्स्य, होर्दे थुमाजे छी ङी फ्याने पर्दीसे अम्पीन्लाबे फूमी। 17 चेनेयलो थमयूजे छी फैनब केन् दिन फ्योर ख्यङ्, मेस्ये अम्ब छीजे खूम्ने सू मेर खूइय?” |
Ghale New Testament © Nepal Bible Society, 2011.
Nepal Bible Society