प्रकाश 5 - घले नयाँ करारखूस्यने लिख्दीयेब मुठ मेस्ये थुमा 1 ङैदे सिंहासनने देन् छ्यानबजे स्येत्लाने नङ्देये मेस्ये फीदेये लिख्दीयेब खूस्यजे मूठ त्या तङ्दे, लगजे छाप ङ्यी पूत्देबे हम्बने बन्द चीदे ख्य। 2 होर्दे सोरो बोल्यो स्वर्गदूत त्यादे आवाज केन् योन्देबे येरे येनब ङैदे तङ्दे, “अम्ब लगजे छापयू पर्देबे मूठ पूक ख्वब लायकजे सू ख्यङ्?” 3 स्वर्गने या पृथ्वीने या पातालने अम्ब खूस्यजे मूठ पूकब होर्दे हम्ब छ्य्वे ख्वब लायकजे सूत्याये त्व ख्य। 4 हम्ब खूस्यजे मूठ पूकब होर्दे हम्ब छ्य्वे ख्वब लायकजे सू त्याये अम्प्रेत्देबे ङ बेस्से ङूदे। 5 होर्दे धर्म-गुरुयू नङ्जे त्यादे ङैने यदे, “अङ्-ङूलाची! ले, यहूदा खलकजे डेन्या, होर्दे दाऊदजे छगूम्-पूर्गूम् नङ्जे न-मीन् चील्लेब त्यादे अम्ब मूठ मेस्ये लगजे अम्ब छाप ङ्यी पूकजे लागि ट्या ख्यङ्।” 6 होर्दे सिंहासन, सोम्बो प्राणी स्यी, मेस्ये धर्म-गुरुयूजे अन्द्रने थुमा त्या मेर्नब ङैदे तङ्दे, ङू सेक्कप्र तङ ख्य। ङूजे रूक् ङ्यी मेस्ये म्या ङ्यी ख्य, हम्बयू पृथ्वीजे का-मुलुकने कूल्बेब परमेश्वरजे आत्मा ङ्यी ख्यङ्। 7 थुमादे खूम सर्दीदेबे सिंहासनने देन् छ्यानबजे स्येत् लादे पीनब हम्ब खूस्स्यजे मूठ कीन्दे। 8 कन्छ्वाब ङूदे हम्ब मूठ लाने कीन्दे, हन्छ्वाब हम्ब सोम्बो प्राणी स्यी मेस्ये नूस्यूदे स्यी धर्म-गुरुयू ङूजे खूम्ने पून्छ्यल् क्यूत्दे। तपब वीणा मेस्ये धूपदे फ्यायेब मर्जे तीयाँयू थमयू क्वाजे लाने ख्य, अम्बब परमेश्वरजे पवित्र मीयूजे प्रार्थना ख्यङ्। 9 थमयूदे येरे यदेबे प्रू सर् त्या पूत्दे: “अम्ब खूस्यजे मूठ लाने टेल्देबे लगजे छापयू पूक ख्वब लायकजे न ख्यङ्, चेनेयलो न सेक्क ख्य, मेस्ये खलकयू, क्यमब केयू, देशयू मेस्ये जात-जातयूजे अन्द्रदे मीयूने परमेश्वरजे लागि नैजे रङ्से कादे छुटकारा चीम्मीदे, 10 थमयूने राज्यत्या पीन्देबे ङीन्जे परमेश्वरजे सेवा चेब पूस्र्यायू चीम्मे ख्यङ्, मेस्ये थमयूदे पृथ्वीने राज्य चीक्क्य।” 11 मेस्ये ङैदे लेत्दे, होर्दे सिंहासन, सोम्बो प्राणीयू मेस्ये धर्म-गुरुयूजे ख्यूर्ने बेस्से कूम लाखदे लाख मेस्ये करोडदे करोड स्वर्गदूतयूजे आवाज तदे। 12 थमयूदे के केन् योन्देबे येरे प्रू पून्न ख्य, “सेक्कब थुमा शक्ति, सोरो कूम फ्योबो, बुद्धि, बोङ्, गेसेन्, महिमा मेस्ये जै-जै प्रेब लायकजे ख्यङ्।” 13 होर्दे स्वर्गने, पृथ्वीने, पातलने, समुद्र, मेस्ये होने ख्यब प्राणीयू क्वादेने येरे प्रू पून्नब ङैदे तदे, “सिंहासनने देन् छ्यानबने मेस्ये थुमाने जै-जै, गेसेन्, महिमा मेस्ये शक्ति येतार्ने क्यून्नूस्य।” 14 होर्दे हम्ब सोम्बो प्राणी स्यीदे यदे, “आमेन।” होर्दे हम्ब धर्म-गुरुयूदे पून्छ्यल् क्यूत्देबे स्यूव पीन्दे। |
Ghale New Testament © Nepal Bible Society, 2011.
Nepal Bible Society