प्रकाश 4 - घले नयाँ करारस्वर्गने ख्यब सिंहसानजे दर्शन 1 होर्दे ङ्येदे ङैदे लेप्प स्वर्गने ख्यो त्या होङ् क्यून्नब तङ्दे। ङैदे पात्ता खूम् तब आवाज धूङ्कूर्जेप्र ख्य, हम्ब आवाजदे ङैप्रे येर्बे क्यम्न ख्य- “अन्तो ख, होर्दे अम्ब ङ्येदे च-च क्यूट्टीय, हम्ब ङ नने तम्मीय।” 2 हन्छ्वाबने पवित्र आत्मा ङै फ्याने रदे। स्वर्गने सिंहासन त्या ख्य, मेस्ये हम्ब सिंहासनने कोइत्या देन् छ्यान ख्य। 3 होने देन् छ्यानबजे त्वा बिल्लौर मेस्ये लालमणिप्र तङ ख्य, होर्दे सिंहासनजे ख्यूर्ने पन्नाप्र तङब कूयूङ् क्यू ख्य। 4 हम्ब सिंहासनजे ख्यूर्ने नूस्स्यूदे स्यी सिंहासन ख्य, मेस्ये टने क्वब मर्जे मुकुटयू मेस्ये कोला कर्यू ह्वेब नूस्स्यूदे स्यी धर्मजे गुरुयू हम्ब सिंहासनयूने टूनब ङैदे तङ्दे। 5 हम्ब सिंहासनदे क्यूलीङ्यू, आवाजयू मेस्ये मू-गर्जेदेब आवाजयू योङ्र ख्य, मेस्ये हम्ब सिंहासनजे खूम्ने प्ल्याङ्नब बत्ती ङ्यी ख्य। अम्ब परमेश्वरजे आत्मा ङ्यी ख्यङ्। 6 सिंहासनजे खूम्दे छाङ्लाङ्के तङब स्फटीकजे समुद्रप्र ख्य। खूम्दे ङ्येदे क्वाने म्यादे-म्यात्या ख्यब सोम्बो प्राणी स्यी सिंहासनजे ख्यूरीरी का-मुलुकने ख्य। 7 पात्ता खूम्जे प्राणी डेन्याप्र ख्य, दोस्रो प्राणी बहरप्र ख्य, तेस्रो प्राणीजे त्वा मीजेप्र ख्य मेस्ये चौथो प्राणी स्यूम्बीनब जूल्लीप्र ख्य। 8 हम्ब प्राणी स्यीजेने येन् र्वा-र्वा ख्य, मेस्ये हम्ब येन्यूजे नङ्ने फीने का-मुलुकने म्या-म्यादे फ्यान ख्य। थमयूदे नो-मून् अन्रोक्तीलाबे येरे यदेबे प्रू पून्नीय, “पवित्र, पवित्र, पवित्र परमप्रभु पात्ता नङ्ने केन् शक्ति ख्यब परमेश्वर, ङू खूम्ये ख्य, चूजोये ख्यङ्, मेस्ये ङ्येदेये रीय।” 9 येतार्ने सोम्बो क्यूत्देबे सिंहासनने देन् छ्यानबने कन्छ्वा-कन्छ्वाब हम्ब सोम्बो प्राणीयूदे महिमा, गेसेन्, धन्यवाद पीन्नीय, 10 हन्छ्वाब येतार्ने सोम्बो क्यूत्देबे सिंहासनने देन् छ्याबजे खूम्ने हम्ब नूस्यूदे स्यी धर्म गुरुयूदे पून्छ्यल् क्यूत्देबे स्यूव पीन्क्य, मेस्ये थमयूदे रङ्से रङ्सेजे टने क्वब मुकुट सिंहासनजे खूम्ने येत्देबे येर्बे प्रू पूक्क्य: 11 “ङीन्जे प्रभु मेस्ये परमेश्वर, महिमा, गेसेन्, मेस्ये शक्ति प्रेब लायकजे न ख्यङ्, चेनेयलो साप्ता से नदेने सृष्टि चीत्दे, मेस्ये नैजे इच्छा अनुसार हम्बयू क्यूट्टदे मेस्ये जीया प्रेत्दे।” |
Ghale New Testament © Nepal Bible Society, 2011.
Nepal Bible Society