प्रकाश 3 - घले नयाँ करारसार्डिसजे मण्डली 1 सार्डिसजे मण्डलीजे दूतने अम्ब पो लिख्दी: परमेश्वरजे आत्मा ङ्यी मेस्ये कर्चेन् ङ्यी ख्यबदे अम्ब पो य ख्यङ्। नैजे काम ङैने था ख्यङ्। न सोम्बो क्यून्नब मीन्त्यामे ख्यङ्, तर न सीये ख्यङ्। 2 चङ्ख क्यूत्देबे होस् ची मेस्ये नैजे सीबलो ख-ख क्यून्नब बाँकी पोयूने बोल्यो ची, चेनेयलो ङैजे परमेश्वरजे खूम्ने नैजे काम सिद्ध क्यूरब ङैदे अन्त्व ख्यङ्। 3 येरेक्यूत्देबे नदे च तदे मेस्ये लोम्दे, हम्ब पोयू ह्वे चीत्देबे मन्दी मेस्ये पश्चात्ताप ची। कादेये चङ्ख क्यूत्देबे नदे होस् अन्चीदेयलो ङ खूमान्प्र रीय, मेस्ये ङ कन्छ्वाब रीय, हम्ब नदे था प्रेस्स्ये त्वो। 4 तर सार्डिसने कोइ मीयू ख्यङ्, हम्ब मीयूदे रङ्से कोलाने चैये दाग क्यूस्स्ये अम्पीन ख्यङ्। थमयू ङैप्रे कोला कर होत्देबे प्रीय, चेनेयलो थमयू अम्ब येरे चेब लायकजे ख्यङ्। 5 सूदे ट्याय, हम्बने येरे कोला कर होम्मीय, मेस्ये कलङ्बेये अन्-सीबब जीया प्रेब मीयूजे मीन् लिख्देब किताबने ङ ङूजे मीन् मेर्दीपीस्ये त्वो। 6 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। फिलाडेल्फियाजे मण्डली 7 होर्दे फिलाडेल्फियाजे मण्डलीजे दूतने अम्ब पो लिख्दी: यी पोयू पवित्र मेस्ये सत्य ख्यबदे य ख्यङ्, ङूजे लाने दाऊदजे चापी ख्यङ्। ङूदे च पूक्क्य, सूदेये था खूस्ये त्वो, मेस्ये ङूदे च थाय, सूदेये पूक खूस्ये त्वो। 8 नैजे कामयू ङैने था ख्यङ्। ले, ङैदे नैजे लागि ख्यो ह्वोङ् चीदे ख्यङ्, सूदे क्यूक्को हम्ब ख्यो था अन्खू। नैप्रे छीत्यात्या शक्ति ख्यङ् यबये ङैने था ख्यङ्, होरेक्यूल्ली नदे ङैजे वचन मन्दे ख्यङ्, मेस्ये नदे ङैने अन्स्ये अन्-य। 9 ले, शैतानने पूस्तेब सभा-कीम्जे यहूदी दीलीने, ङी यहूदी न यदेबे लूच्च क्यमब मीयूने ङ रदेबे नैजे तोप्ने स्यूव पीन्से पीन्क्य मेस्ये ङैदे नने प्रेम चे ख्यङ् यब पो थमयूने तम्मीय। 10 धेरेन् क्यूत्देबे नदे ङैजे आज्ञा मन्दे ख्यङ्, होरेक्यूत्देबे अम्ब पृथ्वीजे मीयू क्वाने जाँचतेजे लागि संसारजे का-मुलुकने सकस् रब बीलने ङ नने जूक्तीमीय। 11 ङ छ्योटो रेन ख्यङ्। नैप्रे च ख्यङ् हम्बने बोङ्बे चूङ्नू, मेस्ये सूदेये नैजे मुकुट लेङ्गे अङ्खूस्य। 12 सूदे ट्याय, ङ ङूने ङैजे परमेश्वरजे मन्दिरजे थम्प्र बन्दीय, मेस्ये ङू हैयादे कलङ्बेये फीने योङ्बस्ये त्वो। ङ हम्बने ङैजे परमेश्वरजे मीन् लिख्दीय, मेस्ये ङैजे परमेश्वरजे सहरजे मीन्, या यरूशलेम लिख्दीय, हम्ब ङैजे परमेश्वर ख्यब ने-स्वर्गदे मो रीय। रङ्सेजे मीन् सर्ये ङ हम्बने लिख्दीय। 13 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। लाउडिकियाजे मण्डली 14 होर्दे लाउडिकियाजे मण्डलीजे दूतने अम्ब पो लिख्दी: आमेन, भरपर्तेब, मेस्ये तम्दम् गवाही मेस्ये परमेश्वरदे सृष्टि चेब सेयू फ्याने हक चील्लेबदे अम्ब पो य ख्यङ्। 15 नैजे कामयू ङैने था ख्यङ्। न सीम्ये त्वो, लूम्ये त्वो, न लूम् क्यूल्लीने या सीम् क्यूल्लीने क्यूर ख्यङ्दे। 16 चेनेयलो न हाल्याहुलीत्या लूम् ख्यङ्, लूम्ये दी सीम्ये दी, येरेक्यूत्देबे ङ नने ङैजे ङूर्दे फीने ओङ्बीय। 17 “ङ फ्योबो ख्यङ्, ङैप्रे कोलानेयली सम्पत्ति ख्यङ्, मेस्ये ङैने चैये हर्जो त्वो” यदेबे नदे य ख्यङ्, तर न दूख्या, ङ्येमत्या, दूख्प्रेब, म्या अन्तङब मेस्ये च्यङ्ली ख्यब पो नने था त्वो। 18 येरेक्यूत्देबे फ्योबो क्यूरजे लागि मीदे खार्देब मर्, च्याङ्ली ख्यब रङ्सेजे ङ्व उपजे लागि कोला कर्, मेस्ये नैजे कन म्यादे तङजे लागि म्याने प्वेब मलम, येर सेयू क्वाने ङैप्रे कीन्ख यदेबे ङ नने मोतो पीन्क्य। 19 ङैदे सू-सूने माया चीक्क्य थमयूने फ्राचीय, मेस्ये तह लैदेजे लागि सकस् पीन्क्य। येरेक्यूत्देबे बेस्से सेम् तङ्देबे पश्चात्ताप ची। 20 ले, ङ ख्यो लने मेर्देबे ख्यो ढ्याक्-ढ्याक् चीत्देबे कप्पीय। कोइदे ङैजे के तदेबे ख्यो पूक्मीदेयलो, ङ ङू-ट्याने रीय, होर्दे ङूप्रे टूङ्देबे चसे चीय, मेस्ये ङू ङैप्रे टूङ्देबे चीय। 21 सूदे ट्याय, हम्बने ङैजे सिंहासनने ङैप्रे टूङ्से पीन्क्य, केर्बे ङ रङ्सेदेये ट्या ख्यङ्, मेस्ये ङैजे पप्रे ङूजे सिंहासनने टुङप्रे ख्यङ्। 22 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। |
Ghale New Testament © Nepal Bible Society, 2011.
Nepal Bible Society