प्रकाश 22 - घले नयाँ करारजीया पीनब होङ् 1 होर्दे ङूदे ङैने जीया पीनब क्यूजे होङ् तम्मीदे, हम्बङ्येदे क्यूजे होङ् छालाला तङब स्फटीकप्र चकिलो ख्य। हम्ब होङ् परमेश्वरजे मेस्ये थुमाजे सिंहासनदे योङ्रदेबे, 2 हम्ब सहरजे लम्जे अन्द्रगुङ्दे हम्ब प्रेन ख्य। हम्ब होङ्जे न-नने जीया पीनब तङ्बो ख्य, हम्ब तोङ्बोने लैजे पीछीने बाह्र थरीजे सीयू लोन ख्य। हम्ब तोङ्बोजे लेम्यूब जात-जातजे मीयूने तम् चीम्मेजे लागि ख्य। 3 जेम्सेमेस्ये हैयाने कलङ्बेये श्राप पर्तीस्ये त्वो। परमेश्वर मेस्ये थुमाजे सिंहासन हैयाने क्यूक्क्य, मेस्ये ङूजे त्वो-त्वोमयूदे ङूने पूस्तीय। 4 थमयूदे ङूजे त्वा तङ्क्य, मेस्ये थमयूजे प्वेने ङूजे मीन् लिख्दीयेब क्यूक्क्य। 5 हैयाने फेरि मून् क्यूस्स्ये त्वो, थमयूने बत्ती या मीयाजे ओथ्याङ् चैतीस्ये त्वो, चेनेयलो थमयूने ओथ्याङ् पीनब पर्मप्रभु परमेश्वर क्यूक्क्य। होर्दे थमयूदे येतार्ने राज्य चीन्नीय। 6 होर्दे स्वर्गदूतदे ङैने यदे, “अम्ब वचन भर्पर्तेब मेस्ये सत्य ख्यङ्। जेम्से अगमवक्तायूने रङ्से आत्मा पीनब परम्प्रभु परमेश्वरदे छ्योट्टोने क्यूट्टब पोयू रङ्से त्वो-त्वोमयूने तनजे लागि रङ्से स्वर्गदूत कूल्बीदे।” येशू छ्योट्टोने रीय 7 येशूदे यदे, “ले, जेम्से ङ छ्योट्टोने रेन ख्यङ्। अम्ब किताबने लिख्दीयेब अगमवाणीजे वचन मन्देबयूदे असी प्रेक्क्य।” 8 अम्ब पोयू तब मेस्ये तङब ङ यूहन्ना ख्यङ्। कन्छ्वाब ङैदे अम्ब पो तदे मेस्ये तङ्दे, हन्छ्वाब ङैने अम्ब पो तम्मेब स्वर्गदूतजे तोप्ने स्यूव पीनने ङ पून्छ्यल क्यूत्दे। 9 तर ङूदे ङैने यदे, “नदे येरे चे अन्क्यूर्। न मेस्ये अगमवाणी क्यमब नैजे अत-च्योन्यू होर्दे अम्ब किताबजे वचन मन्देबयूप्रेप्रेजे ङैये परमेश्वरजे त्वो त्यामे ख्यङ्। परमेश्वरने स्यूव पीन्!” 10 होर्दे ङूदे ङैने येरे यदे, “अम्ब किताबने लिख्दीयेब अगमवाणीजे वचनने छाप अम्पूल्लाची, चेनेयलो अम्ब साप्ता पो क्यूट्ट बील ट्याने फ्योर ख्यङ्। 11 दुष्ट काम चेबयूदे दुष्ट काम चीन्नूस्य, फोहोर काम चेबयूदे फोहोर काम चीन्नूस्य, ठीक काम चेबयूदे ठीक काम चीन्नूस्य होर्दे पवित्र ख्यब मीयू पवित्र क्यून्नूस्य।” 12 येशूदे य ख्यङ्, ले, जेम्से ङ छ्योट्टोने रेन ख्यङ्। रङ्सेदे चेब काम अनुसार मीयू क्वानेने पीनब इनाम ङैप्रे ख्यङ्। 13 अल्फा मेस्ये ओमेगा, पात्ता खूम् मेस्ये पात्ता ङ्ये, मेस्ये आखिरी ङ ख्यङ्। 14 जीया पीनब तङ्बोजे सी चब हक प्रेने मेस्ये हम्ब सहरजे ख्योयूदे नङ्ने क्योब प्रेदे यदेबे रङ्सेजे कोला ठूदेबे सफा येनब मीयूदे असी प्रेक्क्य। 15 होर्दे सहरजे फीनेब क्योयू, ङा-थूक् चेयू, वेश्य काम चेयू, मी सेब काम चेयू, मूर्ति पूजा चेयू, मेस्ये लूच्च चेब सेम् पर्तेयू मेस्ये हम्ब अनुसार काम फरबयू क्यूक्क्य। 16 “ङ येशूदे मण्डलीयूजे लागि अम्ब गवाही पीनने ङैजे दूत नै-ट्याने कूल्बे ख्यङ्। ङ दाऊद मूरूम्जे मूल मेस्ये छगूम्-पूर्गूम् ख्यङ्, ङ, चकिलो प्ल्याङब नप्मून्जे कर्चेन् ख्यङ्।” 17 पवित्र आत्मा मेस्ये पीर्मदे यीय, “ख।” सू-सूदे ङ्यीन्क्य थमयूदे यस्य, “ख।” सू-सू क्यू फैय थमयू रस्य, मेस्ये सू-सूदे थूङब सेम् चीक्क्य थमयूने जीया पीनब क्यू होरेने थूङ्स्य। 18 अम्ब किताबने लिख्दीयेब अगमवाणी ङ्यीनब मीयू क्वानेने ङ बोङ्बे आर्तीय: कादेये कोइ मीदे अम्ब पोने चत्या थेप् थप्दीदे यलो अम्ब किताबने लिख्दीयेब सोरो फत्या सकस्यू परमेश्वरदे ङू फ्याने पूमीय। 19 होर्दे कोइ मीदे अम्ब किताबने लिख्दीयेब अगमवाणीजे वचनदे चत्या पो योम्पीदे यलो अम्ब किताबने लिख्दीयेब जीया पीनब तोङ्बोजे भा, मेस्ये पवित्र सहरने ङूदे प्रेपर्देब भा परमेश्वरदे लेन्कीय। 20 अम्ब पोयूजे गवाही पीनबदे यीय, “तम्दम्ने, ङ छ्योट्टो रेन ख्यङ्।” आमेन, ख स्व, प्रभु येशू। 21 प्रभु येशूजे अनुग्रह परमेश्वरजे पवित्र मीयू क्वाप्रेने क्यून्नूस्य। आमेन। |
Ghale New Testament © Nepal Bible Society, 2011.
Nepal Bible Society