प्रकाश 21 - घले नयाँ करारसर् यरूशलेम 1 होर्दे ङैदे सर् मू मेस्ये सर् पृथ्वी तङ्दे, चेनेयलो खूम्जे मू मेस्ये खूम्जे पृथ्वी सू-मलीदेबे गीले ख्य। समुद्रब होने त्वने त्वो। 2 होर्दे दूलजे लागि पीर्मनेप्र ज्य चीत्देबे परमेश्वरदे छ्योदेब या पवित्र सहर, सर् यरूशलेम स्वर्गदे मो तल्लीनब ङैदे तङ्दे। 3 होर्दे सिंहासनदे येरे यब के केन्त्या ङैदे तदे, ले, “परमेश्वरजे टूङ ने मीयूप्रे क्यूर ख्यङ्। परमेश्वर थमयूप्रे-प्रे टूङ् ख्यङ्, मेस्ये थमयू ङूजे मी क्यूक्क्य, मेस्ये परमेश्वर थमयूजे परमेश्वर क्यूत्देबे थमयूप्रे टूङ्क्य। 4 होर्दे परमेश्वरदे थमयूजे म्याने ख्यब म्यामू क्वाने फील्मीय, मेस्ये हैयाने सीब पर्दीस्ये त्वो, शोक् मेस्ये दु:खये क्यूस्स्ये त्वो। चेनेयलो ङीङ् पोयू मले-जेङ्क ख्यङ्।” 5 होर्दे सिंहासनने देन् छ्यानबदे ङैने यदे, “ले, ङैदे साप्ताकूरूने सर् चीक्क्य।” ङूदे येरेये यदे, “अम्ब पोयू लिख्दी, चेनेयलो अम्ब पोयू भर्पर्तेब मेस्ये सत्य ख्यङ्।” 6 ङूदे ङैने यदे, “जेम्से जङ्गदे। ङ अल्फा मेस्ये ओमेगा, सुरु मेस्ये अन्त ख्यङ्। ङैदे क्यू फैब मीयूने जीया पीनब क्यू मूरुम्दे होरेने थूङ्से पीन्क्य। 7 सूदे ट्याय हम्बदे अम्ब हक प्रेक्क्य, मेस्ये ङ थमयूजे परमेश्वर क्यूक्क्य, मेस्ये थमयू ङैजे च-चीमीयू क्यूक्क्य। 8 तर फैजङ्यू, विश्वास अन्चेबयू, ङ्येत्या क्यूरबयू, मी सेबयू, वेश्य काम चेबयू, ङा-थूक् चेबयू, मूर्ति पूजा चेबयू, मेस्ये लूच्च क्यमबयू क्वाने प्ल्याङ्नब मी प्रे गन्धकजे भोप्प्रोने छाबीय। अम्ब दोस्रो मृत्यू ख्यङ्। 9 होर्दे हम्ब पात्ता ङ्येजे सोरो फत्या सकस् ङ्यीदे सेम् फ्यानब पील ङ्यी टेलब स्वर्गदूतयू ङ्यी नङ्दे स्वर्गदूतत्या रदेबे ङैने येरे यदे, “ख, ङ नने थुमाजे मज, ङूजे पीर्म तम्मीय।” 10 आत्माने ङूदे ङैने केन् मेस्ये फेर गङ्त्या फ्याने कूदीदे, मेस्ये परमेश्वर टूङब ने स्वर्गदे मो तल्लीनब पवित्र सहर यरूशलेम ङैने तम्मीदे। 11 हम्ब सहरने परमेश्वरजे महिमा ख्य, सोरो कूम लू पर्तेब पत्थरयू, मेस्ये सीसप्र छालाला तङब स्फटीक मेस्ये बेल्लौरजेप्र ओथ्याङ्ब हम्ब सहरजे ख्य। 12 हम्ब सहरजे खूरीरी केन् मेस्ये फेर पङ्री थ्यायेब ख्य, मेस्ये हम्बने बाह्र ओटा ख्यो ख्य। हम्ब ख्योयूने स्वर्गदूतयू त्या-त्या सीन्त्री टून ख्य। मेस्ये इस्राएलजे बाह्र खलकजे मीन् हम्ब ख्योयूने लिख्दीये ख्य। 13 पूर्वतेले ख्यो सोम्, उत्तरतेले ख्यो सोम्, दक्षिणतेले ख्यो सोम् मेस्ये पश्चिमतेले ख्यो सोम् ख्य। 14 हम्ब सहरने ख्यब पङ्रीजे जा बाह्र ओटा ख्य। हम्ब जायू-फ्याने थुमाजे मूल स्यूस्स्यायू त्या-त्याजे मीन् लिख्दीये ख्य। 15 हम्ब सहर, हम्बजे ख्योयू, मेस्ये पङ्री नप्देजे लागि ङैप्रे क्यम्नब स्वर्गदूतजे लाने नाप्देब मर्जे टाँगो त्या ख्य। 16 हम्ब सहरजे पट्टी ङ्हीने बरेबर् ख्य। हम्बजे चौडाई मेस्ये फ्रेत्दे बरेबर् ख्य। ङूदे हम्ब टाँगोदे नपतीब हम्ब सहर हजार ङ्ही सैस्यी किलोमिटर ख्य। हम्ब सहरजे फ्रेत्दे, चौडाई मेस्ये तो-फेर बरेबर् ख्य। 17 स्वर्गदूतदे हम्बजे पङ्रीये नप्दीदे, मेस्ये मीदे चील्लीनब नाप अनुसार नप्दीब सोम्लङ्दे मिटर ङ ख्य। 18 हम्ब पङ्री बिल्लौर पत्थर्दे बन्तीयेब ख्य, होर्दे सहरब खेर्तीकब मर् ज्यदे बन्दीये ख्य मेस्ये हम्ब सफा सीसप्र छालाला ख्य। 19 हम्ब सहरजे जायू थर्-थर्जे मगो पर्तेब पत्थर्यूदे ज्य चीदे ख्य। हम्ब पात्ता खूम्जे जा बिल्लौरजे, दोस्रो नीरजे, तेस्रो हरीतजे, चौथो पन्नाजे, 20 पाचौँ आनिक्सजे, छैटौँ लालमणिजे, सातौँ पीतमणीजे, आठौँ बेरूजजे, नवौँ पुष्पराजजे, दसौँ लसुनेजे, एघारौँ नीलमणिजे, बाह्रौँ कटेलाजे ख्य। 21 हम्ब बाह्र ओटा ख्योयूब बाह्र मोतीजे ख्य। हम्ब ख्योयू मोती त्या-त्यादे बन्दीये ख्य। हम्ब सहरजे लम् खेर्तीकब ज्य मर्जे छालाला तङब सीसप्र ख्य। 22 ङैदे हम्ब सहरने प्रार्थना चेब मन्दिर त्याये अन्तङ्, चेनेयलो पात्ता केन् शक्ति ख्यब परमेश्वर मेस्ये थुमा रङ्सेब हम्ब सहरजे मन्दिर ख्यङ्। 23 हम्ब सहरने ओथ्याङ् चेजे लागि मीया मेस्ये लीनी अन्चैदी, चेनेयलो परमेश्वरजे महिमादेने हम्ब सहर ओथ्याङ् चे ख्यङ्। मेस्ये हम्ब सहरजे बत्तीब थुमा ख्यङ्। 24 हैयाजे ओथ्याङ्ने जात-जातजे मीयू तीप्र-छोप्र चीक्क्य। पृथ्वीने ख्यब मूरुम्यूदे रङ्से न-मीन् मेस्ये सीर्-सम्पत्तियू हैयाने रेक्क्य। 25 हम्ब सहरजे ख्योयू नोदे कलङ्बेये थास्ये त्वो, मेस्ये हैयाने कलङ्बेये मून् क्यूस्स्ये त्वो। 26 होर्दे थमयूदे जात-जातयूजे न-मीन, सिर्-सम्पत्ति, मेस्ये गेसेन् हम्ब सहर नङ्ने रेक्क्य। 27 तर थुमाजे जीयाजे किताबने मीन् लिख्दीयेबयू त्यामे होने क्योब प्रेक्क्य, सूजो अशुद्ध सेयू, ङ्येत्या काम फरबयू, लूच्च क्यमबयू कम्ब तर्तीप्देये हम्ब सहर नङ्ने क्योब प्रेस्स्ये त्वो। |
Ghale New Testament © Nepal Bible Society, 2011.
Nepal Bible Society