प्रकाश 20 - घले नयाँ करारहजार त्या वर्ष 1 होर्देङ्येदे स्वर्गदूत त्यादे लाने अतल कुण्डजे चापी मेस्ये सङ्लो केन् त्या टेल्देबे स्वर्गदे मो-तल्रब ङैदे तङ्दे। 2 स्वर्गदूतदे हम्ब अजिङ्गरने ङ्येप्दे मेस्ये हजार त्या वर्षसेमेजे लागि ख्यादेबे हीत्दे, हम्ब मीयूङ्मेस्येने ख्यब डम् ख्य हम्ब शैतान ख्यङ्। 3 ङूदे हम्बने अतल कुण्डने छाबीदे, होर्दे हम्ब अतल कुण्ड थाबीदे मेस्ये हैयाने छाप पूबीदे। ङूदे हजार त्या वर्ष अन्जेन्दासेमे जात-जातजे मीयू क्वानेने धोका अम्पीन्स्य यदेबे येरे स्योप्पीदे। होर्देङ्येदे तेदिनजे लागि ङूने क्याबे पर्दीय। 4 होर्दे ङैदे सिंहासनयू मेस्ये हम्ब फ्याने देन् छ्यानबयूने तङ्दे, थमयूने न्याय चेब हक पीने ख्य। होर्दे येशूजे गवाही मेस्ये परमेश्वरजे वचन प्रचार चीप्प ट चेकबयू, हम्ब रोला मेस्ये हम्बजे मूर्तिने पूजा अन्चेब मीयू, मेस्ये हम्ब रोलाजे छाप प्वेने मेस्ये लाने अम्प्वेब मीयूजे आत्मायूने ङैदे तङ्दे। थमयू फेरि सोम्बो क्यूत्दे, मेस्ये थमयूदे ख्रीष्टप्रे-प्रे हजार त्या वर्षसेमे राज्य चीत्दे। 5 सूजो सीयेबयूब हम्ब हजार त्या वर्ष अन्जेन्दासेमे सोम्बो अन्क्यूर्। सीयेब मीयू सोम्बो क्यूरब अम्ब पहिलो ख्यङ्। 6 पात्ता खूम् सोम्बो क्यूरबयूप्रे सामेल् क्यूरबयू असी प्रेबयू ख्यङ् मेस्ये पवित्र ख्यङ्। दोस्रो पोलोने क्यूरब मृत्यूजे शक्तिदे थमयूने चैत्याये चे अन्खू, तर थमयू परमेश्वरजे मेस्ये ख्रीष्टजे पूस्र्या क्यूत्देबे ख्रीष्टप्रे हजार त्या वर्षसेमे राज्य चीक्क्य। पात्ता ङ्येदे शैतान नाश क्यूरेब 7 हजार त्या बर्ष जेनमेस्ये हम्ब स्योप्येब नेदे शैतान क्यापीय, 8 मेस्ये ङू पृथ्वीजे का-मुलुकने ख्यब देश देशजे मीयूने धोका पीनने, या गोग मेस्ये मागोगने लडाइँजे लागि फूङ्चेने योङ्रीय। थमयू समुद्रजे पीस ताकीने कूम क्यूक्क्य। 9 पृथ्वीजे का-मुलुकने प्रदेबे थमयूदे परमेश्वरजे पवित्र मीयू टूङबनेजे ख्यूरीरीरी मेस्ये परमेश्वरदे प्रेम चेब सहरने घेर्दीदे, तर स्वर्गदे मी फूली तल्रदेबे थमयूने भस्सम् चीत्दे। 10 थमयूने धोका पीनब हम्ब शैतानने प्ल्याङ्नब गन्धकजे मीजे भोप्प्रोने छाबीदे, हम्ब रोला मेस्ये लूच्च अगमवक्ताये हम्ब नेने ख्य। थमयूदे हम्ब नेने नोमून् येतार्ने सकस् भोक्तीनीय। आखिरी न्याय 11 होर्दे कर केन् सिंहासन त्या फ्याने देन् छ्यानबने ङैदे तङ्दे। ङूजे खूम्दे पृथ्वी मेस्ये मो छ्योङ्गी, तर थमयूजे लागि ने केनेये अम्प्रे। 12 होर्दे सीयेब केन्-चीद क्वाने सिंहासनजे खूम्ने मेर्नब ङैदे तङ्दे, मेस्ये किताबयू ल्वादे। सूजो किताबये त्या ल्वादे। हम्ब किताब जीया प्रेब मीयूजे मीन् थायेब किताब ख्यङ्। हम्ब किताबने लिख्दीयेब थमयूजे काम अनुसार सीयेबयूजे न्याय क्यूत्दे। 13 समुद्रने सीयेबयू समुद्रदे ग्यङ् पीन्दे, होर्दे मृत्यू मेस्ये पातलदेये रङ्सेप्रे ख्यब सीयेब मीयूनेये ग्यङ् पीन्दे। थमयूजे रङ्से रङ्से काम अनुसार क्वाजेने न्याय क्यूत्दे। 14 मृत्यू मेस्ये पातलने प्ल्याङ्नब मी भोप्प्रोने छाबीदे। अम्ब प्ल्याङ्नब मी भोप्प्रोने छाबेब दोस्रो मृत्यू ख्यङ्। 15 जीया प्रेब मीयूजे मीन् थाब किताबने सू-सूजे मीन् लिख्दीयेब अम्प्रे, हम्बयूने प्ल्याङ्नब मी भोप्प्रोने छाबीदे। |
Ghale New Testament © Nepal Bible Society, 2011.
Nepal Bible Society