प्रकाश 2 - घले नयाँ करारएफिससजे मण्डली 1 एफिससजे मण्डलीजे दूतने अम्ब पो लिख्दी: रङ्सेजे स्येत लाने कर्चेन् ङ्यी टेब मेस्ये मर्दे बन्दीयेब साम्दान ङ्यीजे अन्द्रने प्रबदे अम्ब पोयू य-ख्यङ्। 2 नैजे कामयू, नदे चेब छेम्प्रे मेस्ये न-धेरेन् क्यून्नब ङैने था ख्यङ्, मेस्ये नदे दुष्ट मीयूजे विरोध चे ख्यङ् तर थमयू रङ्सेदेब ङी मूल स्यूस्स्या ख्यङ् यीय, तर मूल स्यूस्स्या दी, होर मीयूने जाँचदीदेबे थमयू लूच्च ख्यङ् यदेबे नमयूदे पत्त प्रेक्क ख्यङ् यब पो ङैने था ख्यङ्। 3 नमयूदे ङैजे मीन्जे लागि सकस्यू पर्तीरब धेरेन् क्यूत्देबे सैदीन ख्यङ्। होरक्यूल्ली नमयूदे विश्वास अन्क्याबे ख्यङ् यब पोये ङैने था ख्यङ्। 4 तर नैजे विरुद्धने ङैप्रे अम्ब पो ख्यङ्, पात्ता खूम् चीन्नब प्रेम नदे क्याबे ख्यङ्। 5 येरेक्यूत्देबे कोलासेमे नमयू खेर गीले ख्यङ्, हम्ब ह्वे ची, मेस्ये पश्चात्ताप चीत्देबे ल्वाख, होर्दे नदे खूम चेप्रने हम्ब काम फेरि ची। कादेये नदे पश्चात्ताप अन्चीत्देयलो ङ ने-ट्याने रदेबे नैजे सामदान हम्ब नेदे योम्बीय। 6 तर नमयूप्रे अम्ब ज्य पो ख्यङ्, ङैदे चेप्रने नमयूदेये निकोलाईटसयूजे कामने घीन चे-ख्यङ्। 7 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। सूदे ट्याय, स्वर्गने ख्यब जीया पीनब तङ्बोजे सी ङैदे हम्बयूने चस्ये पीन्क्य। स्मुर्नाजे मण्डली 8 होर्दे स्मुर्नाजे मण्डलीजे दूतने अम्ब पो लिख्दी: अम्ब पो पात्ता खूम् मेस्ये पात्ता ङ्येदे ख्यबदे य ख्यङ्, ङू सीये ख्य, मेस्ये फेरि सोम्बो क्यूत्दे। 9 नदे प्रेन्नब सकस्यू मेस्ये न दुख्प्रे ख्यङ् यब पोये ङैने था ख्यङ्, तर नब फ्योबोने ख्यङ्। ङैदे थमयूने स्ये ख्यङ्, थमयूदे रङ्सेने ङी यहूदीयू न-यीय, तर थमयू तम्दम् यहूदीयू दी। थमयूदे विरोध चेब पो ङैने था ख्यङ्। थमयू शैतान पूस्तेब सभा-कीम्जे मीयू ख्यङ्। 10 नै फ्याने रमल्नब सकस्यूप्रे अम्फलाची। ले, नमयूजे विश्वास जाँचतेने नमयू नङ्जे कोइ मीयूने शैतानदे कैदने चङमल्न ख्यङ्, मेस्ये नमयूने च्यूर्यासेमेत्या सकस् क्यूक्क्य। न सीब पर्तीलीने विश्वास चेब क्यूरो, मेस्ये ङैदे नने जीयाजे मुकुट पीन्क्य। 11 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। सूदे ट्याय, फेरि रब ङ्हीफे पोलोजे मृत्युदे ङूने चैत्याये हनी चीस्से त्वो। पर्गाममजे मण्डली 12 होर्दे पर्गाममजे मण्डलीजे दूतने अम्ब लिख्दी: पट्टी-ङ्हीने छ्यर धर ख्यब तरवार टेलबदे अम्ब पो य ख्यङ्, 13 कैयाने शैतान टूङब सिंहासन ख्यङ्, हैयानेने न टूङ ख्यङ् यदेबे ङैने था ख्यङ्। होरेक्यूल्ली नमयूदे ङैने विश्वास चीन्न ख्यङ्। ङैजे भरपर्तेब साक्षी एन्टिपास ख्य, शैतान टूङब नेने ङू सेक्कब सेमेनेये नमयू रङ्सेदे ङैफ्याने विश्वास चीन्नूदे। 14 तर नमयूजे विरोधने चत्या पोयू ङैप्रे ख्यङ्, चेनेयलो नमयूप्रे कोइ-कोइ येरमीयू ख्यङ्, बालामदे लोम्मेब पोयू थमयूदे मन्दे ख्यङ्। इस्राएलजे मीयूने पाप चीस्से पीनजे लागि मूर्तियूने चेर्दीयेब चसे चने मेस्ये वेश्य काम चेने बालामदे बालाकने लोम्मीदे। 15 येरप्रने नमयू टूङब नेने निकोलाइटसयूदे लोम्मेब पोयू मन्देब कोइ मीयूये ख्यङ्। 16 येरेक्यूत्देबे पश्चात्ताप ची, कादेये अन्चीत्देयलो ङ नमयू ट्याने छ्योटोने रीय, मेस्ये ङैजे ङूर्दे योङरब पार्च्यादे थमयूप्रे जीङ्क्य। 17 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। सूदे ट्याय, ङ ङूने नङ्सू हीतेब मन्न छीत्या स्यादेबे पीन्क्य, मेस्ये ङ ङूने सर् मीन् लिख्दीयेब पत्थर कर् त्या पीन्क्य, हम्ब प्रेब मीदेत्या स्येय सूजो सूदेये अन्स्ये। थिआटीराजे मण्डली 18 होर्दे थिआटीराजे मण्डलीजे दूतने अम्ब पो लिख्दी: अम्ब पो परमेश्वरजे चदे य ख्यङ्, ङूजे म्या मीजे उम्दप्र, ङूजे तोप् टेल्कीदीदेबे हीतेब चीरीप्र ख्यङ्। 19 नदे चेब काम, नैजे प्रेम, नैजे विश्वास, नैजे सेवा मेस्ये धेरेन् क्यूत्देबे सैदीनब पो ङैने था ख्यङ्। अम्ब कामयू नदे मालाङ् यली दीनी ङ्येदे थेप् ज्य चे ख्यङ्। 20 तर नैजे विरुद्धने ङैप्रे अम्ब पो ख्यङ्: ईजेबेल यब मदीदे चेब अन्ज्य काम नदे सैदीन ख्यङ्। ङू रङ्सेदे रङ्सेने अगमवाणी क्यमब मदी य ख्यङ्, अम्ब मदीदे ङैजे सेवा चेब मीयूने वेश्य काम चील्ली क्यूक्क्य, मूर्तियूने चेर्दीयेब चसे चली क्यूक्क्य यब पो लोम्मीदेबे उक्सीतीन ख्यङ्। 21 ङैदे हम्ब मदीने पश्चात्ताप चेब मौका पीन्दे, तर हम्ब मदीदे वेश्य काम क्यादेबे पश्चात्ताप चे अन्ङ्यीन्। 22 येरेक्यूत्देबे, ङ ङूने बिददे थला पर्तेब खर्ने छाबीय, मेस्ये हम्बप्रे वेश्य काम चेब मीयू रङ्सेदे चेब काम क्यादेबे पश्चात्ताप अन्चीत्दे यलो ङैदे हम्बयूने पात्ता केन् सकस् प्रेब नेने छाबीय। 23 ङैदे ङूजे च-चीमीयू क्वानेने सेक्क्य। मेस्ये मण्डलीयू क्वादेने था प्रेक्क्य, खोत्ताजे सेम् नङ्जे पो मेस्ये इच्छा स्ये ख्वब ङ, ङूने ख्यङ्, मेस्ये ङ नमयूजे काम अनुसार नमयू क्वानेने इनाम पीन्क्य। 24 तर ईजेबेलदे लोम्मेब अन्ज्य पोयू अम्मन्देब या कोइ मीदे यप्रने शैतानदे नङ्सू पोयू अनुसार जीया अन्चलाबे टूनब नम थिआटीराजे मीयूने ङ यीय, ङ नमयू फ्याने सूजो क्वी चैत्याये अन्कल्। 25 होरेक्यूल्लीने नमयूप्रे च ख्यङ्, हम्बने ङ अन्रदासेमे बोङ्बे चूङ्नू। 26 सूदे ट्याय, मेस्ये सूदे रङ्से जीया ख्यङ्दासेमे ङैजे कामयू चीन्नीय, ङैदे हम्बने जात-जातयू फ्याने हक चील्लीस्ये पीन्क्य। 27 मेस्ये जङ्जे पीर्गदे सजे तीयाँयू पर्बेप्र ङूदे थमयू फ्याने हक चील्लीय, केर्बे ङैनेये ङैजे पदे हक चील्लीस्ये पीन ख्यङ्। 28 ङ ङूने नप्जे कर्चेन् पीन्क्य। 29 सूजे त ख्वब न ख्यङ्, पवित्र आत्मादे मण्डलीयूने यब पो ङूदे चेलाबे ङ्यीन्स्य। |
Ghale New Testament © Nepal Bible Society, 2011.
Nepal Bible Society