प्रकाश 19 - घले नयाँ करारछुटकाराजे प्रू 1 होर्देङ्येदे स्वर्गने मी हुल केन् त्यादे बोङ्बे पारा प्वेब केदे येरे येनब ङैदे तदे, “हल्लेलूयाह! मुक्ति, महिमा मेस्ये शक्ति ङीन्जे परमेश्वरजेने ख्यङ्, 2 चेनेयलो ङूदे चेब न्याय सत्य मेस्ये ठीक ख्यङ्। रङ्सेजे वेश्य कामदे पृथ्वीजे मीयू क्वानेने नोङ्बेब हम्ब पात्ता केन् वेश्यने परमेश्वरदे दण्ड पीन ख्यङ्, मेस्ये परमेश्वरजे त्वो-त्वोमयू सेबजे खी फाक ख्यङ्।” 3 थमयूदे फेरि त्याफे के केन् योन्देबे यदे, “हल्लेलूयाह! हम्ब पात्ता केन् सहर मीदे भस्सम् क्यूरेब म्यूयूङ् येतार्ने तो प्रेनीय।” 4 होर्दे नूस्स्यूदे स्यी धर्म-गुरु मेस्ये हम्ब सोम्बो प्राणीयू स्यीदे पून्छ्यल क्यूत्देबे सिंहासनने टूनब परमेश्वरने येरे यदेबे स्यूव पीन्दे, “आमेन, हल्लेलूयाह!” 5 होर्दे सिंहासनदे येरे येनब के त्या तैरदे, “नम, परमेश्वरने फब केन् चीद, त्वो-त्वोमयू क्वादेने ङीन परमेश्वरजे सार्या ची।” 6 होर्देङ्येदे मी हुल केन् त्याजे के ङैदे तदे, होङ् बोङ्ब योङ्र आवाज मेस्ये सोरो बोङ्बे मू प्र्याङब आवाज ङैदे तदे, हम्ब आवाजदे येरे येन ख्य: “हल्लेलूयाह! चेनेयलो परमप्रभु ङीनजे पात्ता केन् शक्ति ख्यब परमेश्वरदे येतार्ने राज्य चीक्क्य। 7 ङीन सोरो सूगे मेस्ये आनन्द क्यूत्देबे ङूजे महिमा चीदे! चेनेयलो थुमाजे ङ्येन् चेब दिन फ्योर ख्यङ्, मेस्ये ङूजे पीर्मदे रङ्सेने तयार चे-ख्यङ्। 8 पीर्मने चकिलो मेस्ये सफा मल्मल्जे कोला ह्वेजे लागि पीन्दे।” चकिलो मल्मल्जे कोलाब परमेश्वरजे पवित्र मीयूजे धर्मी काम ख्यङ्। 9 होर्दे हम्ब स्वर्गदूतदे ङैने यदे, “अम्ब पो लिख्दी, थुमाजे ङ्येन्ने भात्यार् चजे लागि निम्तो प्रेबयूदे असी प्रेक्क्य।” ङूदे फेरि ङैने यदे, “अम्ब पो परमेश्वरजे सत्य वचनयू ख्यङ्।” 10 होर्दे ङूने स्यूव पीनजे लागि ङ ङूजे तोप्ने पून्छ्यल् क्यूत्दे। तर ङूदे ङैने यदे, “नदे येरे चे अन्क्यूर्। ङैये येशूजे गवाही पीनब, न मेस्ये नैजे अत अची च्योन्यूप्रने परमेश्वरजे त्वो त्यामे ख्यङ्। परमेश्वरने स्यूव पीन्! चेनेयलो येशूजे बारेने पीनब गवाही अगमवाणीजे आत्मा ख्यङ्।” त-कर् फ्याने टदेबे प्रब 11 स्वर्गजे ख्यो पूक्येब ङैदे तङ्दे मेस्ये हैयाने मी टदेबे प्रब त कर् त्या ख्य। हम्ब त-फ्याने टदेबे प्रबने “भर्पर्तेब” मेस्ये “सत्य” ख्यङ् यदेबे यीय। ङूदे ज्य न्याय चीत्देबे लडाइँ चीक्क्य। 12 ङूजे म्या मी-उम्दप्र ख्य, मेस्ये ङूजे टने कूम मूरुम्यूजे मुकुट ख्य। ङूजे ङ्वने येर मीन् त्या लिख्दीये ख्यङ्, ङूने त्यामे हम्ब था ख्य, सूजो सूनेये था त्वो। 13 काने पोम्येब कोला ङूदे होते ख्य, होर्दे ङूजे मीन्ब “परमेश्वरजे वचन” ख्य। 14 स्वर्गजे सिपाईयूदे कर् मेस्ये सफा मल्मल्जे कोला होत्देबे त-कर्यूने टदेबे ङूजे ङ्ये-ङ्ये गीलीदे। 15 जात-जातजे मीयूने ट्याला चेजे लागि ङूजे ङूर्दे छ्यरब पार्च्या त्या योङ्रीय, मेस्ये जङ्जे पीर्क चील्लीदेबे ङूदे थमयू फ्याने राज्य चीक्क्य। होर्दे क्वेने अङ्गुर योन्देबे खू योनप्रने पात्ता बोल्यो परमेश्वरजे छीजे क्वेने ङूदे थमयूने छेय। 16 ङूजे कोला मेस्ये सूग्ने “मूरुम्यूजे मूरुम् मेस्ये प्रभुयूजे प्रभु” यदेबे लिख्दीये ख्यङ्। 17 होर्दे स्वर्गदूत त्या मीयाने मेर्नब ङैदे तङ्दे। मूजे अन्द्रगूङ्ने स्यूनब ययू टक्कनेने ङूदे के केन् योन्देबे येरे यदे, “ख, परमेश्वरजे भात्यार् केन्ने फूङ् क्यूरे। 18 नमयूदे मूरुम्यूजे, कप्तानयूजे, बेस्से बोल्यो मीयूजे, होर्दे मी टदेबे प्रब तयूजे, तने टदेबे प्रबयूजे, मेस्ये त्वो-त्वोमयूजे, स्वतन्त्र मीयूजे, केन्-चीद मीयू क्वाजेने स्य चीय।” 19 होर्दे तने टदेबे प्रब मेस्ये ङूजे सिपाईयूजे विरोधने लडाइँ चेने हम्ब रोला, पृथ्वीजे मूरुम्यू मेस्ये ङूजे सिपाईयू फूङ् क्यून्नब ङैदे तङ्दे। 20 होर्दे हम्ब रोला जूङ्कदे, मेस्ये ङूप्रे-प्रेने ङूजे शक्तिदे हार्मन्देत्या काम चेब लूच्च अगमवक्तानेये जूङ्कदे। अम्ब हार्मन्देब काम तन्देबे हम्ब लूच्च अगमवक्तादेने हम्ब रोलाजे छाप प्वेब मेस्ये हम्बजे मूर्तिने पूजा चेबयूने धोका पीन ख्य। अम्ब ङ्ही सोम्बो ख्यङ्बने प्ल्याङ्नब गन्धकजे मी-भोप्प्रोने छापीदे। 21 होर्दे सूजो लम ख्यब मीयूब त-फ्याने टबजे ङूर्दे योङ्रब पार्च्यादे सेक्कदे, मेस्ये थमयूजे स्य ययू क्वादेने कलाबे चदे। |
Ghale New Testament © Nepal Bible Society, 2011.
Nepal Bible Society