प्रकाश 18 - घले नयाँ करारबेबिलोनजे पतन 1 होर्देङ्येदे केन् हक प्रेक्कब सूजो स्वर्गदूत त्या स्वर्गदे मो रेनब ङैदे तङ्दे। ङूजे सेर्दे पृथ्वीने ओथ्याङ् क्यूत्दे। 2 येरे यदेबे ङू बोङ्बे पारा पूत्दे, “पात्ता केन् सहर बेबिलोनजे पतन क्यूरी, अम्ब पात्ता केन् सहरब छेत्यू, अशुद्ध आत्मायू क्वाने, अशुद्ध मेस्ये ङ्येत्या ययू टूङब ने क्यूर ख्यङ्। 3 चेनेयलो जात जातजे मीयू क्वादेने हम्बदे चेब अशुद्ध वेश्य कामजे ची थूङ ख्यङ्, मेस्ये पृथ्वीने ख्यब मूरुम्यूदे ङूप्रे वेश्य काम चे ख्यङ्, होर्दे पृथ्वीने छोङ् चेब मीयूदे हम्ब बेबिलोनने क्यूरब मोज-मजादेने फ्योबो क्यूर प्रे ख्यङ्।” 4 होर्देङ्येदे स्वर्गदे येरे येनब सूजो के त्या ङैदे तदे: “ङैजे मीयू, हम्ब नेदे फीने योङ्ख, हम्ब नेदे फीने अन्-योङ्रदेयलो ङूजे पापयूप्रे नमयूये सामेल् क्यूक्क्य, मेस्ये ङूदे प्रेब दण्ड नमयूदेये भोक्ते पर्दीय, 5 चेनेयलो ङूजे पापयू स्वर्गसेमेने म्यूर् क्यूरे ख्यङ्, मेस्ये परमेश्वरदे ङूजे दुष्ट कामयूने ह्वे चे ख्यङ्। 6 ङूदे सूजो मीयूने च चीत्दे होरप्रने ङूने ची। ङूदे चेब अन्ज्य कामजे दोब्बर ङूने ल्वाबी। होर्दे ङूदे पीलने च पूते ख्य हम्बजे दोब्बर थेप् कडा ङूजे पीलने पूमी। 7 ङूदे रङ्सेने कन्छ्वा केन् चीत्दे, मेस्ये मोज-मजा आनन्द चीत्दे, हन्छ्वाने सकस् मेस्ये शोक् ङूने पीन्, चेनेयलो ङूदे सेम्ने मन ख्यङ्, ‘ङ केन् मूरूम् मदी क्यूत्देबे टून ख्यङ्, ङ प्ल्यङ् सीयेब मदी दी, ङैदे कलङ्बेये शोक् चे अम्पर्दी।’ 8 ‘येरेक्यूत्देबे तीयानेने सीब पर्तेब, शोक् चे पर्तेब मेस्ये अनिकाल क्यूरब सोरो फत्या सकस्यू ङू फ्याने रीय। मेस्ये प्ल्याङ्नब मीदे ङूने भस्सम् चीक्कीय, चेनेयलो ङूजे न्याय चेब परमप्रभु परमेश्वर शक्तिशाली ख्यङ्।” 9 ङूप्रे वेश्य काम चेबयू मेस्ये मोज-मजाने टूङब पृथ्वीजे मूरुम्यूदे हम्ब सहर मीदे भस्सम् चीप्पेब म्यूयूङ् तङ्देबे हम्बजे लागि ङूय मेस्ये अन्सूग्देबे बीगन फाय। 10 हम्बदे प्रेब दण्ड तङ्देबे थमयू फदेबे चीन्तङ्ने मेर्देबे येरे यीय, “होमाइ! होमाइ! पात्ता केन् सहर, न शक्तिशाली बेबिलोन! खात्याने नदे प्रे-पर्तेब दण्ड नेफ्याने पर्दीरदे।” 11 पृथ्वीने छोङ् चेबयू हम्ब सहरजे लागि ङूय मेस्ये अन्सूग्देबे बीगन फाय, चेनेयलो सूदेये थमयूजे छोङ्जे सेयू फेरि कलङ्बेये कीन्स्ये त्वो, 12 सूदेये थमयूजे मर्, चाँदी, रत्न, मोती मेस्ये मल्मल्जे कोलायू, बैजनी कोलायू, रेसम्जे कोला मेस्ये चकिलो मल्लम् रङ्जे कोलायू, मेस्ये साप्ता किसिमजे लेमत्या बस् रब स्यङ्, साप्ता किसिमजे हात्तीजे दाह्रादे बन्देब सेयू, मेस्ये कूम लू पर्देब स्यङ्जे, चीरीजे, जङ्जे मेस्ये लूङ्गार्जे सेयू कीन्से त्वो, 13 मेस्ये लेपेछ, मसला, स्यूक्प, बस् रब मूर्गू, धूप कर्, ची, मूर्गू, ता-यूङ्, ह्व, कीत-म्हीयू, स्वान्यू, मी-टब तयू, रथयू, त्वो-त्वोमयू मेस्ये मीयूये कीन्स्ये त्वो। 14 थमयूदे यीय, “बेबिलोन नैजे सेम्दे मेब ज्य सेयू नैट्यादे योङ्ये ख्यङ्। सीर्-सम्पत्ति मेस्ये मान् गेसेन् क्वाने नदे मल्क ख्यङ्। जेम्से हम्ब फेरि कलङ्बेये प्रेस्स्ये त्वो।” 15 अम्ब सेयूजे छोङ् चेब मीयूदे हम्ब केन् सहरने छोङ् चीत्देबे फ्योबो क्यूर ख्य, हम्ब सहर फ्याने सकस् पर्ती रब थमयू फदेबे चीन्तङ्ने मेर्दे, मेस्ये येरे यदेबे थमयूदे के केन् योन्देबे ङूय मेस्ये रप् चीत्देबे, 16 “होमाइ! होमाइ! हम्ब पात्ता केन् सहर, हम्बदे मल्मल्जे कोला, बैजनी मेस्ये चकिलो मल्लम् कोला होत्देबे मर्, रत्न मेस्ये मोतीयूदे सोरो ज्य क्यून्न ख्य। 17 येर कूम सीर्-सम्पत्ति खात्याने नाश क्यूरे ख्यङ्।” क्यू जहाजजे कप्तानयू, क्यू जहाजने टब मीयू, क्यू जहाज चील्लेब मीयू क्वाने मेस्ये समुद्रने छोङ् चेब मीयूये चीन्तङ्ने मेर्दे, 18 मेस्ये हम्ब पात्ता केन् सहर मीदे भस्सम् क्यूरेब म्यूयूङ् तङ्देबे येरे पारा पूत्दे, “हम्ब पात्ता केन् सहरप्र सूजो कम्ब सहर ख्यङ् स्व?” 19 होर्दे थमयूदे रङ्से-रङ्से टने धुलो पूत्देबे ङूये ङूये मेस्ये अन्सूग्देबे बीगन फाये-फाये येरे पारा पूत्दे, “होमाइ! होमाइ! हम्ब पात्ता केन् सहर, हैयाजे समुद्रने क्यू जहाज ख्यब मीयू क्वाने हम्ब सहरजे सिर्-सम्पत्तिदे फ्योबो क्यूरे ख्य। हम्ब खात्याने नाश क्यूरे ख्यङ्। 20 स्वर्गने टूङबयू क्वाने सूग्, चेनेयलो परमेश्वरदे हम्ब सहरजे नाश चे ख्यङ्! परमेश्वरजे पवित्र मीयू, मूल स्यूस्स्यायू मेस्ये अगमवक्तायू, नमयू फ्याने चेब अन्-न्यायजे लागि परमेश्वरदे ङूने दण्ड पीन ख्यङ्।” 21 होर्दे बेस्से शक्ति ख्यब स्वर्गदूत त्यादे थ्वाच्ये रान्दाप्र लूङ्त्या तो प्लेत्दे, मेस्ये समुद्रने येरे यदेबे छापीदे, “येर्बेने पात्ता केन् सहर बेबिलोन बेस्से बोङ्बे छाबीय, मेस्ये हम्ब सहर फेरि कलङ्बेये तङ प्रेस्स्ये त्वो। 22 बीणा तपयूजे, प्रू प्वेयूजे, मूरली तपयूजे, मेस्ये धूङ्कूर् तपयू क्वाजे के बेबिलोनने कलङ्बेये तस्ये त्वो। मेस्ये सीप ख्यब मीयू कलङ्बेये नेप्रे क्यूस्स्ये त्वो, मेस्ये रान्दा थाब के कलङ्बेये तस्ये त्वो। 23 नैजे छोङ् चेब मीयू पृथ्वीजे केन्-केन् मीयू ख्य, मेस्ये नैजे ङा-थूक्दे जात-जातजे मीयूने ठग्दीक ख्य होरेक्यूत्देबे बेबिलोनने बत्तीजे ओथ्याङ् फेरि कलङ्बेये क्यूस्स्ये त्वो, होर्दे दुलहा मेस्ये पीर्-मजे सूगब के कलङ्बेये तस्ये त्वो। 24 बेबिलोनदे दण्ड प्रे ख्यङ्, चेनेयलो अगमवक्तायू, परमेश्वरजे पवित्र मीयू मेस्ये पृथ्वीने सेक्कब मीयू क्वाजे का हम्ब सहरजे लम्यू भरीने ख्य।” |
Ghale New Testament © Nepal Bible Society, 2011.
Nepal Bible Society