प्रकाश 17 - घले नयाँ करारमदी मेस्ये रोला 1 हम्ब पील ङ्यी टेलब स्वर्गदूतयू ङ्यी नङ्ने स्वर्गदूत त्या ङैट्याने रदेबे ङैने यदे, “अन्छो ख, समुद्रजे क्यू फ्याने टूनब अन्ज्य न-मीन् चील्लेब हम्ब वेश्य मदीने परमेश्वरदे केरे दण्ड पीन्क्य, हम्ब ङ नने तम्मीय। 2 पृथ्वीजे मूरुम्यूदे ङूप्रे वेश्य काम चे ख्यङ्, मेस्ये हम्ब मदीदे वेश्य कामजे ची थूङ्से पीन्देबे पृथ्वीने ख्यब मीयूने स्योला चे ख्यङ्।” 3 होर्दे आत्माने हम्ब स्वर्गदूतदे ङैने प्लेत्देबे चैये अम्फेब चनमन क्यून्नब नेने कूदीदे। होयाने ट ङ्यी मेस्ये रूक् च्यू ख्यब परमेश्वरजे न प्वेब मीनयूदे फ्यानब चकिलो मल्लम रङ्जे रोला फ्याने टूनब मदी त्या ङैदे तङ्दे। 4 हम्ब मदीदे बैजनी मेस्ये चकिलो मल्लम् कोला ह्वे ख्य, मर्, बेस्से मगो पर्तेब रत्न मेस्ये मोतीयू ङूदे ह्वोदे ख्य। मेस्ये ङ्येत्या सेयू, या ङूदे चेब वेश्य कामजे अशुद्ध थोकदे फ्यानब मर्जे पील त्या ङूदे लाने टेल्न ख्य। 5 ङूजे प्वेने अर्थ क्व-अङ्ख्वब मीन् त्या लिख्दीये ख्य: “पृथ्वीने ख्यब वेश्य मदीयूजे मेस्ये ङ्येत्या सेयूजे म पात्ता केन् बेबिलोन।” 6 होर्दे परमेश्वरजे पवित्र मीयूजे का मेस्ये येशूजे मीन्ने सेक्कब मीयूजे का थूङ्देबे हम्ब मदी स्योनब ङैदे तङ्दे। हम्ब मदी तङ्देबे ङ सोरो हार्मन्दीकदे। 7 हन्छ्वाब हम्ब स्वर्गदूतदे ङैने यदे, “न चेने हार्मन्दे? हम्ब मदी मेस्ये ङूने प्लेब ट ङ्यी मेस्ये रूक् च्यू ख्यब रोलाजे क्व-अङ्ख्वब अर्थ ङ नने स्योक्क्य। 8 नदे तङब हम्ब रोला मीयूङ् त्याफे ख्य, तर जेम्सेब हम्ब रोला त्वो, जेम्से येतार्ने नाश क्यूप्पजे लागि हम्ब रोला अतल कुण्डदे तो-फीने योङ्र मल्न ख्यङ्। कलङ्बेये अन्जेनब जीया प्रेबयूजे मीन् लिख्दीयेब किताबने संसारजे सृष्टि क्यूरयली खूम्मेस्येने मीन् अन्लीख्दीयेब मीयूदे हम्ब रोलाने तङ्देबे हार्मन्दीय, चेनेयलो हम्ब मीयूङ् त्याफे ख्य मेस्ये हम्ब जेम्से त्वो, तर फेरि ङ्येदे त्याफे योङ्रीय। 9 “अम्ब क्वजे लागि बुद्धि चैतीय: हम्ब ट ङ्यीब गङ्यू ङ्यी ख्यङ्, हम्ब गङ्यू फ्याने हम्ब मदी टूङ ख्यङ्। हम्ब ट ङ्यीयूब मूरुम् ङ्यीयूये ख्यङ्। 10 अम्ब मूरुम् ङ्यी नङ्ने मूरुम् ङब सीये जेङ्क ख्यङ्, त्याब मूरुम्ने क्यून्न ख्यङ्, मेस्ये सूजो त्याब अझ अन्तङ्र ख्यङ्। ङू रमेस्ये खात्यात्या मूरूम् क्यूत्देबे टूङ पर्तीय। 11 हम्ब रोला, मीयूङ् त्याफे ख्य, तर जेम्सेब त्वो, हम्बब पलो येत्जे मूरुम् ख्यङ्। हम्ब मूरुम्यू ङ्यी नङ्जे मूरुम् त्या ख्यङ्, तर हम्बजे नाश क्यूप्पीय। 12 “नदे तङब हम्ब रूक् च्यूब मूरुम्यू च्यू ख्यङ्, थमयूदे चूजोसेमे मूरुम् क्यूत्देबे हुकुम चील्ले अम्प्रे ख्यङ्। तर थमयूदे हम्ब रोलाप्रे तेदिनत्या मूरुम् क्यूत्देबे हुकुम चील्ले प्रेक्क्य। 13 थमयूदे रङ्सेजे शक्ति मेस्ये हक हम्ब रोलाने सूम्देबेजे लागि थमयू क्वाने सेम् त्या क्यूक्क्य। 14 थमयूदे थुमाजे विरुद्धने जीङ्क्य, मेस्ये थुमादे थमयू फ्याने ट्याय, चेनेयलो ङू प्रभुयूजे प्रभु मेस्ये मूरुम्यूजे मूरुम् ख्यङ्। ङूप्रे ख्यबयू प्रभुदे क्वब, सेलब मेस्ये भर्पर्ते ख्वबयू ख्यङ्।” 15 हम्ब स्वर्गदूतदे ङैने यदे, “नदे तङब हम्ब क्यूयूब मीयू, मीयूजे हुल, जात जातयू मेस्ये केयू ख्यङ्, हैयाने हम्ब वेश्य मदी टून ख्यङ्, 16 होर्दे नदे तङब रूक् च्यू मेस्ये हम्ब रोलादे हम्ब वेश्य मदीने घिन चीक्क्य, मेस्ये ङूजे साप्ताने लेन्देबे च्याङ्ली चीप्पीय, मेस्ये ङूजे स्य चीय होर्दे मीने फूम्बीदेबे ङूने भस्सम् चीप्पीय। 17 चेनेयलो परमेश्वरजे वचन पूरा अन्क्यूत्दासेमे सेम् त्या क्यूत्देबे थमयूदे हुकुम चील्लेब रङ्से शक्ति हम्ब रोलाने पीन्देबे परमेश्वरजे इच्छा पूरा चेने परमेश्वरदे थमयूजे सेम्ने येर पो पूमीदे! 18 नदे तङब हम्ब मदीब पृथ्वीने ख्यब मूरुम्यू फ्याने हुकुम चील्लेब हम्ब पात्ता केन् सहर ख्यङ्। |
Ghale New Testament © Nepal Bible Society, 2011.
Nepal Bible Society