प्रकाश 16 - घले नयाँ करारपरमेश्वरजे छीदे फ्यायेब पील ङ्यी 1 होर्दे मन्दिरजे नङ्दे योङ्रब के केन् त्यादे हम्ब स्वर्गदूतयू ङ्यीने येरे येनब ङैदे तदे: “नमयू प्रदेबे परमेश्वरजे छीदे फ्यानब पील ङ्यी पृथ्वीने फैम्पी।” 2 होर्दे पहिलो स्वर्गदूत गीलीदेबे ङूदे टेल्नब पील पृथ्वीने फैम्पीदे, मेस्ये अम्बदे चीत्देबे हम्ब रोलाजे छाप ख्यब मीयू, मेस्ये हम्ब रोलाजे मूर्तिने पूस्तेब मीयूने सोरो नब ङ्येत्या मयू योङ्रदे। 3 दोस्रो पोलोजे स्वर्गदूतदे रङ्सेप्रे टेल्नब पील समुद्रने फैम्पीदे, मेस्ये हम्ब समुद्रजे क्यू सीयेब मीजे काप्र क्यूत्दे। होर्दे समुद्रने ख्यब सोम्बो प्राणीयू क्वाने सीइ। 4 तेस्रो पोलोजे स्वर्गदूतदे रङ्सेप्रे टेल्नब पील क्यू होङ्यूने मेस्ये क्यू मूरुम्यूने फैम्पीदे, मेस्ये हम्ब क्यू क्वाने का क्यूरी। 5 होर्दे क्यूजे जिम्मा प्रेब स्वर्गदूतदे येरे येनब ङैदे तदे, “नदे न्याय चीप्प ठीक न्याय चे ख्यङ्, पवित्र परमेश्वर न खूम्ये ख्य मेस्ये चूजोये ख्यङ्। चेनेयलो येर्बेने नदे न्याय चे ख्यङ्। 6 चेनेयलो थमयूदे परमेश्वरजे पवित्र मीयूने मेस्ये अगमवक्तायूने सेक्क ख्यङ्, मेस्ये नदे थमयूने का थूङ्से पीन ख्यङ्। हम्बजे दण्ड थमयूदे प्रेने पर्दे ख्यङ्।” 7 होर्दे “परमप्रभु परमेश्वर पात्ता केन् ख्यङ्, नदे चेब न्याय ठीक, मेस्ये सत्य ख्यङ्।” यब के त्या चाक्क्यादे योङ्रब ङैदे तदे। 8 होर्देङ्येदे स्यीप्फे पोलोजे स्वर्गदूतदे रङ्सेप्रे टेल्नब पील मीयाफ्याने फैम्पीदे, मेस्ये सोरो ठ्वब रप्दे मीयूने ठोसे पीनब शक्ति मीयाने पीन्दे। 9 मीयूने सोरो ठ्वब मीयाजे रप्दे ल्याकदे, मेस्ये हम्ब सोरो फत्या सकस्यू फ्याने हक ख्यब परमेश्वरजे मीन्जे थमयूदे न पूत्दे। तर थमयूदे पश्चात्ताप चे अन्ङ्यीन् मेस्ये परमेश्वरने महिमा पीन अन्ङ्यीन्। 10 होर्दे पालो ङजे स्वर्गदूतदे रङ्सेप्रे टेल्नब पील हम्ब रोला टूङब सिंहसानने फैम्पीदे, होर्दे हम्ब रोलाजे राज्यने मून्दूङ् क्यूरी। मेस्ये सोरो सकस् प्रेत्देबे थमयूदे रङ्से रङ्से ली फीने योन्देबे ट्यादे। 11 थमयूने सोरो सकस् मेस्ये सोरो नब मयू रदेबे स्वर्गने ख्यब परमेश्वरने थमयूदे ले तप्दे। तर थमयू रङ्सेदे चीक्कब अन्ज्य काम क्यादेबे पश्चात्ताप चे अन्ङ्यीन्। 12 होर्दे पलो र्वाजे स्वर्गदूतदे रङ्सेप्रे टेल्नब पील पात्ता केन् होङ् यूफ्रेटीसने फैम्पीदे, मेस्ये होङ्जे क्यू ताई मेस्ये पूर्बदे रब मूरुम्यूजे लागि लम् तयार क्यूत्दे। 13 होर्दे अजिङ्गरजे ङूरदे, हम्ब रोलाजे ङूर्दे मेस्ये लूच्च अगमवक्ताजे ङूर्दे, पैबयूप्र ङ्येत्या आत्मायू सोम् योङ्रीनब ङैदे तङ्दे। 14 अम्बयू हार्मन्देब च्यूनू तनब दुष्ट आत्मायू ख्यङ्। संसारजे का-मुलुकने ख्यब मूरुम्यूने त्वने अम्बयू प्रीय, मेस्ये पात्ता केन् शक्ति ख्यब परमेश्वरदे न्याय चेब केन् दिनने परमेश्वरप्रे लडाइँ चेने थमयूदे मूरुम्यूने फूङ् पूक्क्य। 15 “ले, ङ खूमान् रप्रने सूदेये था अम्प्रेल्लाबे रीय, सू होस्स्यार क्यूत्देबे टूनीय मेस्ये रङ्से ह्वेब कोला छ्योत्देबे येन्नीय ङूदे असी प्रेक्क्य। होरेअन्क्यूल्लो ङू च्यङ्ली प्रीय मेस्ये ङू त्वा पर्दीय।” 16 मेस्ये हिब्रू केने आर-मागेड्डोन यब नेने हम्ब आत्मायूदे मूरुम्यू फूङ् पूत्दे। 17 होर्दे पलो ङ्यीजे स्वर्गदूतदे रङ्सेप्रे टेल्नब पील उन्दूफ्याने फैम्पीदे, मेस्ये मन्दिरजे सिंहासनदे येरे यब के केन् त्या योङ्रदे “जेम्से जङ्गदे।” 18 होर्दे क्यूलीङ् छाल् छाल् क्यूत्दे, आवाजयू मेस्ये मू-गर्जेदेब आवाजयू योङ्रदे, मेस्ये सोरो फत्या केन् सूङ्गू गीली। हम्ब सूङ्गू येर फत्या केन् ख्य, पृथ्वीने मीयूजे सृष्टि क्यूत्दे-छो कलङ्बेये येर केन् सूङ्गू अन्र ख्य। 19 होर्दे हम्ब पात्ता केन् सहर भा सोम् क्यूत्देबे स्यायी, मेस्ये देश-देश सहरयू टक्कने हूली मेस्ये नाश क्यूरी। परमेश्वरने पात्ता केन् बेबिलोन ह्वेरदे, मेस्ये ङूदे रङ्सेजे सोरो फत्या छीदे चीदे फ्यायेब पील हम्बने थूङ्से पीन्दे। 20 टापूयू क्वाने मली मेस्ये गङ्यू क्वाने सू-मली क्यूरी। 21 होर्दे ङ्यील्लङ् ङ्यील्लङ् किलो क्यूरब सोरो फत्या केन् केन् सोर्बयू मूदे मो-मीयू फ्याने तल्रदे, मेस्ये सोर्बदे सोरो फत्या सकस्यू पीन्देबे मीयूदे परमेश्वरने ले तप्दे, चेनेयलो अम्ब सकस् सोरोने फत्या ख्य। |
Ghale New Testament © Nepal Bible Society, 2011.
Nepal Bible Society