प्रकाश 14 - घले नयाँ करारथुमा मेस्ये लाख त्या ङ्यील्लङ्दे हजार स्यी 1 होर्दे ङैदे लेप्प सियोन गङ्फ्याने थुमा मेर्नब तङ्दे। हैयाने ङूप्रे लाख त्या ङ्यील्लङ्दे हजार स्यी मी ख्य, थमयूजे प्वेने थुमाजे मीन् मेस्ये ङूजे पजे मीन् लिख्दीये ख्य। 2 होर्दे होङ् बोङ बीलने योङब केप्र मेस्ये मू-प्र्याङ्ब योङ केप्रने, स्वर्गदे के त्या योङ्रब ङैदे तदे। ङैदे तब हम्ब के वीणा तपब मीयूदे तप्नब बीणाजे केप्र ख्य। 3 सिंहासान मेस्ये हम्ब सोम्बो प्राणीयू स्यीजे, मेस्ये धर्म-गुरुयू क्वाजे खूम्ने थमयूदे प्रू सर् त्या पून्न ख्य। पृथ्वीने ख्यब बीलने लू फादेबे छूर्तीरेब लाख त्या ङ्यील्लङ्दे हजार स्यी मीयूदेत्या हम्ब प्रू था ख्व ख्य। सूजो सूदेये हम्ब प्रू था अङ्खू। 4 थमयू मदीप्रे लस्पस् अन्-क्यूक्कब ख्य, मेस्ये थमयूदे रङ्सेने चोखो ये ख्य। थुमा केने-केने प्रीय होने होने ङू ङ्ये-ङ्ये प्रबयूब थमयू ख्य। परमेश्वर मेस्ये थुमाजे लागि पात्ता खूम् चेर्तेब फलप्रने मीयूजे अन्द्रदे थमयूने लू-फादेबे छूर्तीरे ख्य। 5 थमयूजे ङूर्दे लूच्च पो क्यमब कलङ्बेये अन्त, थमयूजे चैये दोष त्वो। स्वर्गदूतयू सोम् 6 होर्दे मूजे अन्द्रने सूजो स्वर्गदूत स्यूम्बीनब ङैदे तङ्दे। पृथ्वीने ख्यब जात जातजे मीयू, खलकयू, केयू मेस्ये मीयू क्वानेने स्य्वेजे लागि कलङ्बेये अन्जेनब सूगब खबर हम्ब स्वर्गदूतप्रे ख्य। 7 होर्दे के केन् योन्देबे ङूदे यदे, “परमेश्वरने गेसेन् ची, ङूने महिमा पीन्, चेनेयलो परमेश्वरदे न्याय चेब बील फ्योर ख्यङ्। स्वर्ग, पृथ्वी, समुद्र मेस्ये क्यूजे मूरुम्यू बन्देबने स्यूव पीन्।” 8 होर्दे सूजो स्वर्गदूत त्या, या दोस्रो स्वर्गदूतब येरे यदेबे ङ्ये-ङ्ये गीली, “पतन क्यूरी! जात जातजे मीयूने रङ्सेदे चेब वेश्य कामजे ची थूङ्से पीनब सोरो केन् बेबिलोन सहरजे पतन क्यूरी।” 9 होर्देङ्येदे तेस्रो स्वर्गदूतदे के केन् योन्देबे थमयूजे ङ्ये-ङ्ये येरे यदेबे गीली, “कादेये कोइ मीदे हम्ब रोला मेस्ये ङूजे मूर्तिने पूजा चीत्देबे प्वेने या लाने हम्ब रोलाजे छाप पूत्दे यलो, 10 ङूदेये परमेश्वरजे छीजे पीलने चैये अन्च्यूम्लाबे तयार चीदेबे परमेश्वरजे छीजे कडा ची थूङ्क्य, होर्दे पवित्र स्वर्गदूतयू मेस्ये थुमाजे खूम्ने प्ल्याङ्नब मी मेस्ये गन्धकने सकस् पीन्क्य। 11 हैयाने थमयूदे प्रेब सकस्जे म्यूयूङ् येतार्ने तो प्रेनीय। अम्ब सकस् प्रेब मीयू हम्ब ख्यङ्। थमयूदे हम्ब रोला मेस्ये मूर्तिजे पूजा चीत्देबे हम्ब रोलाजे मीन्ने ख्यब छाप पूक्क्य। थमयूदे नो-मून कलङ्बेये आनन्द टूङ प्रेस्स्ये त्वो। 12 परमेश्वरजे आज्ञायू मन्देब मेस्ये येशूने विश्वास चेब परमेश्वरजे पवित्र मीयूदे धेरेन् क्यूत्देबे टूङ पर्दीय यब पो अम्ब ख्यङ्। 13 होर्दे स्वर्गदे रब येर के त्या ङैदे तदे, “अम्ब लिख्दी: जेम्सेमेस्ये प्रभुने विश्वास चीत्देबे सीबब मीयूदे असी प्रेक्क्य।” पवित्र आत्मादे य ख्यङ्, “अँ, थमयूदे रङ्से रङ्सेजे छेम्प्रेदे सम्च प्रेक्क्य, चेनेयलो थमयूदे चेब काम थमयूप्रे-प्रेने प्रीय।” पृथ्वीजे बली तोलब बील 14 होर्दे ङैदे लेप्प मूक्प कर् फ्याने मीजे चप्र त्या टूनब तङ्दे। ङूजे टने मर्जे मुकुट कूये ख्य मेस्ये लाने छ्यरब कोरे त्या ख्य। 15 होर्दे सूजो स्वर्गदूत त्या मन्दिर नङ्दे फीने योङ्रदे, मेस्ये के केन् योन्देबे हम्ब मूक्प फ्याने टूनबने यदे, “नैजे कोरे टेल्देबे बली खैन्, चेनेयलो बली तोल बील क्यूरे ख्यङ्, मेस्ये पृथ्वीजे बली क्वाने ताये ख्यङ्।” 16 येरे मूक्प फ्याने टूङबदे पृथ्वी फ्याने रङ्से कोरे चील्लीदे, होर्दे पृथ्वीजे बली खैन्दे। 17 होर्दे स्वर्गने ख्यब मन्दिर नङ्दे सूजो स्वर्गदूत त्या फीने योङ्रदे। ङूप्रेये छ्यरब कोरे त्या ख्य। 18 होर्देङ्येदे प्ल्याङब-मीफ्याने हक प्रेब सूजो स्वर्गदूत त्या चाक्क्यदे योङ्रदे। होर्दे ङूदे के केन् योन्देबे हम्ब छ्यरब कोरे टेलब स्वर्गदूतने यदे, “हम्ब नैजे छ्यरब कोरे चील्लीदेबे, पृथ्वीने गूर्-गूर् लोनब अङ्गुरने चदेबे फूङ् ची, चेनेयलो पृथ्वीजे अङ्गुरयू क्वाने ताये ख्यङ्।” 19 हम्ब स्वर्गदूतदे पृथ्वीने रङ्से कोरे चील्लीदे, मेस्ये पृथ्वीजे अङ्गुर चदेबे फूङ् पूत्दे, मेस्ये अङ्गुर चोरब क्वेप्र परमेश्वरजे छीजे क्वे केन् नङ्ने छाबीदे। 20 सहरजे फीने अङ्गुर खू चोरब क्वेने हम्ब अङ्गुर चोर्दे, मेस्ये हम्ब क्वे नङ्दे का योङ्रदे। हम्ब काजे छोब मी टदेबे प्रब तजे लगामसेमेप्र मो-गहिरो क्यूत्देबे सै-सोम् किलोमिटरला चीन्तङ्सेमे फ्याइदेबे गीली। |
Ghale New Testament © Nepal Bible Society, 2011.
Nepal Bible Society