प्रकाश 13 - घले नयाँ करारसमुद्रदे योङ्रब रोला 1 समुद्रदे रोला त्या योङ्रीनब ङैदे तङ्दे, हम्बजे रूक् च्यू मेस्ये ट ङ्यी ख्य। होर्दे हम्ब रूक्यू क्वानेने मुकुट त्या त्या ख्य, मेस्ये हम्बजे टयू क्वानेने परमेश्वरजे न-प्वेब मीन् ख्य। 2 हम्ब ङैदे तङब रोला चितुवाप्र ख्य, हम्बजे तोप्यू ओम्जेप्र ख्य। मेस्ये हम्बजे ङूर् डेन्याजेप्र ख्य। हम्ब अजिङ्गरदे रङ्सेजे शक्ति, सिंहसान, मेस्ये केन् हक हम्ब रोलाने पीन्दे। 3 हम्ब रोलाजे ट त्याने सीब ख्वब सोरो केन् म पूक्कप्र तङ ख्य, तर हम्बजे म तम् क्यूरी। होर्दे संसारजे मीयू क्वाने हार्मन्दीदेबे हम्ब रोलाजे ङ्येङ्ये गीली। 4 मीयूदे हम्ब अजिङ्गरजे पूजा चे ख्य, चेनेयलो ङूदे रङ्सेजे हक हम्ब रोलाने पीन ख्य। थमयूदे येरे यदेबे हम्ब रोलाजे पूजा चीत्दे, “अम्ब रोलाप्र सूजो सू ख्यङ् स्व? ङूजे विरुद्धने सू जीङ खूइय?” 5 होर्दे केन् त्वेब मेस्ये परमेश्वरजे न-प्वेब पोयू क्यमब ङूर् ङूने पीन्दे। होर्दे ङूने ङ्यील्लङ्दे ल-ङ्हीसेमे हक चील्लीस्ये पीन्दे। 6 परमेश्वरजे विरुद्धने न-प्वेने, ङूजे मीन्, ङू टूङब ने, मेस्ये स्वर्गने टूङबयू क्वाजे न-प्वेजे लागि हम्बदे रङ्से ङूर् पूक्दे। 7 होर्दे परमेश्वरजे पवित्र मीयूप्रे जीङ्देबे थमयू फ्याने ङू ट्यासे पीन्दे। ङूने खलकयू, मीयू, केयू, जात जातयू क्वा फ्यानेने हक चील्लीस्ये पीन्दे। 8 कलङ्बेये अन्जेनब जीया प्रेबयूजे मीन् लिख्दीयेब किताबने संसारजे सृष्टि क्यूरयली खूम्मेस्येने मीन् अन्लीख्दीयेब मीयू क्वादेने हम्ब रोलाजे पूजा चीक्क्य। हम्ब किताबब सेक्कब थुमाजे ख्यङ्। 9 सूजे त ख्वब न ख्यङ् ङूदे चेलाबे ङ्यीन्स्य। 10 कादेये कोइ कैदने प्रपर्दे ख्यङ्यलो हम्ब कैदने प्रीय, तरवारदे सेक्क पर्देख्यङ्यलो हम्बने तरवारदेने सेक्कीय। परमेश्वरजे पवित्र मीयूदे येर सतनम् रब धेरेन् क्यूत्देबे विश्वास चीन्न पर्तीय। पृथ्वीदे योङ्रब रोला 11 होर्दे पृथ्वीदे योङ्रीनब सूजो रोला त्या ङैदे तङ्दे। हम्ब रोलाजेये थुमाजेप्र रूक् ङ्ही ख्य, होर्दे अजिङ्गरदे क्यमप्र हम्बदे क्यम ख्य। 12 हम्ब रोलादे समुद्रदे योङ्रब रोलाजे हक चील्ले ख्य। हम्बदे पृथ्वी मेस्ये होने ख्यब मीयू क्वानेने हम्ब समुद्रदे योङ्रब रोलाजे पूजा चीस्स्ये पीन ख्य, हम्ब रोलाजे सीब ख्वब म केन् तम् क्यूरे ख्य। 13 पृथ्वीदे योङ्रब रोलादे मीयूजे खूम्ने तो-मूदे पृथ्वीने मी-फूली तलप्रने सूजो केन्-केन् च्यूनूयूये चीत्दे। 14 होर्दे समुद्रदे योङ्रब रोलाजे खूम्ने हार्मन्देत्या च्यूनूयू चे ख्वब शक्ति हम्ब रोलाने पीन्दे, हम्बदे हार्मन्देत्या च्यूनूयू तन्देबे पृथ्वीने ख्यब मीयूने छल् चीत्दे। तरवारदे म केन् पूक्कलीने सोम्बो क्यूरब हम्ब समुद्रदे योङ्रब रोलाजे गेसेन् चेजे लागि मूर्ति त्या बन्दी यदेबे हम्ब रोलादे थमयूने हुकुम चीत्दे। 15 समुद्रदे योङ्रब रोलाजे मूर्तिदे क्यम खूस्य यदेबे हम्ब मूर्ति ने स चङ ख्वब शक्ति हम्ब पृथ्वीदे योङ्रब रोलाने पीन्दे। येरे सू-सूदे हम्ब मूर्तिने पूजा अन्ची थमयूने सेक्कस्य। 16 होर्दे केन् मेस्ये चीद, फ्योबो मेस्ये दूख्प्रे, त्वो-त्वोम मेस्ये स्वतन्त्र क्यूक्कब मीयू क्वाजे स्येत्लाने या थमयूजे प्वेने छाप लैदीने च्योल्दे। 17 होर्दे हम्ब छाप अन्क्यूत्दासेमे सूदेये चैत्याये कीन अम्प्रे मेस्ये सोङ अम्प्रे क्यूत्दे। हम्ब छापब समुद्रदे योङ्रब रोलाजे मीन् या हम्बजे मीन्जे नम्बर् ख्य। 18 अम्ब क्वजे लागि बुद्धि चैतीय: कोइजे क्वब शक्ति ख्यङ्लो ङूदे हम्ब रोलाजे नम्बर् जोर्दीस्य, चेनेयलो हम्ब कोइ मीजे नम्बर् ख्यङ्, मेस्ये हम्ब नम्बर् ६६६ ख्यङ्। |
Ghale New Testament © Nepal Bible Society, 2011.
Nepal Bible Society