प्रकाश 12 - घले नयाँ करारमदी मेस्ये अजिङ्गर 1 स्वर्गने हार्मन्देब च्यूनू त्या तङ्दे: मीयाजे कोला ह्वेब मदी त्या तङ्दे, ङूजे तोप् नङ्ने लीनी ख्य, मेस्ये ङूदे टने बाह्र ओटा कर्चेन्जे मुकुट कूये ख्य। 2 ङू ख्वाजे-म ख्य, मेस्ये पीच प्रेब बीद लादीदेबे सोरो नदेबे पारा पून्न ख्य। 3 होर्दे स्वर्गने सूजो च्यूनू त्या तङ्दे: ट ङ्यी, रूक् च्यू मेस्ये टने मुकुट ङ्यी कूयेब अजिङ्गर मल्लम् केन् त्या तङ्दे। 4 हम्ब अजिङ्गरजे म्हीदे स्वर्गजे भा सोम्ने भा त्या कर्चेन्यू स्योर्देबे पृथ्वीने छापीदे। पीच प्रे बितीक्ने हम्ब पीच क्य्वे योप्पेस्ये यदेबे हम्ब अजिङ्गर पीच प्रेमेब मदीजे खूम्ने मेर्न ख्य। 5 का-मुलुक देशजे मीयूने जङ्जे पीर्गदे हुकुम चील्लेब च त्या हम्ब मदीदे प्रेत्दे। हम्ब पीच परमेश्वर ट्याने प्लेकीदेबे परमेश्वरजे सिंहासान खूम्ने कूदीदे। 6 हम्ब मदीब चैत्याये अम्फेब याङ्-यूङ् नेतेले छ्योङ्गी, हैयाने हजार त्या सै ङ्ही सोम्लङ् दिनसेमे ङूने स्वोस्स्य यदेबे परमेश्वरदे ङूजे लागि ने तयार चीत्देबे हीदे ख्य। 7 होर्दे स्वर्गने लडाइँ क्यूत्दे। मिखाएल मेस्ये ङूजे दूतयूदे हम्ब अजिङ्गरप्रे लडाइँ चीत्दे। अजिङ्गर मेस्ये ङूजे दूतयूदेये लडाइँ चीत्दे, 8 तर अजिङ्गर मेस्ये ङूजे दूतयू फूङ्गदे, मेस्ये स्वर्गने थमयूजे लागि कनेये ने अम्प्रे। 9 हम्ब अजिङ्गर केन् मो पृथ्वीने छाबीदे- हम्ब मीयूङ् मेस्येजे डम् ख्य, का-मुलुक संसारजे मीयूने छल् चेब दीयाबलस यब शैतान ङूने ख्य। ङूप्रे-प्रे ङूजे दूतयूनेये पृथ्वीने छापीदे। 10 होर्दे स्वर्गने येरे येनब के केन् त्या ङैदे तदे, “जेम्से ङीन परमेश्वरजे मूक्ति, शक्ति, राज्य मेस्ये ङूजे ख्रीष्टजे हक र ख्यङ्। चेनेयलो ङीन्जे परमेश्वरजे खूम्ने अत-अची च्योन्यूने नो-मून् दोष लैदेब हम्ब मो छाबे ख्यङ्, 11 थुमाजे का मेस्ये परमेश्वरजे वचन अनुसार रङ्सेदे गवाही पीन्देबे थमयूदे शैतान फ्याने ट्याप्रे ख्यङ्, मेस्ये सीब पर्दीलीने थमयूदे रङ्से ज्यानजे माया अन्ची। 12 येरेक्यूत्देबे नम स्वर्गने टूङबयू सूग्। तर पृथ्वी मेस्ये समुद्रने धिक्कार! चेनेयलो रङ्सेजे बील तूनत्या ख्यङ् यब था प्रेत्देबे शैतान सोरो छी-लङ्देबे नमयू ख्यनेने मो र ख्यङ्।” 13 कन्छ्वाब हम्ब अजिङ्गरदे रङ्से पृथ्वीने छाबेब था प्रेत्दे, हन्छ्वाब ङूदे च जन्मेदेब हम्ब मदीने ताल्दे। 14 तर हम्ब मदीने डम् केन् ख्यब नेदे चैत्याये अम्फेब याङ्यूङ् नेने स्यून्देबे प्रजे लागि हम्ब केन्जे जूल्लीजे येन् ङ्ही पीन्दे। वर्ष सोम् ल र्वासेमे हम्ब मदी स्वेजे लागि हम्ब ने तयार चीदे ख्य। 15 भल्दे हम्ब मदी प्ल्येगीस्य यदेबे हम्ब अजिङ्गर ङूर्दे मदीजे ङ्येलम्ने क्यूजे गीन्दी योन्दे। 16 तर हम्ब अजिङ्गरजे ङूर्दे योङ्रब भल्जे क्यू पृथ्वीजे ङूर्दे थूङ्पीदे, मेस्ये पृथ्वीदे येरे हम्ब मदीने तोङ्मीदे। 17 होर्दे हम्ब अजिङ्गर हम्ब मदीप्रे छी-लङ्दे, मेस्ये हम्बजे लम ख्यब छगूम्-पूर्गूम्प्रे या सू-सूदे परमेश्वरजे आज्ञायू मन्दीय, मेस्ये येशूजे गवाही पीन्क्य हम्ब मीयूप्रे लडाइँ चेने गीली। 18 होर्दे हम्ब अजिङ्गर समुद्रजे नने मेर्दे। |
Ghale New Testament © Nepal Bible Society, 2011.
Nepal Bible Society