प्रकाश 1 - घले नयाँ करार1 अम्ब प्रकाशजे वचन येशू ख्रीष्टजे ख्यङ्। जेम्से छ्योट्टोने क्यूट्टमेब पो परमेश्वरदे रङ्सेजे सेवा चेबयूने तम्मेजे लागि येशूने पीन्दे। अम्ब पोयू येशूदे रङ्सेजे दूत कूल्पीदेबे रङ्सेजे त्वो यूहन्नाने तम्मीदे। 2 परमेश्वरजे वचन मेस्ये येशू ख्रीष्टदे चेब कामयूजे बारेने तङब साप्ता पोयूजे गवाही यूहन्नादे पीन ख्यङ्। 3 अगमवाणीजे अम्ब वचनयू लिख्दीयेब किताब सूदे के केन् योन्देबे छ्योक्क्य, सूदे ङ्यीन्क्य, मेस्ये हैयाने लिख्दीयेब पो सूदे मन्दीय थमयूदे असी प्रेक्क्य, चेनेयलो बील ट्याने फ्योर ख्यङ्। नमस्कार मेस्ये सार्याजे प्रू 4 यूहन्नादे एशियाने ख्यब मण्डलीयू ङ्यीने लिख्दे ख्यङ्: परमेश्वरट्यादे नमयूने अनुग्रह मेस्ये शान्ति पीन्स्य, ङू चूजोये ख्यङ्, खूम्ये ख्य, ङ्येदेये रीय। ङूजे सिंहासन खूम्ने ख्यब आत्मा ङ्यीट्यादे, 5 मेस्ये विश्वास चे ख्वब साक्षी येशू ख्रीष्ट, सीयेबयू नङ्ने पात्ता खूम् सोम्बो क्यूरब, मेस्ये पृथ्वीजे मूरुम्यू फ्याने हुकुम चेबट्यादे नमयूने अनुग्रह मेस्ये शान्ति। ङूदे ङीनने प्रेम चे ख्यङ् मेस्ये ङीन्जे पापने रङ्से कादे छूर्तीमे ख्यङ्, 6 मेस्ये ङीनने राज्यत्या पीन ख्यङ्, ङीनने ङूजे परमेश्वर मेस्ये पजे सेवा चेब पूस्र्यायू चीम्मे ख्यङ्, ङूने महिमा मेस्ये शक्ति येतार्ने क्यून्नूस्य। आमेन। 7 ले, ङू मूक्पप्रने रेन ख्यङ्, मेस्ये क्वाजे म्यादे ङूने तङ्क्य। सू-सूदे ङूने स्यूल्दे हम्बयूदेये ङूने तङ्क्य, मेस्ये ङू रब पृथ्वीजे मीयू क्वाने ङूजे लागि शोक् चीक्क्य। येरेने क्यूस्स्य। आमेन। 8 “अल्फा मेस्ये ओमेगा ङ ख्यङ्”, पात्ता केन् शक्तिजे परमप्रभु परमेश्वरदे य ख्यङ्, ङू चूजोये ख्यङ्, खूम्ये ख्य, मेस्ये ङ्येदेये रीय। येशू ख्रीष्टजे दर्शन 9 ङ यूहन्ना, नमयूजे अत, नमयूदे प्रने येशूने विश्वास चीत्देबे सकस् भोक्तीब धेरेन् टूङ्दे मेस्ये परमेश्वरजे राज्यने सामेल् क्यूर ख्यङ्। परमेश्वरजे वचन मेस्ये येशू ख्रीष्टजे गवाही मीयूने स्य्वेब क्यूत्देबे ङैने पत्मोस यब टापूने हीते ख्य। 10 प्रभुजे दिनने पवित्र आत्मा ङै फ्याने र ख्य, मेस्ये, ङैजे ङ्यलम्दे धूङ्कूर्जेप्र केन् केत्यादे येरे येनब ङैदे तदे, 11 “नदे च तङ्न ख्यङ्, हम्ब किताब त्याने लिख्दी, होर्दे अम्ब एफिसस, स्मुर्ना, पर्गामम, थिआटीरा, सार्डिस, फिलाडेल्फिया मेस्ये लाउडिकिया मण्डलीयू ङ्यीनेने चङ्पी।” 12 ङैप्रे क्यम्नबने लेदे यदेबे ङ ङ्येलम् ल्वादे। ङ्येलम् ल्वादेबे लेप्प बत्ती नेनब मर्जे सामदान ङ्यी, 13 मेस्ये सामदानयूजे अन्द्रने मीजे च प्र तोप्सेमेने उपब कोला ह्वेब मेस्ये ङूजे गूने मर्जे फीत्ता थाप्ल्यात्या होतेबने ङैदे तङ्क्दे। 14 ङूजे ट मेस्ये ट-फू पीप्र कर् मेस्ये कर् ल्याङ्प्र ख्य, मेस्ये ङूजे म्या मी-उम्दप्र प्ल्याङ्न ख्य। 15 ङूजे तोप्यू प्ल्याङ्नब मीजे भोप्प्रोने खार्दीदेबे टल्कीदीयेब चीरीस्प्र ख्य, मेस्ये ङूजे के क्यू गीन्दी बोङ् बीलने योङब आवाजप्र ख्य। 16 ङूजे स्येत्-लादे कर्चेन्यू ङ्यी चूङ्न ख्य, मेस्ये पट्टी-ङ्हीने छ्यर धर ख्यब तरवार ङूजे ङूर्दे योङ्न ख्य। नो-गूङ्ने प्ल्यानब मीयाप्र ङूजे त्वाये प्ल्यान ख्य। 17 कन्छ्वाब ङैदे ङूने तङ्दे, हन्छ्वाब ङ सीयेप्र क्यूत्देबे ङूजे खूम्ने पून्छ्यल् क्यूत्दे। तर ङूदे रङ्से स्येत ला ङैफ्याने येत्दे मेस्ये यदे, “अम्फलाची, पात्ता खूम् मेस्ये पात्ता ङ्येये ङने ख्यङ्। 18 मेस्ये सोम्बो क्यूरब ङ ख्यङ्। ङ सीये ख्य, तर ङ येतार्ने सोम्बो क्यून्नीय, होर्दे मृत्यु मेस्ये पातालजे चापीयू ङैप्रे ख्यङ्। 19 येरेक्यूत्देबे नैजे म्यादे च तङ्क्य, मेस्ये चूजो च-ख्यङ्, होर्देङ्येदे च-क्यूट्टीय, हम्ब लिख्दी। 20 ङैजे स्येत लाने नदे तङब अम्ब कर्चेन् ङ्यी मेस्ये मर्दे बन्दीयेब अम्ब साम्दान ङ्यीजे नङ्सू पो येर ख्यङ्: कर्चेन् ङ्यीदे मण्डली ङ्यीने लेब-दूतयू जन्तीय मेस्ये साम्दान ङ्यीदेब मण्डलीयू ङ्यीने जन्तीय।” |
Ghale New Testament © Nepal Bible Society, 2011.
Nepal Bible Society