फिलेमोन 1 - घले नयाँ करार1 येशू ख्रीष्टजे लागि कैदने टूनब ङ पावल मेस्ये च्योन् तिमोथीदे, 2 ङीनजे छेब प्रे-प्रे काम फरब फिलेमोन, स्यङ् अप्फीया, ङीन प्रे-प्रे काम फरब सिपाई अर्खिप्पस होर्दे नैजे कीम्जे मण्डलीने रब मीयू क्वानेने अम्ब चिट्ठी लिख्दीन ख्यङ्: 3 ङीनजे प परमेश्वर मेस्ये प्रभु येशू ख्रीष्ट ट्यादे नमयूने अनुग्रह मेस्ये शान्ति क्यूस्स्य! धन्यवाद मेस्ये प्रार्थना 4 कन्छ्वाब ङैदे प्रार्थनायू चीप्प नने ह्वे चीक्क्य हन्छ्वाब ङैजे परमेश्वरने येतार्ने ङ धन्यवाद पीन्क्य, 5 चेनेयलो प्रभु येशू फ्याने नदे चेब विश्वासजे बारेने मेस्ये परमेश्वरजे पवित्र मीयूने नदे चेब मायाजे बारेने मीयूदे यब ङैदे त ख्यङ्। 6 ङैदे प्रार्थना चीन्न ख्यङ्, यी नैजे विश्वासजे सङ्गतिदे ख्रीष्टने ख्यब ङीनजे ज्य पोजे ज्ञान बढ्दे खूस्य। 7 च्योन्, नैजे मायादे ङैदे कूम आनन्द मेस्ये सान्त्वना प्रेख्यङ्, चेनेयलो नदे चीत्देबे परमेश्वरजे मीयूजे सेम् फेरि आनन्द सूग्लाबे चीम्मे ख्यङ्। ओनेसिमसजे लागि पावलजे बिन्ती 8 ख्रीष्टने क्यूत्देबे ङैदे नने च चे पर्दे हम्ब चेब आज्ञा पीनब हीक्मत् ख्यङ्लीने, 9 प्रेमजे कारणदे ङ नने बरू बिन्ती चीक्क्य- ङ, कम्ब क्यूरेब पावल होर्दे येशू ख्रीष्टजे लागि दीनी कैदने टूनब मी त्या- 10 ङैजे च ओनेसिमसजे लागि नने बिन्ती चीक्क्य। ङ झ्यालखानने स्योप्केब बीलनेये ङूजे लागि ङ प क्यूर ख्यङ्। 11 मालङ् ङू नैजे लागि काम अन्लादे ख्य, तर दीनी नैजे लागिये ङैजे लागिये काम लादेब क्यूर ख्यङ्। 12 ङू ङैजे सेम्देमेस्येने सोरो छेब ख्यङ्, ङैदे ङूने नैट्याने ल्वाबीन ख्यङ्। 13 ङूने ङैप्रे येन प्रेल्लो ङ सूग ख्यङ्दे, चेनेयलो सूगब खबरजे लागि ङ कैदने टूनब बीलने, नैजे सट्टने ङूदे ङैजे सेवा चे ख्व ख्यङ्दे, 14 तर नैजे आज्ञा अम्प्रेत्दासेमे ङ चैत्याये चीस्ये अम्मन्, येर क्यूस्स्य यी अम्ब नैजे भलो चेब काम मीदे कर् चङ्देबे चेब अङ्क्यूस्स्य, तर नैजे रङ्सेजे सेम्दे चेब क्यूस्स्य। 15 कादेये नेप्रे ते-दिनजे लागि ङू आलाक्के क्यूरे ख्य, येर क्यूस्स्य यी ङू येतार्जे लागि नैप्रे टूङ खूस्य। 16 जेम्सेमेस्ये त्वोप्र दी, तर त्वोनेयली थेप् छेब च्योन्प्र मन्दी, खास ङू ङैजे लागि ज्य ख्यङ्, तर झन् थेप् ङ्वने मेस्ये प्रभूने नैजे लागिने ज्य क्यूर ख्यङ्। 17 होरेक्यूत्देबे नदे ङैने रङ्सेप्रे गोसारी चेब मी मन्दे यलो ङैने मेस्ये ङूनेये रङ्से मी मन्देबे ग्रहण ची। 18 कादेये ङूदे नने अन्ज्य चीक्कख्यङ्लीने, या चत्या सेजे ङूदे छेर् चीक्क ख्यङ्यलो, हम्ब हिसाब ङैजे मीन्ने लिख्दीयी। 19 ङ पावल, रङ्सेजे लादेने अम्ब चिट्ठी लिख्दीन ख्यङ्। हम्ब छेर् ङैदेने फामीय। ङैदे नने येन अम्पर्दीस्ये न रङ्सेये ङैजे छेर् प्लेब ख्यङ्। 20 छेब च्योन्, प्रभुजे मीन्ने नदे ङै फ्याने कृपा चीत्देबे ङैजे सेम्ने फेरि सूग्स्ये पीनो। 21 नैजे आज्ञा मन्देब पोने ङ पूरा भर् चीत्देबे ङैदे स्ययली झन् थेप् चीक्क्य मन्देबे ङ नने अम्ब चिट्ठी लिख्दीन ख्यङ्। 22 ङैजे लागि ङ्योव टूङ्ब-कोठा त्या ठीक चीत्देबे हीती, चेनेयलो नैजे प्रार्थनादे ङैये नैट्याने र प्रेक्की च यब आशा चीन्न ख्यङ्। 23 येशू ख्रीष्टजे लागि ङैप्रे-प्रे कैदने टूनब ख्योन् इपाफ्रासदे नने नमस्कार येबे ख्यङ्। 24 होर्प्रने ङैप्रे काम चेब मर्कूस, अरिस्तार्खस, डेमास मेस्ये लूकादेये नमस्कार य ख्यङ्। 25 प्रभू येशू ख्रीष्टजे अनुग्रह नमयूजे आत्माप्रे क्यूस्स्य। |
Ghale New Testament © Nepal Bible Society, 2011.
Nepal Bible Society