मत्ती 5 - घले नयाँ करारयेशूदे गङ्ने पीनब अर्ती लूका ६:२०-२३ 1 मीहुल तङ्देबे येशू गङ्ने गीलीदेबे टूङ्दे होर्दे ङ्येदे स्यूस्स्यायू ङूट्याने रदे। 2 होर्दे ङूदे थमयूने येरे यदेबे अर्ती पीनने सुरु चीत्दे: 3 “आत्माने चीद क्यूरब मीयूदे असी प्रेक्क्य, चेनेयलो स्वर्गजे राज्य हम्बयूजेने ख्यङ्। 4 शोक् चेब मीयूदे असी प्रेक्क्य, चेनेयलो हम्बयूदे सेम्ने सान्त्वना प्रेक्क्य। 5 चीद क्यूरब मीयूदे असी प्रेक्क्य, चेनेयलो हम्बयूदे पृथ्वीजे हक प्रेक्क्य। 6 धार्मिकताजे लागि ठेब मेस्ये क्यू फैप्र क्यूरब मीयूदे असी प्रेक्क्य, चेनेयलो थमयूजे इच्छा पूरा क्यूक्क्य। 7 दया चेब मीयूदे असी प्रेक्क्य, चेनेयलो थमयूदे दया प्रेक्क्य। 8 शुद्ध सेम् ख्यब मीयूदे असी प्रेक्क्य, चेनेयलो थमयूदे परमेश्वरने तङ्क्य। 9 थून्ला चीम्मेब मीयूदे असी प्रेक्क्य, चेनेयलो थमयूने परेमेश्वरजे च-चीमीयू यीय। 10 धार्मिकताजे लागि सतनम् भोक्तेब मीयूदे असी प्रेक्क्य, चेनेयलो स्वर्गजे राज्य थमयूजेने ख्यङ्। 11 “नमयूदे असी प्रेक्क्य, कन्छ्वाब ङैजे कारण मीयूदे नमयूजे न पूक्क्य, सतनम् चीक्क्य, मेस्ये लूच्च क्यम्देबे नमयूजे विरुद्धने पीरीपीरीजे अन्ज्य पो यीय। 12 हन्छ्वाब तङ्, मेस्ये बेस्से सूग्, चेनेयलो स्वर्गने नमयूजे इनाम केन् क्यूक्क्य। चेनेयलो येर्बेने नमयूयली खूम्जे अगमवक्तायूने थमयूदे सतनम् चे ख्य। च मेस्ये ओथ्याङ् मर्कूस ९:५० ; लूका १४:३४-३५ 13 “नमयू पृथ्वीजे चप्र ख्यङ्, तर चजे ङाम्बा प्रदेयलो हम्ब फेरि चैदे ङम्लाचे? हम्ब फीने छाबे मेस्ये मीजे तोप्दे छ्यत्या, सूजो चै कामये अन्लादी। 14 “नमयू संसारजे ओथ्याङ् चेब बत्तीप्र ख्यङ्। गङ्ने बन्दीयेब सहर फूदेबे येन अन्खू। 15 मीयूदे बत्ती नेन्देबे टोलोदे अङ्-उप्, तर बत्ती येनब नेने येक्क्य, मेस्ये कीम्ने ख्यब खोत्ताजे लागिने हम्बदे ओथ्याङ् पीन्क्य। 16 येरप्रने नमयूजे ओथ्याङ् मीयूजे खूम्ने चेम्कीदीस्य, मेस्ये नमयूजे ज्य काम थमयूदे तङ्स्य होर्दे स्वर्गने ख्यब नमयूजे पजे महिमा क्यूस्स्य। मोशाजे नियम मन्देब 17 “मोशाजे नियम मेस्ये अगमवक्तायूजे पोयूने खारेज चेने ङ र-अम्मन्लाची। हम्ब खारेज चेने ङ र-दी, तर पूरा चेने र-ख्यङ्। 18 चेनेयलो तम्दम्ने ङ नमयूने यीय, कन्छ्वासेमे स्वर्गप्रे पृथ्वी अम्मल्ब हन्छ्वासेमे साप्ता पो पूरा अन्क्यूत्दासेमे कम्ब हलातदेये मोशाजे नियमजे पो ल तीत्याये अम्मल्ब। 19 येरेक्यूत्देबे सूदे अम्ब आज्ञायू नङ्ने पात्ता चीद तीत्यानेये अम्मन्दे चीक्क्य, मेस्ये मीयूनेये अम्मन्दीलाची यदेबे लोम्मीलो हम्ब स्वर्गजे राज्यने पात्ता चीद क्यूक्क्य। तर सूदे हम्ब आज्ञायू मन्दीय मेस्ये मीयूने लोम्मीदेयलो, हम्ब स्वर्गजे राज्यने केन् क्यूक्क्य। 20 ङ नमयूने यीय चेनेयलो पन्डे मेस्ये फरिसीयूजे यली नमयूजे धार्मिकता थेप् ज्य अन्क्यूल्लो नमयू कम्ब हलातदेये स्वर्गजे राज्यने क्योब प्रेस्स्ये त्वो। छी मेस्ये मी सेब 21 “तोङ्बो जूक्जे मीयूने येरे येयेब नमयूदे तख्यङ्, ‘नदे मी अन्सेल्लाची’ सूदे मी सेक्क्य ङूने मारङ् क्याय।’ 22 तर ङ नमयूने यीय, सू-सूदे रङ्से अत-च्योन्प्रे छी चीक्क्य, ङूने मारङ् क्याय, मेस्ये सूदे रङ्से अत-च्योन्ने अन्ज्य चीक्क्य, ङूदे पात्ता केन् सभाने जवाफ पीन पर्दीय। सूदे रङ्से अत-अची च्योन्ने ‘न मूर्ख’ यीय, हम्ब नरकजे मीने छापीय। 23 “येरेक्यूत्देबे परमेश्वरजे चाक्क्याने रङ्से भेटी चेर्देब बीलने खूम् नैजे अत-च्योन्जे सेम्ने नैजे विरुद्धने चत्या ख्यब नदे ह्वेरदेयलो, 24 नैजे भेटी हम्ब चाक्क्याजे खूम्दे पोङ्गी, मेस्ये प्र। खूम् रङ्से अत-च्योन्प्रे मिलाप ची, होर्दे ल्वारदे रङ्से भेटी चेर्ती। 25 “अड्डने प्रब, खूम लम्नेने नैजे विरुद्ध चेबप्रे मिलाप ची, नत्र नैजे विरोध चेबदे नने न्याय चेब मीजे लाने सूम्दीपीने होर्दे न्याय चेब मीदे अफसरने सूम्दीपीने, मेस्ये न झ्यालखानने स्योप्पीने। 26 तम्दम्ने, ङ नमयूने यीय, नदे मन्द्रमूली त्या-त्या अम्फादासेमे न हैयादे योङ्र प्रेस्स्ये त्वो। वेश्य काम 27 “येरे यब नमयूदे त ख्यङ्, ‘नदे वेश्य काम अन्चील्लाची।’ 28 तर ङ नमयूने यीय, सूदे प्रे ङ्यूमब सेम्दे मदीयूने लेक्क्य, ङूदे रङ्से सेम्ने हम्बप्रे खूम्ने वेश्य चीक्कब क्यूक्क्य। 29 कादेये नैजे स्येत म्यादे नने पाप चेने च्योल्दे यलो हम्बने योन्देबे छाबी, चेनेयलो नैजे ङ्व टक्कने नरकने छाबेयली बरू नैजे अङ्गयू नङ्ने त्या छाबेब नैजे लागि ज्य क्यूक्क्य। 30 नैजे स्येत् लादे नने पाप चेने च्योल्देयलो नदे हम्ब लाने तूप्देबे छाबी। चेनेयलो नैजे ङ्व टक्कने नरकने प्रयली बरू नैजे अङ्गयू नङ्ने त्या छाबेब नैजे लागि ज्य क्यूक्क्य। प्ल्यङ् मज लम् प्रब मर्कूस १०:११-१२ ; लूका १६:१८ 31 “येरेये येये ख्यङ्, ‘सूदे रङ्से मजप्रे लम् प्रेय, ङूदे मजने लम् प्रब भर्पाइ लिख्दीदेबे पीन्स्य।’ 32 तर ङ नमयूने यीय, सूदे रङ्से मजने वेश्य क्यूरब बाहेक सूजो कारणदे लम् प्रेय, ङूदे मजने वेश्य क्यूस्से पीन्क्य, मेस्ये सूदे लम् प्रेकब मदीप्रे ङ्येन् चीक्क्य, हम्बदे वेश्य काम चेब क्यूक्क्य। कसम मेस्ये तम्दम् 33 “फेरि नमयूदे त ख्यङ्, तङ्बोजे मीयूने येये ख्यङ यी, ‘नदे लूच्च कसम अन्चलाची, तर परमप्रभुजे लागि चीतेब कसम नदे पूरा ची।’ 34 तर ङ नमयूने कसम चने अन्चलाची यदेबे यीय। स्वर्गजे मीन्ने कसम चने अन्चलाची, चेनेयलो हम्ब परमेश्वरजे सिंहासन ख्यङ्, 35 पृथ्वीजे मीन्नेये कसम अन्चलाची, चेनेयलो हम्ब परमेश्वरजे तोप् छ्यब ने ख्यङ्। यरूशलेमजे मीन्नेये कसम अन्चलाची, चेनेयलो हम्ब मूरुम् केन् परमेश्वरजे सहर ख्यङ्। 36 रङ्से टजे कसम अन्चलाची, चेनेयलो नमयू रङ्से टजे फू तीत्यात्याये कर्ने लङ् मेस्ये लङ्ने कर् बन्दे अन्खू। 37 नमयूदे यब पो ब ‘अँ’ यलो ‘अँ’ होर्दे ‘दी यलो’ ‘दी’ यब त्या क्यूस्स्य। अम्बयली थेप् यलो हम्बब दुष्टदे चेब क्यूक्क्य। बदल अन्कीन्लाची लूका ६:२७-३६ 38 “नमयूदे येरे येयेब त ख्यङ्, ‘म्याजे बदल म्या, मेस्ये सजे बदल स।’ 39 तर ङ नमयूने यीय, दुष्टने ङूर् ल्वाब काम अन्चील्लाची। कादेये नैजे स्येत्जे डम्बने मीदे ठरीलो, ङूने सूजो डम्बये तापी। 40 कोइ मीदे मुद्दा जीङ्देबे नैजे ह्वेब तोर कूब मेलो, ङूने नैजे बूखूये पीम्बी। 41 कोइ मीदे नने किलोमिटर त्या प्रेये यदेबे कर् चङ्लो, ङूप्रे किलोमिटर ङ्हीसेमेने प्रेमी। 42 नैप्रे स्यब मीने पीन्, मेस्ये नैप्रे ख्यीट्टब मीने त्वो अन्-यलाची। 43 “नमयूदे येरे यब तख्यङ्, ‘नैजे खीम्चेने प्रेम ची, मेस्ये नैजे शत्रुने ह्यल ची।’ 44 तर ङ नमयूने यीय, रङ्से शत्रुयूने प्रेम ची, मेस्ये नमयूने सतनम् पीन्नब मीयूजे लागि प्रार्थना ची, 45 मेस्ये स्वर्गने टूङब रङ्से पजे च-चीमीयू नमयू क्यूक्क्य। परमेश्वरदे ज्य प्रे अन्ज्य मीयूने मीया प्ल्यामीय, मेस्ये धर्मी होर्दे पाप चेब मी ङ्हीनेने झीरी रस्येपीन्क्य। 46 चेनेयलो नमयूने प्रेम चेबयूने त्या प्रेम चीत्देयलो केर्बे नमयूदे इनाम प्रेक्क्य? स्यर्म लङब मीयूदेये होरने अन्चेया? 47 नमयूदे रङ्से अत-अची च्योन्यूने त्या नमस्कार चीत्दे यलो सूजो मीयूदे यली थेप् च चीत्दे स्व? परमेश्वरने अन्स्येब मीयूदेये होरे अन्चेया? 48 स्वर्गने नमयूजे प सिद्ध ख्यप्रने नमयूये सिद्ध क्यूर पर्दीय।” |
Ghale New Testament © Nepal Bible Society, 2011.
Nepal Bible Society