मत्ती 21 - घले नयाँ करारयेशू यरूशलेमने गेसेन् चीत्देबे स्वागत चेब मर्कूस ११:१-११ ; लूका १९:२८-४० ; यूहन्ना १२:१२-१९ 1 कन्छ्वाब थमयू यरूशलेम ट्याने जैतून गङ्जे बेथफागेने फ्योरदे, हन्छ्वाब येशूदे स्यूस्स्या ङ्हीने यरे यदेबे कूल्बीदे, 2 “नमयूजे खूम्ने ख्यब तने प्र। हैयाने फ्योब बितीकै नमयूदे गधा त्या मेस्ये हम्बजे प क्यूरब गधा चीद च्यूनेब तूय। हम्ब फादेबे ङैट्याने सीक। 3 मीदे नमयूने पो लोत्दे यलो, ‘प्रभुने गधा चैते ख्यङ्’ य मेस्ये ङूदे छाट्टे हम्ब कूल्बीय।” 4 अगमवक्तादे क्यम्येब वचन पूरा क्यूस्स्य यदेबे अम्ब क्यूर ख्यङ्, 5 “सियोनजे चीमीने य, ले, नैजे मूरुम् नैट्याने रेन ख्यङ्, स्यूलूक्कै क्यूत्देबे गधा फ्याने टदे रेन ख्यङ्, ङू गधा पीच त्या फ्याने टदेबे रीय।” 6 होरदे स्यूस्स्यायू गीलीदे, मेस्ये येशूदे च्योल्प्रने थमयूदे चीत्दे। 7 थमयूदे गधा मेस्ये हम्बजे पीच रेत्देबे पीचफ्याने थमयूजे कोला तीक्मीदे मेस्ये येशू हम्ब फ्याने टूङ्दे। 8 मीहुलदे रङ्सेजे टूकूयू, बूखूयू लम्ने तीक्दे मेस्ये सूजो मीयूदे तोङ्बोजे हाँगा चदेबे लम्ने तीक्मीदे। 9 येशूजे ङ्येदे मेस्ये खूम्दे रेनब मीहुलदे येरे यदेबे पारा पूत्दे, “दाऊदजे चने होसन्ना! परमप्रभुजे मीन्ने रबजे जै क्यूस्स्य! पात्ताफ्याजे स्वर्गने ख्यब परमेश्वरने होसन्ना!’ 10 येशू यरूशलेमजे सहरने गीलीब हैयाबूरू का-मुलुकने ड्वाङ्गे क्यूत्दे मेस्ये मीयूदे लोत्दे, “ङू सू टोङ्?” 11 हुलने ख्यब मीयूदे जवाफ पीन्दे, “ङू गालीलजे नासरतदे रब अगमवक्ता, येशू टूङ्।” येशू मन्दिरने मर्कूस ११:१५-१९ ; लूका १९:४५-४८ ; यूहन्ना २:१३-२२ 12 येशू परमेश्वरजे मन्दिरने गीलीदे। होर्दे येशूदे मन्दिरने कीनब मेस्ये सोङ्नब मीयू क्वाने ताल्पीदे, मेस्ये नोर् स्योलब मीयूजे टेबल, मेस्ये पूर्वा सोङब मीयूजे टेबल फोल्पीदे। 13 येशूदे थमयूने यदे, “धर्मशास्त्रने येर्बे लिख्दीये ख्यङ्, ‘ङैजे कीम् प्रार्थनाजे कीम् यीय।’ तर नमयूदे अम्ब ने डाँकूयूजे पूक् बन्दे ख्यङ्।” 14 म्या अन्तङब मेस्ये खोन्ड्याल्यायू मन्दिरने येशूट्याने रदे, मेस्ये येशूदे थमयूने तम् चीम्मीदे। 15 तर कन्छ्वाब केन् पूस्र्यायू मेस्ये पन्डेयूब येशूदे चेब हार्मन्देब काम तङ्दे, पैज-मैचयूदे मन्दिरने “दाऊदजे चने होसन्ना” यदेबे पोङ्बे पारा प्वेब तदे, होर्दे थमयू सोरो प्रो लङ्दे। 16 मेस्ये थमयूदे येशूने यदे, “थमयूदे च यको, ङ्यीन्न ख्यइर?” होर्दे येशूदे थमयूने लोत्दे, “अँ, ङ्यीन्न ख्यङ्। नमयूदे धर्मशास्त्रने लिख्दीयेब अन्छ्य्वेया? ‘पीचयू मेस्ये च्यू थूङब बल्खयूजे ङूर्ने नदे जै-जै यस्ये पीन ख्य’?” 17 होर्दे थमयू पोङ्यीदेबे येशू सहरदे योङ्देबे बेथानियाने गीलीदेबे हैयाने बास टूङ्दे। येशूदे अञ्जीर तङ्बोने ले-तप्दे मर्कूस ११:१२-१४ , २०-२४ 18 नप्दे सहरतेले ल्वारब येशू ठीदे। 19 येशूदे लम् नने अञ्जीरजे तङ्बो तङ्दे। येशू हम्ब तङ्बोजे ट्याने रदे, तर हम्ब तङ्बोजे लेम्त्या तङ्दे सूजो चैत्याये अन्तङ्। होर्दे ङूदे हम्ब तङ्बोने यदे, “जेम्से नने सी कलङ्बेये अन्लोस्य” मेस्ये हम्ब अञ्जीरजे तङ्बो खात्याने खरी। 20 अम्ब तङ्देबे स्यूस्स्यायूदे हार्मन्दीदे यदे, “अम्ब अञ्जीरजे तङ्बो केर्बे खात्याने च्य्वे-खरीदे?” 21 येशूदे थमयूने जवाफ पीन्दे, “तम्दम्ने, ङ नमयूने यीय, नमयूदे छीत्याये शङ्का अन्चील्लाबे विश्वास चीत्देयलो, अञ्जीरजे तङ्बोने चेप्र त्यादी, तर अम्ब गङ्ने ‘ल्वादेबे समुद्रने तैल्ब’ यदेयलो हम्बये क्यूक्क्य। 22 विश्वास चीत्देयलो प्रार्थनाने च स्येय हम्ब नमयूदे प्रेक्क्य।” येशूजे हकजे बारेने ल्वेब मर्कूस ११:२७-३३ ; लूका २०:१-८ 23 येशू मन्दिरने गीलीदे, होर्दे येशूदे लोम्मीनूब केन् पूस्र्यायू मेस्ये मीयूजे पन्डेयू येशूट्याने रदेबे यदे, “नदे कम्ब हकदे अम्ब कामयू चीक्क्य, मेस्ये सूदे नने अम्ब हक पीन्दे?” 24 येशूदे थमयूने जवाफ पीन्दे, “ङ नमयूने पो त्या लोक्क्य। ङैने हम्ब पोजे जवाफ पीन्देयलो, ङैदे कम्ब हकदे अम्ब काम चे ख्यङ्, हम्ब नमयूने स्योक्क्य। 25 यूहन्नाजे बप्तिस्मा कैयादे क्यूत्दे? स्वर्गदे यी मीयूदे?” अम्ब थमयू त्यात्याने स्वाल्-जवाफ चीत्देबे यदे, “स्वर्गदे येये यलो, ङूदे यीय, होरेयलो नमयूदे यहून्नाने चेने विश्वास अन्चे?’। 26 तर कादेये मीयूदे येये यलो, ङीनयू मीहुल तङ्देबे फ ख्यङ्। चेनेयलो यूहन्नाने अगमवक्ता यदेबे क्वादेने मन्दे ख्यङ्।” 27 येरेक्यूत्देबे थमयूदे येशूने जवाफ पीन्दे, “ङीने था त्वो।” येशूदे थमयूने यदे, “ङैदेये कम्ब हकदे अम्ब काम चीक्क्य, हम्ब नमयूने अन्-य।” च ङ्हीजे उखान 28 “नमयूजे विचार कर ख्यङ्? मी त्याजे च ङ्ही ख्य। ङूदे जेठ च ट्याने गीलीदे यदे, ‘च, दीनी न अङ्गुरजे रङ्ने काम फर्मी।’ 29 ङूदे जवाफ पीन्दे, ‘ङ अम्प्र।’ तर ङ्येदे सेम्ने पछुतो क्यूत्देबे कामने गीलीदे। 30 “त्याब च ट्याने गीलीदेबे होरप्रने यदे। ङूदे यदे ‘ङ प्रीय पाइ।’ तर कामनेब अङ्गीली। 31 “अम्ब ङ्ही नङ्ने पजे पो सूदे ङ्यीन्दे?” थमयूदे जवाफ पीन्दे, “खूम्जेदे।” येशूदे थमयूने यदे, “तम्दम्ने, ङ नमयूने यीय, स्यर्म लङ्बयू मेस्ये वेश्ययू परमेश्वरजे राज्यने नमयूयली खूम् क्योबीय। 32 चेनेयलो यूहन्ना नमयूट्याने धार्मिकताजे लम् तनने रदे, तर नमयूदे ङूफ्याने विश्वास अन्ची। तर स्यर्म लङबयू मेस्ये वेश्ययूदे ङूफ्याने विश्वास चीत्दे। अम्ब तङ्लीने नमयूदे रङ्से पापजे लागि पश्चाताप चीत्देबे परमेश्वरतेले अन्ल्वार, मेस्ये ङूफ्याने विश्वासये अन्ची।” अध्याने काम फरब मीयूजे उखान मर्कूस १२:१-१२ ; लूका २०:९-१९ 33 येशूदे यदे, “सूजो उखान त्या ङ्यीन्। मीयूङ् मीत्याजे स-क्यू कूम ख्य। ङूदे रङ्ने अङ्गुरजे पोङ् सूग्देबे हम्बजे ती-छो भार्चीत्देबे हैयाने अङ्गुर चोरब क्वे मेस्ये रङ् कूर्तेब मी टूङब माङ्गा बन्दीदे। होर्दे अध्याने काम फरबयूने हम्ब रङ् तोक्कने पीन्देबे ङू फी देशने गीलीदे। 34 होर्दे सी थ्व बील फ्योरदे, रङ्जे नोबोदे अध्याने फरब मीयूट्याने रङ्से भाजे सी स्यने त्वोयू कूल्पीदे। 35 “तर अध्या प्वेब मीयूदे रङ् नोबोजे त्वोयू चूङ्देबे त्याने ठरीकदे, त्याने सेक्कदे, मेस्ये सूजोबने लूङ्दे ठरीदे। 36 फेरि रङ् नोबोदे खूम्जे यली थेप् त्वोयू कूल्बीदे, मेस्ये थमयूदे थमयूनेये होरप्र व्यवहारने चीत्दे। 37 ‘ङैजे चनेब थमयूदे गेसेन् चीस्येन्’ यदेबे पात्ताङ्येदे ङूदे रङ्से च थमयू ट्याने कूल्बीदे। 38 “तर अध्याने फरब मीयूदे नोबोजे च रेनब तङ्देबे त्यादेत्याने यदे, ‘अम्ब मी रङ् नोबोजे हकलादेब ख्यङ्। ‘ख, ङूने सेदे, मेस्ये ङूजे रङ् ङीन चीत्दे।’ 39 होर्दे थमयूदे ङूने चूङ्देबे अङ्गुर रङ्जे फीने कूदीदेबे सेत्दे। 40 “येरेक्यूत्देबे कन्छ्वाब अङ्गुर रङ्जे नोबो रीय, हन्छ्वाब ङूदे हम्ब अध्याने फरब मीयूने च चीक्क्य?” 41 थमयूदे येशूने यदे, “नोबोदे हम्ब अन्ज्य काम फरब मीयूने नाश चीक्क्य, मेस्ये हम्ब अङ्गुरजे रङ् सूजो मीयूने तोक्कने फर्से पीन्क्य, सूदे ङूने सीजे अध्या बीलने पीन्क्य।” 42 येशूदे थमयूने यदे, “नमयूदे धर्मशास्त्रने लिख्दीयेब पो कलङ्बेये अन्छ्य्वे? ‘कम्ब लूङ् कीम् थ्याब मीयूदे काम अन्लादी यदेबे छाबे ख्य, हम्ब लूङ्ने कूनजे जा प्वेब सूर्जे लूङ् क्यूत्दे, येरे परमप्रभुदेने क्यूस्से पीनख्यङ्, ङीनजे लागि अम्ब सोरो हार्मन्देब पो ख्यङ्।’ 43 “येरेक्यूत्देबे ङ नमयूने यीय, नमयूप्रे परमेश्वरजे राज्य लेन्देबे, सी लोला चेब, सूजो जात त्याने पीन्क्य। 44 अम्ब लूङ् फ्याने मी क्यर्बदेयलो ङू चेकाचेका चीक्कीय, तर सू फ्याने हम्ब लूङ् तल्लीय अम्बदे हम्बने प्लीक्कीय।” 45 कन्छ्वाब केन् पूस्र्यायू मेस्ये फरिसीयूदे येशूजे उखान तदे, हन्छ्वाब थमयूजे बारेने येशूदे अम्ब पो येन ख्यङ्मन्दे। 46 थमयूदे येशूने चूङ मेदे, तर थमयू मीहुलप्रे फदे, चेनेयलो मीयूदे येशूने अगमवक्ता यदेबे मन्दे ख्य। |
Ghale New Testament © Nepal Bible Society, 2011.
Nepal Bible Society