मत्ती 16 - घले नयाँ करारपरमेश्वरजे च्यूनू स्यब मर्कूस ८:११-१३ ; लूका १२:५४-५६ 1 फरिसीयू मेस्ये सदुकीयू रदेबे येशूजे जाँच चेने स्वर्गजे च्यूनू त्या तम्मी यदेबे येशूप्रे यदे। 2 तर येशूदे थमयूने जवाफ पीन्दे, “नूस्यूङ् क्यूट्टब मू मल्लम तङ्देयलो नेदे मू ज्य क्यूस्से टूङ् यदेबे नमयूदे यीय।’ 3 नप्दे मू मल्लम मेस्ये मून्तूङ् ख्यङ्लो, ‘दीनी जो रस्ये टूङ् यीय।’ येर्बे नमयूदे मूने लेत्देबे नो कर क्यूक्क्य यदेबे छूर्तेब स्ये ख्यङ्, तर सेमेजे च्यूनूजे अर्थ य खूस्ये त्वो। 4 दुष्ट मेस्ये वेश्य पुस्ताजे मीयूदे च्यूनू मेल्क्य, तर योनाजे च्यूनूत्या क्यूक्क्य सूजो च्यूनू हम्बयूने पीन्स्ये त्वो।” होर्दे थमयूने पोङ्गीदेबे येशू गीलीदे। फरिसी मेस्ये सदुकीयूजे खमीर मर्कूस ८:१४-२१ 5 स्यूस्स्यायू तीप्ल्या फ्योरब थमयूदे क्यङ् रेब क्योङ्येल्गो। 6 येशूदे थमयूने “सेम् पीन्देबे ले, फरिसी मेस्ये सदुकीयूजे खमिरप्रे होस्स्यार क्यूर् यदे।” 7 थमयूदे त्यादेत्याने यदे, “ङीनयूदे क्यङ् अन्रेत्देबे ङूदे येरे यस्ये।” 8 येशूदे अम्ब था प्रेत्देबे यदे, “ओ चेलाबे विश्वास अन्चेबयू! नमयूप्रे क्यङ् त्वो यदेबे चेने त्यादेत्याने येर पो येन? 9 नमयूदे अझ पो क्व-अन्ख्व? हजार ङ मीजे लागि क्यङ् ङजे पो नमयूदे येल्क औ? नमयूदे कोला टोलो रूप् पूत्दे? 10 होर्दे हजार स्यी मीयूने क्यङ् ङ्यी चसे पीन्ब कोला टोलो नमयूदे रूप् पूत्दे? 11 ङैदे नमयूने क्यङ्जे बारेने येन दी यदेबे नमयूदे चेन क्व अङ्ख्व? तर फरिसीप्रे सदुकीयूजे क्यङ् पूलाबे चेब खमिरप्रे होस्स्यार क्यूर्।” 12 होर्दे थमयूदे पो कोदे, “येशूदे क्यङ् पूलाबे चेब खमिरप्रे दी तर फरिसी मेस्ये सदुकीयूजे शिक्षाप्रे होस्स्यार क्यूर य टोङ्। पत्रुसदे येशूने मन्देब मर्कूस ८:२७-३० ; लूका ९:१८-२१ 13 येशू कैसरिया फिलिप्पीजे मुलुकने रेकमेस्ये, ङूदे रङ्से स्यूस्स्यायूने लोत्दे, “ङ-मीजे चने सू यदेबे मीयूदे य टोङ्?” 14 थमयूदे जवाफ पीन्दे, “कोइदे बप्तिस्मा पीनब यूहन्ना, कोइदे एलिया, मेस्ये कोइदे यर्मिया या अगमवक्तायू नङ्जे मीत्या ख्यङ् यदेबे य ख्यङ्।” 15 येशूदे थमयूने लोत्दे, “नमयूदे ङ सू यदेबे यीय?” 16 सिमोन पत्रुसदे जवाफ पीन्दे, “न सोम्बो परमेश्वरजे च ख्रीष्ट ख्यङ्।” 17 येशूदे ङूने यदे, “योनाजे च सिमोन, नदे असी प्रेख्यङ्। चेनेयलो अम्ब नने मीयूदे लोम्मे दी, तर स्वर्गने ख्यब ङैजे पदे तम्मे ख्यङ्। 18 ङ नने यीय, न पत्रुस ख्यङ्। ङ ङैजे मण्डली अम्ब पोलोम् फ्याने बन्दीय, मेस्ये नरकजे ख्योयू हम्ब फ्याने ट्या खूस्ये त्वो। 19 ङ नने स्वर्ग राज्यजे चापीयू पीन्क्य। नदे पृथ्वीने च ख्याय, हम्ब स्वर्गनेये ख्याय, मेस्ये नदे पृथ्वीने ख्यायेब च फाय हम्ब स्वर्गनेये फाय।” 20 होर्दे येशूदे स्यूस्स्यायूने ङ ख्रीष्ट ख्यङ् यब पो सूनेये अन्स्योल्लाची यदेबे बोङ्बे आर्तीदे। सीबयली खूम्ने येशूदे रङ्से सीबजे बारेने पात्ता खूम स्य्वेब मर्कूस ८:३१—९:१ ; लूका ९:२२-२७ 21 येशू यरूशलेमने प्रने-पर्दे ख्यङ्, धर्म-गुरु, केन् पूस्र्यायू, पेन्डेयूदे कूम सकस् पीन्क्य होर्दे हम्ब भोक्दे पर्दीदेबे सेक्क पर्दीय मेस्ये सोम्म्य-नीदे सोम्बो क्यूत्देबे लङ पर्दीय यदेबे ङूदे हम्ब बीलमेस्ये रङ्से स्यूस्स्यायूने स्य्वेने सुरु चीत्दे। 22 तीलाने कूदीदेबे पत्रुसदे येशूने फ्राचीदे, “परमेश्वरदे येरे अन्चीस्स्य, प्रभु, नेफ्याने यर कलङ्बेये क्यूस्से त्वो।” 23 तर पत्रुसतेले ल्वादेबे येशूदे यदे, “ओ शैतान, ङैजे खूम्दे थेचेकी, न ङैजे लागि लम् काब ख्यङ्। चेनेयलो न परमेश्वरजे पोने दी, तर मीयूजे पोयूने सेम् पीन्क्य।” 24 होर्दे येशूदे रङ्से स्यूस्स्यायूने यदे, “कादेये कोइ मी ङैजे ङ्येदे रस्येमन्लो, ङूदे रङ्सेने माया मर्दीस्य, मेस्ये रङ्से क्रूस प्लेत्देबे ङैजे ङ्येदे रस्य। 25 चेनेयलो सूदे रङ्से प्राण जूक्ते मेब सेम् चीक्क्य, ङूदे हम्ब अम्प्रे क्यूक्क्य, तर ङैजे लागि सूदे रङ्से प्राण पीन्क्य, ङूदे हम्ब प्रेक्क्य। 26 कादेये कामूलूक संसार रङ्से लाने कीन्देबे रङ्से प्राणब अम्प्रे क्यूप्पलो मीने च फाइदा क्यूक्क्य? या रङ्से प्राणजे सट्टने मीदे च पीन खूइय? 27 चेनेयलो मीजे च रङ्से पजे महिमाने रङ्सेजे स्वर्गदूतयूप्रे रीय, मेस्ये हम्ब बीलने ङूदे मीयू क्वानेने रङ्से रङ्सेजे काम अनुसार इनाम पीन्क्य। 28 तम्दम्ने, ङ नमयूने यीय, अने ख्यब मीयू नङ्ने कोइदे मीजे चने रङ्सेजे राज्यने रेनब अन्तङ्दासेमे सीबस्ये त्वो।” |
Ghale New Testament © Nepal Bible Society, 2011.
Nepal Bible Society