लूका 9 - घले नयाँ करारबाह्र स्यूस्स्यायू कूल्बेब मत्ती १०:५-१५ ; मर्कूस ६:७-१३ 1 होर्दे येशूदे बाह्र जना स्यूस्स्यायूने त्याफेने कोदे, मेस्ये थमयूने छेत्यू क्वाने योनब मेस्ये बीदयू तम् चे ख्वब शक्ति मेस्ये हक पीन्दे। 2 येशूदे थमयूने परमेश्वरजे राज्यजे प्रचार चेने मेस्ये नबयू तम् चेने कूल्बीदे। 3 येशूदे थमयूने यदे, “नमयू कीम्दे योङ्देब लम्ने प्रब रङ्सेप्रे चैये अन्टेल्लाची-पीर्क, झ्योल, क्यङ्, नोर्, फेर्देब दोर ङ्हीये। 4 कम्ब कीम्ने नमयू क्योबीय हम्ब कीम्नेने टूङ्, मेस्ये हैयादेने बिदा क्यूरो। 5 कैयाने नमयूने स्वागत अन्ची नमयू हम्ब सहरदे फीने योङ्रब रङ्से तोप्जे धूलो थमयूजे विरुद्धने गवाहीजे लागि फ्रूप्की।” 6 होर्दे थमयू छूर्दीदे गीली, मेस्ये सूगब खबर मीयूने प्रचार चीदे चीदे मेस्ये का-मुलुकजे नवयूने तम् चीदे चीदे त-तने गीलीदे। 7 अम्ब घटनाजे बारेने क्वाने तदेबे मूरुम् हेरोद अल्मल् पर्दीकदे, चेनेयलो सीयेब यूहन्ना सोम्बो क्यूत्देबे लङ ख्यङ् यदेबे कोइ-कोइदे य ख्य। 8 मेस्ये कोइदे यदे, “एलिया तङ्र ख्यङ्”, होर्दे सूजोयूदे यदे, “मीयूङ्जे अगमवक्तायू नङ्ने त्या सोम्बो क्यूत्देबे लङ्र ख्यङ्।” 9 होर्दे हेरोददे यदे, “यूहन्नाजे ट ङैदे चसे पीन्दे, तर ङू सू टूङ् हम्बजे बारेने ङैदे येर पोयू तख्यङ्?” होर्दे हेरोददे ङूने त्वब सेम् चीत्दे। हजार ङ मीने येशूदे चसे पीनब मत्ती १४:१३-२१ ; मर्कूस ६:३०-४४ ; यूहन्ना ६:५-१३ 10 होर्दे मूल स्यूस्स्यायू ल्वारदेबे थमयूदे चेब कामयू क्वाने येशूने स्योत्दे। ङूदे थमयूने प्रे-प्रे टेल्देबे बेथसेदा यब सहरने आलाक्के गीलीदे। 11 तर अम्ब था प्रेत्देबे मीहुल येशूजे ङ्ये-ङ्ये रदे। ङूदे थमयूने स्वागत चीत्दे, मेस्ये परमेश्वरजे राज्यजे बारेने स्योत्दे, मेस्ये सू-सूने तम् चीम्मे पर्दे ख्य थमयूने तम् चीम्मीदे। 12 जेम्से मीया नूम्ब मेल्गीदी, मेस्ये बाह्र जनादे रदेबे ङूने यदे, “मीहुलने प्रस्ये पीन्, मेस्ये थमयू गीलीदेबे तीला छोलाजे तने बास टूङ्देबे चसेयू रङ्सेदेने तयार चीस्स्य, चेनेयलो अन्-याने ङीन मी अन्टोङब याङ्-यूङ् नेने ख्यङ्।” 13 तर येशूदे थमयूने यदे, “नमयूदेने थमयूने चसे पीन्।” होर्दे थमयूदे यदे, “ङीयूप्रे क्यङ् ङ मेस्ये ङ ङ्ही त्या ख्यङ्, अन्क्यूल्लो ङी प्रदेबे अम्ब खोत्ताजे लागि चसे कीन पर्दीय। 14 थमयू अन्दाजि: हजार ङला पतीयू ख्य। होर्दे येशूदे रङ्से स्यूस्स्यायूने यदे, “थमयूने ङ्यील्लङ्दे च्यू-च्यूजे तती मील्लीदेबे टूङ्से पीन्।” 15 थमयूदे होरेने चीत्दे, मेस्ये क्वाने टूङ्से पीन्दे। 16 होर्दे येशूदे हम्ब क्यङ् ङप्रे ङ ङ्ही टेल्देबे स्वर्ग तेले लेत्देबे असी पीन्दे, मेस्ये क्योत्देबे मीयूने कोम्मी यदेबे स्यूस्स्यायूने पीन्दे। 17 होर्दे खोत्तादेने चदे, कदे, मेस्ये स्यूस्स्यायूदे लम् रब ढूटूमूटू बाह्र टोलो रूप् पूत्दे। पत्रुसजे स्वीकार मत्ती १६:१३-१९ ; मर्कूस ८:२७-२९ 18 त्याफे येशू ङू त्याने प्रार्थना चीन्न ख्य, स्यूस्स्यायू ङूप्रे ख्य, मेस्ये ङूदे थमयूने लोत्दे, “मीयूदे ङैने सू य टोङ्?” 19 थमयूदे यदे, “कोइदे बप्तिस्मा-पीनब यूहन्ना य ख्यङ्, कोइदे एलिया, मेस्ये सूजोयूदे य ख्यङ्, मीयूङ्जे अगमवक्तायू नङ्ने त्या सोम्बो क्यूत्देबे फेरि लङ्र ख्यङ्।” 20 येशूदे थमयूने यदे, “तर नमयूब च यीय? ङ सू?” होर्दे पत्रुसदे जवाफ पीन्दे, “परमेश्वरजे ख्रीष्ट!” 21 होर्दे येशूदे थमयूने आज्ञा पीन्दे, अम्ब पो सूनेये अन्स्योल्लाची, यदेबे बोङ्बे आर्दीयीदे। 22 होर्दे येशूदे यदे, “मीजे चदे कूम छर्ङ् चेपर्दे ख्यङ्, मेस्ये ङू धर्म-गुरुयू, पूस्र्या केन्यू मेस्ये पन्डेयूदे योम्बीय, सेक्कीय, मेस्ये सोम्-म्याङ्यीने लास सोम्बो क्यूत्देबे लङ्रीय।” 23 होर्दे येशूदे खोत्तानेने यदे, “सू ङै ङ्येदे रब सेम् चीक्क्य यलो ङूदे रङ्सेने माया मर्दीस्य, मेस्ये येतार्ने रङ्सेजे क्रूस प्लेत्देबे ङैजे ङ्येदे रस्य। 24 चेनेयलो सूदे रङ्से प्राण चूक्देब सेम् चीक्क्य, ङूदे हम्ब मल्गीय। सूदे ङैजे लागि रङ्सेजे प्राण पीन्क्य, ङूदे हम्ब जूक्तीय। 25 चेनेयलो पूरा संसार प्रेत्देबे रङ्सेनेब नाश चीक्क्य या मल्बीय यलो मीने च फाइदा क्यूक्क्य स्व? 26 तर सू ङ मेस्ये ङैजे वचनप्रे त्वाय यलो मीजे चये ङूजे महिमाप्रे पजे मेस्ये पवित्र स्वर्गदूतयूजे महिमाने रब ङूप्रे त्वाय। 27 तर तम्दम्ने ङ नमयूने यीय, अने मेर्नबयू कोइ-कोइ ख्यङ्, सूदे परमेश्वरजे राज्य तङयली खूम् सीबस्ये त्वो।” येशूजे रूप् फेर्दीयेब मत्ती १७:१-८ ; मर्कूस ९:२-८ 28 येशूदे अम्ब पोयू क्यम्कङ्येदे अन्दाजि: येर्याला ङ्येदे पत्रुस यूहन्ना प्रे याकूबने रङ्सेप्रे स्योल्गीदेबे प्रार्थना चेने येशू गङ् फ्याने टदे। 29 येशूदे प्रार्थना चीन्नूब ङूजे त्वाजे रूप् फेरदीयी मेस्ये ङूदे ह्वोदेब कोला बिजूली चेम्कीदेप्र ओथ्याङ् क्यूरी। 30 होर्दे ङूप्रे मी ङ्ही बात् सेन्न ख्य, थमयू मोशाप्रे एलिया ख्य। 31 थमयू महिमित रूप्ने तङ्रदे येशू सीबबजे बारेने बात् सेन्न ख्य। अम्ब पो ङूदे यरूशलेमने पूरा चे पर्दे ख्य। 32 होर्दे पत्रुस मेस्ये ङूप्रे ख्यबयू ङ्यूम्म्यादे ङ्योल्क ख्य। तर थेल्ल ङ्येदे थमयूदे ङूजे महिमाप्रे ङूप्रे मेर्नब हम्ब मी ङ्हीने तङ्दे। 33 होर्दे हम्ब मी ङ्ही ङूप्रे बिदा क्यूत्देबे प्र मैब पत्रुसदे येशूने यदे, “गुरुज्यू, ङी अयाने टूङब सोरो ज्य ख्यङ्। ङीन टूङब कीम् सोम् बन्दीदे-त्या नैजे लागि, त्या मोशाजे लागि, मेस्ये त्या एलियाजे लागि।” रङ्सेदे यब पोजे ङूने पत्तने त्व ख्य। 34 पत्रुसदे अम्ब पो येनूब मूक्प छीत्या रदेबे थमयू क्वानेने उप्कीदे, मेस्ये मूक्प थमयू फ्याने रब स्यूस्स्यायू फैगदे। 35 होर्दे मूक्पदे येर यब आवाज त्या योङ्रदे, “ङू ङैजे च ख्यङ्, ङूने ङैदे सेल ख्यङ्। ङूजे वचन ङ्यीन्।” 36 अम्ब पो त-मेस्ये येशू हैयाने ङूतीत्या क्यूत्दे। थमयू चैये अन्-यलाबे टूङ्दे, मेस्ये थमयूदे तङब पोयू हम्ब दिनने सूनेये अन्स्य्वे। दुष्ट आत्मा लादीकब स्योर्ब मत्ती १७:१४-१८ ; मर्कूस ९:१४-२७ 37 नैदेरेदे येशूप्रे ङूजे स्यूस्स्यायू गङ्दे मो ल्वारदे, मीहुल केन्त्या ङूने त्वने रदे। 38 मीहुल नङ्दे मीत्यादे बोङ्बे पारा पूत्देबे यदे, “गुरुज्यू ङ नने बिन्ती चीक्क्य, ङै च फ्याने कृपा चीम्मी। चेनेयलो हम्ब ङैजे तीत्या त्या च ख्यङ्। 39 ले, दुष्ट आत्मा त्यादे ङूने चूङ्क्य, मेस्ये हम्ब त्याफेने बोङ्बे पारा पूक्क्य, मेस्ये ङू मोङ्थीर् प्रस्ये पीन्क्य ङूजे ङूर्दे पोज्या योन्क्य। ङूने ती लम्बछार् चीत्देबे बल्ल-बल्लम क्यापीय। 40 हम्ब दुष्ट आत्मा ने योम्बे पर्दीदे यदेबे ङैदे नैजे स्यूस्स्यायूप्रे बिन्ती चीत्दे, तर थमयूदे अन्खू।” 41 होर्दे येशूदे जवाफ पीन्दे, “ओ विश्वास अन्चे मेस्ये सेम् कोङब पुस्ता, ङ कोला सेमे नमयूप्रे टूङ, मेस्ये नमयूने कोलासेमे सैदे स्व? नैजे च येने सीक।” 42 तर ङू रेनूब छेत्जे आत्मादे ङूने चूङ्देबे क्यर्बीदे, मेस्ये ङ्व कर्याक् कूरूक् चीक्कीदे। येशूदे हम्ब अशुद्ध आत्माने ङर्पीदे, मेस्ये हम्ब पीचने तम् चीत्देबे ङूजे पने पीम्पीदे। 43 परमेश्वर येर केन् शक्ति तङ्देबे हैयाने ख्यब मीयू खोत्ताने हार्मन्दीकदे। येशूदे चेब त्यात्या कामदे मीयू क्वाने हार्मन्दीकब तङ्देबे, ङूदे रङ्से स्यूस्स्यायूने यदे, 44 “अम्ब पो नमयूजे नने कोनूस्य, चेनेयलो मीजे च मीयूजे लाने चूङ्के मै ख्यङ्।” 45 तर थमयूदे अम्ब पो अङ्को। चेनेयलो थमयूदे अम्ब पो अङ्कोस्य यदेबे थमयू ट्यादे नङ्सू हीते ख्य। थमयू अम्बजे बारेने ङूने ल्वेने फ ख्य। सू केन्? मत्ती १८:१-५ ; मर्कूस ९:३३-४० 46 हन्छ्वाब थमयू नङ्ने पात्ता केन् सू यब बारेने त्या-त्या च्यदे। 47 तर येशूदे थमयूजे सेम्जे पो था प्रेत्देबे पीच त्या टेल्देबे रङ्से ट्याने येत्दे, 48 थमयूने यदे, “सूदे ङैजे मीन्ने अम्ब बल्खने ग्रहण चीक्क्य, ङूदे ङैने ग्रहण चीक्क्य, मेस्ये सूदे ङैने ग्रहण चीक्क्य, ङूदे ङैने कूल्बेबनेये ग्रहण चीक्क्य। चेनेयलो नमयू नङ्ने सू पात्ता चीद ख्यङ्, हम्बने पात्ता केन् क्यूक्क्य।” 49 होर्दे यूहन्नादे यदे, “गुरुज्यू, मी त्यादे नैजे मीन्ने छेत्यू योन्नब ङीदे तङ्दे, मेस्ये ङीदे हम्ब काम रोक्तीदे। चेनेयलो ङूदे ङीयूप्रे नदे यप्र अन्ची।” 50 तर येशूदे ङूने यदे, “ङूने चीस्से अम्पीन् अन्चील्लाची, चेनेयलो सू नैजे विरुद्धने त्वो, हम्ब नैजे पक्षने क्यूक्क्य।” सामारीयूदे चेब विरोध 51 येशूजे स्वर्ग प्रब बील ट्याने फ्योरब ङूदे यरूशलेमने प्रब पक्क चीत्दे। 52 होर्दे ङूदे खबर टेल्गेब मीयूने खूम्ने कूल्बीदे। थमयू गीलीदे, मेस्ये ङूजे लागि साप्ताने तयार चेने सामरीयूजे त त्याने क्योइदे। 53 तर येशू यरूशलेमतेले प्रब ङूजे पक्क विचार था प्रेत्देबे थमयूदे ङूने स्वागत अन्ची। 54 होर्दे अम्ब तङ्देबे येशूजे स्यूस्स्यायू याकूबप्रे यूहन्नादे यदे, “प्रभुज्यू, च न इच्छा चीक्क्या स्व यी स्वर्गदे मी तल्देबे अम्बयू भस्सम् क्यूस्स्य यदेबे ङी आज्ञा चीत्दा?” 55 तर ल्वारदेबे ङूदे थमयूने ङर्दे। 56 होर्दे थमयू सूजो त तेले गीलीदे। विश्वासीयूदे फा पर्देब लू मत्ती ८:१९-२२ 57 थमयू लम्ने प्रेनूब, मी त्यादे येशूने यदे, “ओ प्रभु, न केने प्र ङैये नैजे ङ्ये-ङ्ये प्रीय।” 58 होर्दे येशूदे ङूने यदे, “ओवजे क्य्वब फोङ् ख्यङ्, मेस्ये मूने स्यूनब ययूजे चङ् ख्यङ्, तर मीजे चजे ट येनब नेत्याये त्वो।” 59 ङूदे सूजो त्याबने यदे, “ङैजे ङ्येदे ख।” तर हम्ब मीदे यदे, “खूम् ङैजे पने बोपने प्रसे पीन्।” 60 ङूदे ङूने जवाफ पीन्दे, “लासयूने रङ्से लास बोप्स्येपीन्, तर न प्रदेबे परमेश्वरजे राज्यजे सूगब खबर प्रचार ची।” 61 सूजोदेये यदे, “प्रभु, ङ नैजे ङ्येदे रीय, तर खूम् ङैजे रङ्से कीम्ने ख्यबयूप्रे ङैने बिदा चीस्से पीन्।” 62 तर येशूदे ङूने यदे, “रङ्से ला हलोने चूङ्देबे ङ्येलम् ल्वादेबे लेब सूमीये परमेश्वरजे राज्यजे लायकजे अन्क्यूर्।” |
Ghale New Testament © Nepal Bible Society, 2011.
Nepal Bible Society