लूका 23 - घले नयाँ करारपिलातस मेस्ये हेरोदजे खूम्ने येशू मत्ती २७:११-२६ ; मर्कूस १५:१-१५ ; यूहन्ना १८:२८-४० ; १९:१-१६ 1 सभा केन्जे मीयू क्वाने लङ्दे, मेस्ये येशूने पिलातस ट्याने रेत्दे। 2 थमयूदे येशू फ्याने येरे यदेबे दोष चेने सुरु चीत्दे, “अम्ब मीदे ङीनजे देश नोङ्बे मैब पो ङीदे था प्रेत्दे। ङूदे कैसरने स्यर्म अम्फालाची यदेबे ङीने रोक्ते ख्यङ्, रङ्सेनेब ‘ङ ख्रीष्ट, तीत्या मूरुम् ख्यङ्’ यदेबे यख्यङ्।” 3 होर्दे पिलातसदे येशूने लोत्दे, “न यहूदीयूजे मूरुम् औ?” येशूदे जवाफ पीन्दे, “नदेने होरे यख्यङ्।” 4 होर्दे पिलातसदे पूस्र्या केन्यू मेस्ये मी हुलयूने यदे, “ङैदे अम्ब मीने चैत्याये दोष अन्तङ्।” 5 तर थमयूदे सोरो बोङ् चीत्देबे यदे, “अम्बदे यहूदिया का-मुलुकने, गालीलदेमेस्ये अम्ब नेसेमे शिक्षा पीन्देबे मीयूने नोङ्बीन ख्यङ्। 6 तर पिलातसदे अम्ब पो तदेबे, ‘अम्ब मी गालीलजे यीर’ यदेबे लोत्दे’ 7 होर्दे येशू, हेरोदजे हुकुम चीन्नब नैजे मी टूङ् यब था प्रेत्देबे पिलातसदे ङूने हेरोद ट्याने कूल्बीदे। हम्ब दिनने हेरोदये यरूशलेमने ख्य। 8 येशूने तङप्रेप्प हेरोद सोरो सूग्दे। चेनेयलो ङूदे ङूजे बारेने पोयू त ख्य मेस्ये खूम्मेस्येने ङूने लेप्पस्ये मन्न ख्य, मेस्ये ङूदे सोरो हार्मन्देब काम चेब लेने आशा चेख्य। 9 ङूदे येशूने कूम पोयू लोत्दे, तर ङूदे ङूने चैत्याये जवाफ अम्पीन्। 10 केन् पूस्र्यायू मेस्ये पन्डेयूदे हैयाने मेर्देबे येशूने बेस्से दोष लैदीदे। 11 हेरोददे रङ्से सिपाईयूप्रे मील्लीदेबे येशूजे न पूत्दे, मेस्ये ङूने खिसी चीत्दे, होर्देङ्येदे ङूने मूरुम्दे ह्वेप्र कोला होम्मीदेबे पिलातस ट्याने ल्वाबीदे। 12 हम्ब दिनने हेरोद मेस्ये पिलातस ङ्हीने ख्योन् क्यूत्दे। चेनेयलो थमयूजे अन्द्रने खूम्ब शत्रु ख्य। 13 होर्दे पिलातसदे केन् पूस्र्यायू, हुकुम चील्लेयू, मेस्ये मीयूने रूप् पूत्दे। 14 ङूदे थमयूने यदे, “नमयूदे मीयू नोङब यदेबे ङू ङै ट्याने रेत्दे। नमयूजे खूम्दे खैर्दीब नमयूदे ङूफ्याने लैदेब पोजे दोष चैत्याये अम्प्रे। 15 हेरोददेये दोष चैत्याये अन्तू, चेनेयलो ङूदे ङी ट्यानेने येशू ल्वाबीदे। जेम्से ले, ङूदे ‘सेब दण्ड प्रेब खल्जे चैये कामये अन्चीक्क टोङ्। 16 होरेक्यूत्देबे ङ ङूने मारङ् चीत्देबे क्यापीय।” 17 [दीन्बरजे मौकाने थमयूजे लागि पिलातसदे झ्यालखानने ख्यब मी त्या क्याबे पर्दे ख्य।] 18 थमयू क्वाने त्याफेने येरे यदेबे पारापूत्दे, “अम्बने हर्दीबी, मेस्ये ङीजे लागि बारब्बाने क्यापी।” 19 बारब्बाब सहरने हुलदङ्गा मच्देब मेस्ये मी सेक्कब कारणदे झ्यालखानने स्योप्ये ख्य। 20 येशूने क्याबेस्ये मन्देबे पिलातसदे मीयूने फेरि होम्दे। 21 तर थमयू येरे यदेबे पारा पून्नूदे, ‘क्रूसने खील् ठोक्दीदेबे पील्बी, क्रूसने खील् ठोक्दीदेबे ङूने पील्बी।” 22 होर्दे सोम्खेप्जे पोलोने थमयूने यदे, ‘‘चेने? अम्ब मीदे च अन्ज्य काम चीक्क ख्य औ स्व? ङैदेब ङूने सेब खल्जे कारण चैत्याये अम्प्रे, होरेक्यूत्देबे ङ ङूने मारङ् चीत्देबे क्यापीय।” 23 तर थमयूदे बोङ्बे पारा पूत्देबे येशूने क्रूसने पीलने पर्दीय यदे। येर्बे थमयूजे पोदे ट्यादे। 24 होर्दे पिलातसदे थमयूदे यब पो क्वाने पूरा चेब फैसला स्योम्मीदे। 25 ङूदे हम्ब हुलदङ्गा मच्दीबे मी सेब कैदी बारब्बाने क्यापीदे, मेस्ये येशूनेब थमयूजे इच्छाने सूम्दीबीदे। येशू क्रूसने पीलब मत्ती २७:३२-४४ ; मर्कूस १५:२१-३२ ; यूहन्ना १९:१७-२७ 26 थमयूदे येशूने हैयादे कूदीब, तदे रेनब कुरेनीजे सिमोन यब मीने चूङ्दे, मेस्ये क्रूस प्लेत्देबे ङूजे ङ्ये-ङ्ये प्रस्ये पीन्दे। 27 मीयूजे हुल केन् येशूजे ङ्येदे गीलीदे। होने मदीयूये ख्य, थमयू अन्सूग्देबे ङून ख्य। 28 तर थमयू तेले ल्वादेबे येशूदे यदे, “यरूशलेमजे चीमी, ङैजे लागि अङ्-ङूलाची, तर नमयूजे रङ्से लागि मेस्ये रङ्से च-चीमीजे लागि ङू। 29 चेनेयलो हम्ब दिन रीय, हन्छ्वाब मीयूदे यीय, ‘थर मदीयू प्रे ख्वाजेने पीच क्यूर अङ्ख्वब मेस्ये ज्यू अन्तूबयूदे असी प्रेक्क ख्यङ्।’ 30 हन्छ्वाब थमयूदे गङ्यूने ‘ङी फ्याने तल्ख’ मेस्ये चीद गङ्यूने ‘ङीने उप्’ यदेबे यमेय। 31 चेनेयलो थमयूदे तोङ्बो ङ्येछ्याङ् क्यूप्प अम्ब काम चीक्क्य यलो, खर् क्यूप्प च चीक्क्य?” 32 होर्दे थमयूदे अपराध चेबयू ङ्हीने येशूप्रेने सेने स्योल्गीदे। 33 होर्दे थमयू खप्परे यब नेने फ्योरदे। हैयाने थमयूदे येशूने क्रूसने खील् ठोक्दीदेबे पील्दे, मेस्ये हम्ब अपराध चेबयूनङ्ने त्या येशूजे स्येत्तेयोर् मेस्ये त्या ङूजे योन्देयोर क्रूसने खील् ठोक्दीदेबे पील्दे। 34 मेस्ये येशूदे यदे, “प, थमयूने क्षमा पीन्, चेनेयलो थमयूदे च चीन्न ख्य यदेबे अन्स्ये।” होर्दे थमयूदे येशूजे कोला भा कोत्देबे चीट्ठ थादे। 35 मीयू मेर्देबे लेन्न ख्य। हुकुम चील्लेब मीयूदे येशूजे न पूत्देबे यदे, “ङूदे सूजोयूने चूक्दीमीदे, अम्ब परमेश्वरजे ख्रीष्ट या ङूदे सेलब मी यलो ङूदे रङ्सेने चूक्दीस्य।” 36 सिपाईयू रदेबे अङ्गुरजे क्यूङ् ची पीने पीने खिसी चीत्दे, 37 “न यहूदीयूजे मूरुम् यलो रङ्सेने जूक्दी।” 38 “अम्ब यहूदीयूजे मूरुम् ख्यङ्” यबदे लिख्दीयेब दोषजे पोये येशूजे तोलाने ख्य। 39 क्रूसने पीलेब अपराध चेबयूनङ्ने त्यादे येशूने हेप्दीदेबे यदे, “च न ख्रीष्ट ते या? न रङ्सेने मेस्ये ङीनेये चूक्दीमी।” 40 तर ङूने ङर्देबे सूजोदे जवाफ पीन्दे, “नेये हम्ब सजाइ भोक्तीन ख्यङ्, अझ परमेश्वरप्रे अम्फ? 41 ङीनदे अन्ज्य काम चीक्कदेबे अन्ज्य कामजे सजाइ भोक्तीन ख्यङ्, तर अम्ब मीदेब अन्ज्य काम चैत्याये अन्चीक्क।” 42 होर्दे ङूदे यदे, “येशू, न रङ्सेजे राज्यने रब ङैने ह्वे ची।” 43 येशूदे ङूने यदे, “ङ तम्दम्ने नने यीय, दीनीने न ङैप्रे स्वर्गलोकने प्रीय।” येशू सीयेब मत्ती २७:४५-५६ ; मर्कूस १५:३३-४१ ; यूहन्ना १९:२८-३० 44 अन्दाजि: नोजे बाह्र तप ख्य, मेस्ये सोम् तप्दासेमे का-मुलुक देशने मून्दूङ् क्यूत्दे। 45 मीयाजे ओथ्याङ् छीत्या क्यूरी, मेस्ये मन्दिरजे पर्दा प्र्याङ्गीदेबे अन्द्रगूङ्ने फास्य ङ्ही क्यूरी। 46 बोङ्बे के योन्देबे येशूदे यदे, “प, ङ ङैजे आत्मा नैजे लाने सूम्दीपीय।” हन्छ्वा यदेबे ङूदे दियो पूत्दे। 47 अम्ब घटना तङ्देबे कप्तानदे येरे यदेबे परमेश्वरजे महिमा चीत्दे, “पक्कने ङू धर्मिक मी टूङ्।” 48 अम्ब घटना लेने फूङ् क्यूरब मीयू क्वाने अम्ब तङ्देबे ङूये-ङूये रङ्से रङ्सेजे गू ठरीदे कीम्ने ल्वाइदे। 49 तर येशूदे स्येब मीयू प्रे गालीलदे ङूजे ङ्येदे रब मदीयूदे चीन्तङ्ने मेर्देबे अम्ब घटनायू लेन्नूदे। येशूने बोपब-काम मत्ती २७:५७-६१ ; मर्कूस १५:४२-४७ ; यूहन्ना १९:३८-४२ 50 योसेफ यब ज्य मी मेस्ये धर्मी त्या ख्य। ङू पात्ता केन् सभाजेये सदस्य ख्य। 51 ङूदे थमयूजे मोतो मेस्ये कामने क्यूक्क्य यदेबे अन्-य ख्य। ङू यहूदीयूजे अरिमाथिया सहरजे मी ख्य। ङू परमेश्वरजे राज्यजे लम् रेन्नख्य। 52 ङूदे पिलातस ट्याने गीलीदेबे येशूजे लास स्यदे। 53 येशूजे लास मो तल्देबे मल्मल्जे कोलादे फूर्दे, मेस्ये लूङ्ने खोप्तीदेबे बन्दीयेब खङ्सत्याने येत्दे, हैयाने कलङ्बेये सूत्याये अन्-ये ख्य। 54 हम्ब तयार चेब दिन ख्य, होर्दे आराम टूङब दिन सुरु क्यूर मैख्य। 55 गालीलदे येशूप्रे रब मदीयू ङ्ये-ङ्ये गीली, मेस्ये हम्ब खङ्स लेत्दे, ङूजे लास केर्बे हीत्दे हम्ब तङ्दे। 56 होर्दे ल्वारदेबे थमयूदे मग्मग् बस् रब मूर्गू मेस्ये अत्तरयू तयार चीत्दे। होर्दे मोशाजे नियमजे आज्ञा अनुसार आराम टूङब दिनने थमयूदे आराम टूङ्दे। |
Ghale New Testament © Nepal Bible Society, 2011.
Nepal Bible Society