लूका 21 - घले नयाँ करारप्ल्यङ् सीयेब मदीजे भेटी मर्कूस १२:४१-४४ 1 येशूदे लेप्प फ्योबो मीयूदे रङ्से-रङ्से भेटी मन्दिरजे बक्सने प्वेब तङ्दे। 2 येशूदे दूख्प्रे प्ल्यङ् सीयेब मदी त्यादे हैयाने नोर् ङ्ही चेर्देबये तङ्दे। 3 होर्दे येशूदे यदे, “तम्दम्ने ङ नमयूने यीय, अम्ब दूख्प्रेब प्ल्यङ् सीयेब मदीदे सूजोयूदे यली थेप् चेर्दे ख्यङ्। 4 चेनेयलो थमयू क्वादेने रङ्सेप्रे ख्यब कूमदे भेटी चेर्ते ख्यङ्, तर अम्बदे ब रङ्से दूख्प्रे ख्याङ्ली रङ्से जीयाजे लागि चब खर्चने चेर्दीबीदे।” आखिरी दिनजे च्यूनूयू मत्ती २४:१-४१ ; मर्कूस १३:१-३१ 5 जेम्से कोइ-कोइदे ज्य-ज्य लूङ्यू मेस्ये दान प्रेब सामानयूदे झिलीमिली चीतेब मन्दिरजे बारेने बात् चे मैदे। येशूदे यदे, 6 “नमयूदे च तङ्न ख्यङ्, येर सेमेये रीय लूङ् त्या-ङने सूजो लूङ्ये बाँकी अन्टोङ्, हम्ब क्वाने हूलबीय।” 7 थमयूदे येशूने लोत्दे, “गुरुज्यू, येर क्वाने कलङ् क्यूक्क्य? मेस्ये अम्ब पो क्यूट्ट मैब कर च्यूनू क्यूक्क्य?” 8 येशूदे यदे, “होस्स्यार ची, नमयूने सूदेये अम्फस्तीस्य। चेनेयलो कूम मीयू ङैजे मीन्ने ‘ङ ङूने ख्यङ्’ मेस्ये ‘सेमे ट्याने रख्यङ्,’ यदेबे यीय। थमयूजे ङ्येदे नमयू अन्लादीलाची। 9 नमयूदे लडाइँयू मेस्ये चीङब पोयू तैय हन्छ्वाब अम्फलाची, चेनेयलो खूम् येर घटनयू क्यूरने पर्दीय, तर हन्छ्वाबने तूरुन्तै अन्जेन्।” 10 होर्दे येशूदे थमयूने यदे, “राष्ट्रजे, राष्ट्रजे विरुद्धने, मेस्ये राज्य, राज्यजे विरुद्धने लङ्क्य। 11 का-मुलुकने सोरो फत्या केन् सूङ्गूयू, अनिकाल अन्ज्य बीदयू क्यूक्क्य, होर्दे मूदे मो सोरो फत्या सेयू मेस्ये केन्-केन् च्यूनूयू रीय। 12 “तर अम्ब पोयू क्वाने क्यूर यली खूम्, मीयूदे नमयूने चूङ्क्य, सतनम् चीक्क्य,’ मेस्ये नमयूने सभा-कीम्यूने सूम्दीपीय, र झ्यालखानने चङ्पीय। नमयूने ङैजे मीन्जे कारण मूरुम्यू प्रे हाकिमयूजे खूम्ने स्योल्गीदेबे मेर्से पीन्क्य। 13 तर नमयूजे लागि हम्ब बीलने ङैजे गवाही पीनब ज्य मौका क्यूक्क्य 14 होरेक्यूत्देबे रङ्से बच्देजे लागि च य यदेबे छीत्याये सूर्त चे अम्पर्दी। 15 चेनेयलो नमयूने ङैदे यर क्यमब पो मेस्ये बुद्धि पीन्क्य, अम्ब पोजे लागि नैजे शत्रुयूदेये चैत्याये य अन्खू होर्दे पो च अन्ख्व क्यूक्क्य। 16 तर नैजे प-म, अत-च्योन्यू, रङ्से मीयू मेस्ये ख्योन्यूदेये नमयूने चूङ्से पीन्क्य। नमयू नङ्ने कोइ-कोइने थमयूदे सेक्य। 17 ङैजे मीन्जे कारणदे नमयूने मीयू क्वादेने घिन चीक्क्य। 18 तर नमयूजे टजे फूत्याये नाश अन्क्यूप्प। 19 नमयूदे कूम धेरेन् क्यूत्देबे रेन्लो जीया प्रेक्क्य। 20 “तर कन्छ्वाब यरूशलेमने सिपाईयूदे घेर्देब तङ्क्य, हन्छ्वाब ङूजे नाश क्यूर बील ट्याने र ख्यङ् यदेबे था ची। 21 होर्दे यहूदियाने ख्यबयू गङ्यूतेले ग्येबस्य। सहरनङ्ने ख्यबयू फीने योङ्दे ग्येबस्य, मेस्ये फिजे तने ख्यबयू सहरनङ्ने अन्क्योरस्य। 22 चेनेयलो लिख्दीयेब पोयू क्वाने पूरा क्यूरने अम्ब खी फाब दिन क्यूक्क्य। 23 हम्ब दिनने पीच रब प्रे च्यू तूपब मदीयूजे लागि सोरो छरङ् क्यूक्क्य! चेनेयलो पृथ्वीने सकस् केन् रीय, मेस्ये अम्ब जात फ्याने छी चीक्क्य। 24 थमयू पार्ज्यादे सेक्कीय, मेस्ये देशयूने कैदी चीत्देबे कूबीय। होर्दे यहूदीतेब मीयूजे बील अन्रदासेमे थमयूदे यरूशलेमने तोप्दे छ्यदेबे येक्क्य। 25 “मीया, लीनी मेस्ये कर्चेन्यूने च्यूनू तङ्क्य, मेस्ये समुद्रजे गेर्जेदेब मेस्ये छालयूदे पृथ्वीजे राष्ट्रयू सकस्ने पर्दीदेबे कर्चे-कर्चे क्यूक्क्य। 26 संसारने ङ्येदे च-च घटनायूम क्यूट्टीय यब शङ्कादे मीयू फदेबे लोला प्रीय, चेनेयलो मूजे शक्तियू लीङ्क्य। 27 होर्देङ्येदे मीजे च शक्ति मेस्ये बेस्से केन् महिमाप्रे मूक्पने रेनब थमयूदे तङ्क्य। 28 कन्छ्वाब अम्ब पो क्यूर मैय हन्छ्वाब बोल्यो क्यूत्देबे रङ्से ट ठरो लङ्, चेनेयलो नमयूजे उद्धार छ्योटोने क्यूक्क्य।” 29 येशूदे थमयूने अम्ब उखान स्योत्दे: “अञ्जीरजे तङ्बो मेस्ये तङ्बोयू क्वाने ले, 30 तङ्बोदे पल्व योङ्रब तङ्देबे नमयू रङ्सेदेने था प्रेक्क्य, ड्वे रब बील ट्याने रख्यङ्। 31 होरप्रने नमयूये कलङ् अम्ब पो क्यूरब तङ्क्य, हन्छ्वाब परमेश्वरजे राज्य ट्याने र मेख्यङ् यदेबे से। 32 “तम्दम्ने, ङ नमयूने यीय, अम्ब घटनायू क्वाने पूरा अन्क्यूत्दासेमे अम्ब पुस्ता जेङ्कस्ये त्वो। 33 स्वर्ग मेस्ये पृथ्वी नाश क्यूत्देबे प्रीय, तर ङैजे वचन नाश अन्क्यूप्प। 34 “तर नमयू रङ्से बारेने होस्स्यार क्यूर्, न आनन्द-टूङ, ची, नादू थूङ प्रे अम्ब जीयाजे सूर्तदे नमयूजे सेम् प्लीक्कने, मेस्ये यूयूप्र त्याफेने हम्ब दिन नमयूफ्याने रने। 35 चेनेयलो येरप्रने पृथ्बीजे का-मुलुकने बास चेब मीयू क्वा फ्याने अम्ब रीय। 36 तर रमैब अम्ब पोयू क्वाप्रेने बच्दीदे छ्योङ्बजे लागि मेस्ये मीजे चजे खूम्दे मेर खूस्य यदेबे येतार्ने प्रार्थना चीत्देबे चङ्ख क्यूर्।” 37 येशूदे नोदे मन्दिरने शिक्षा पीन ख्य, मेस्ये मून्देब योङ्देबे जैतून गङ्ने मून् चख्य। 38 येशूजे वचन ङ्यीनने मीयू क्वाने नप्देने मन्दिरने र ख्य। |
Ghale New Testament © Nepal Bible Society, 2011.
Nepal Bible Society