लूका 16 - घले नयाँ करारचजो-पजो चेब सीपालू मी 1 येशूदे रङ्से स्यूस्स्यायूने यदे, “फ्योबो मीत्याजे चजो-पजो चेब मी त्या ख्य। ङूदे रङ्से मालिकजे धन-सम्पत्ति उर्दीन ख्यङ् यदेबे ङूजे विरुद्धने दोष लैदीक ख्य। 2 होर्दे मालिकदे ङूने कोदेबे यदे, ‘नैजे बारेने ङैदे चत्या पो त ख्यङ् हम्ब च? नैजे कामजे हिसाब ङैने स्ये। जेम्से मेस्ये न चजो-पजो चे प्रेस्स्ये त्वो।’ 3 “होर्दे चजो-पजो चेब मीदे रङ्से सेम्ने मन्दे, ‘जेम्से ङ कर्चे, चेनेयलो ङैजे मालिकदे ङैजे काम लेन मैख्यङ्। खोदेबे-यूदेबे चब ङैजे बोङ् त्वो, स्य्वाने ङ त्वा ख्यङ्। 4 जेम्से ङैदे च चे पर्दे ङैदे ह्वेचीक्क ख्यङ्। चजो-पजो चेब कामदे योम्बे ङ्येदे मीयूदे ङैने थमयूजे कीम्ने केरे स्वागत चीक्क्य हम्ब ङैदे पक्क चे ख्यङ्।’ 5 “होर्दे ङूदे मालिकजे छेर् ख्यब मीयू त्या-त्याने कोदे मेस्ये खूम्जेने यदे, ‘नने मालिकजे छेर् कोला ख्यङ्?’ 6 “ङूदे यदे, ‘हजार सोम् लिटर मूर्गू।’ “होर्दे चजो-पजो चेबदे ङूने यदे, ‘नैजे तमसुक सीक, मेस्ये टूङ्देबे छीट्टो पन्ध्र सै लिटर लिख्दी।’ 7 “होर्देङ्येदे ङूदे सूजोबने यदे, ‘नैजे छेर् कोला ख्यङ्?’ “ङूदे यदे, ‘सै सोम् पचास क्विन्टल ह्व।’ ङूदे ङूने यदे, ‘नैजे तमसुक सीक, मेस्ये सै सोम् क्विन्टल लिख्दी।’ 8 “जेम्से ङूजे मालिकदे बैमान चजो-पजो चेब मीजे सार्या चीत्दे, चेनेयलो ङूदे छट्टू काम चे ख्य। अम्ब संसारजे मीयू रङ्से पुस्ताजे मीयूप्रे व्यवहार चीप्प ओथ्याङ्जे छगूम्-पूर्गूम् यली झन् थेप् सिपलू क्यूक्क्य। 9 ङ नमयूने यीय, रङ्से लागि संसारजे धनदे ख्योन्यू बन्दी, मेस्ये कन्छ्वाब हम्ब धन जेङ्गीय, हन्छ्वाब थमयूदे नमयूने आनन्द टूङब नेने स्वागत चीस्स्य। 10 “सू चूक्लीत्या पोनेये ईमानदार क्यूक्क्य, हम्ब कूम पोनये ईमानदार क्यूक्क्य, मेस्ये सू चूक्लीत्या पोनेये बैमान क्यूक्क्य, हम्ब कूमनेये बैमान क्यूक्क्य। 11 होरेक्यूत्देबे नमयू संसारजे धनने ईमानदार क्यूर अन्खूलो, नमयूने तम्दम् धनजे जिम्मा सूदे पीन्क्य? 12 नमयू मीजे धनने ईमानदार क्यूर अन्खूलो, नमयूजे रङ्सेजे धन नमयूने सूदे पीन्क्य स्व? 13 “कम्ब त्वोदेये मालिक ङ्हीजे सेवा चे अन्खू, चेनेयलो ङूदे त्याने ह्यल चीत्देबे त्याबने प्रेम चीक्क्य, या ङू त्याजे भक्त क्यूत्देबे सूजोने छी चीक्क्य। नमयूदे परमेश्वरजे मेस्ये धन अम्ब ङ्हीजेने सेवा चे अन्खू।” 14 धनजे लोभी फरिसीयूदे अम्ब पोयू क्वाने ङ्यीन्देबे येशूने फ्योदे। 15 होर्दे येशूदे थमयूने यदे, “मीयूजे खूम्दे रङ्सेदेने धर्मी त्वेब नमयूने ख्यङ्, तर परमेश्वरदे नमयूजे सेम्जे पो स्ये ख्यङ्, चेनेयलो मीयूजे अन्द्रने कम्ब सोरो ज्य येन ख्य, परमेश्वरजे म्यादे हम्ब अन्ज्य ठर्दीय। 16 “बप्तिस्मा-पीनब यूहन्नाजे बीलसेमे मोशादे पीनब धर्मजे नियम मेस्ये अगमवक्तायूजे शिक्षा प्रचार चीत्दे। हम्ब बीलदे छोब परमेश्वरजे राज्यजे सूगब खबर स्योन्न ख्यङ्, होर्दे खोत्ताने हम्ब राज्य नङ्ने बोङ् चीत्देबे क्योबने धम चीन्न ख्यङ्। 17 तर परमेश्वरजे नियमजे चूक्लीत्या अक्षर मेल्ब यली स्वर्ग प्रे पृथ्वी मल्बने सूस्योलो ख्यङ्। 18 “सूदे रङ्से मजप्रे लम् प्रदेबे सूजोप्रे ङ्येन् चीक्क्य, ङूदे वेश्य काम चेब क्यूक्क्य, मेस्ये प्ल्यङ्दे पोङ्येब मदीने ङ्येन् चेब मीदेये वेश्य काम चेब क्यूक्क्य। फ्योबो मीप्रे लाजरस 19 “फ्योबो मी त्या ख्य, ङू सोरो मगो परदेब नरम् मलमलजे कोला होत्देबे येतार्ने मोजमजा चीत्देबे टूङ् ख्य। 20 तर ङूजे ख्योने लाजरस मीन्जे दूख्प्रेब मी त्याने रेत्देबे येम्मे ख्य। ङूजे ङ्वसेम् मदे-मत्या ख्य। 21 हम्ब फ्योबो मीजे टेबलदे सने तल्रब टाक्राटूक्रीयू चदेबे लाजरसदे रङ्से लो फ्याब सेम् चे ख्य। क्योयूदेये रदेबे ङूजे मयू ल्याख्य। 22 “हम्ब दूख्प्रेब मी सीइ मेस्ये स्वर्गदूतयूदे ङूने कूदीदेबे अब्राहाम ट्याने येत्दे। हम्ब फ्योबो मीये सीइ मेस्ये बोप्पीदे। 23 नरकने बेस्से सकस् भोक्तीनब बीलने ङूदे तो लेत्दे, मेस्ये चीन्तङ्ने अब्राहामप्रे लाजरसये तङ्दे। 24 होर्दे ङूदे बोङ्बे यदे, ‘ओ पाइ अब्राहाम, ङैने दया चीत्देबे लाजरसने कूल्बी च, मेस्ये ङूदे रङ्से ला ट क्यूने च्वादेबे ङैजे लीने सीतल चीम्मीस्य, चेनेयलो ङ अम्ब ह्वार् ह्वार् प्ल्याङ्नब मीने फत्या छरङ् प्रेन्न ख्यङ्।’ 25 “तर अब्राहामदे यदे, ‘च, याद ची, नदे रङ्से जीयाने ज्य-ज्य पोयू भोक्दीदे, होरप्रने लाजरसदे छरङ्जे-छरङ् त्या भोक्दीदे। ङू जेम्से अने आरामने ख्यङ्, मेस्ये नदेब छरङ् प्रेन्न ख्यङ्। 26 अम्ब पोयूत्यामे अन्-यादे हैयाने नैत्याने प्रमेबयू प्र अन्खूस्य मेस्ये हैयादे अन्छोने ङी ट्याने र अन्खूस्य यदेबे ङीयूप्रे नमयूजे अन्द्रने सोरो केन् लोम् ख्यङ्। 27 “ङूदे यदे, ‘पाइ, होरेक्यूत्देबे ङ नने बिन्ती चीक्क्य, नदे ङूने ङैजे पजे कीम्ने कूल्बी, 28 चेनेयलो ङैजे च्योन् ङ ख्यङ्, मेस्ये ङूदे थमयूने चेत्दीसे पीन्स्य, नत्र थमयूये अम्ब सकस्जे नेने रने।’ 29 “तर अब्राहामदे यदे, ‘थमयूप्रे मोशा मेस्ये अगमवक्तायूजे किताब ख्यङ्। थमयूदे हम्ब ङ्यीन्स्य।’ 30 “तर ङूदे यदे, ‘दी, पाइ अब्राहाम, सीयेबदे कोइ मीत्या थमयू ट्याने प्रलोब थमयूदे पश्चाताप चे-ख्यङ्दे।’ 31 “ङूदे ङूने यदे, ‘मोशा मेस्ये अगमवक्तायूजे पो थमयूदे अन्ङ्यीन्दे यलो, सीयेबयू नङ्ने कोइ सोम्बो क्यूल्लीने थमयूदे विश्वास चीस्येत्वो।” |
Ghale New Testament © Nepal Bible Society, 2011.
Nepal Bible Society