लूका 15 - घले नयाँ करारमेलेब स्वान्जे उखान मत्ती १८:१२-१४ 1 स्यर्म लङबयू मेस्ये पापीयू क्वाने येशूजे वचन ङ्यीनने ङूजे ट्याने रेन ख्य। 2 “अम्ब मीदे पापीयूने ग्रहण चे टोङ् मेस्ये थमयूप्रे च थूङ चेटोङ्” यदेबे फरिसीयू मेस्ये पन्डेयू गन्गन् चे मैदे। 3 होर्दे येशूदे थमयूने अम्ब उखान यदे: 4 “नमयू नङ्ने कम्ब मी ख्यङ्, ङूजे सैत्या स्वान्यू नङ्जे त्या मल्बब सील्लङ्दे उनीस् नानेने पोङ्देबे हम्ब मेलेब स्वान् त्या अम्प्रेत्दा सेमे ङूदे अम्मलया? 5 मेलेब स्वान् प्रेमेस्ये सूगे सूगे हम्बने रङ्से नीजीने रीन्जीक प्लेक्क्य, 6 मेस्ये कीम्ने रदेबे ङूदे रङ्से ख्योन्यू मेस्ये खीम्चेयूने कोदेबे थमयूने यीय, ‘ङैप्रे तङ्, चेनेयलो ङैदे ङैजे मलेब स्वान् प्रे ख्यङ्।’ 7 ङ नमयूने यीय, येर्बे पश्चाताप चे अम्पर्देब सील्लङ्दे उनीस् धर्मी मीयूजे लागि यली पश्चाताप चेब पापी त्याजे लागि स्वर्गने अझ थेप् आनन्द क्यूक्क्य। मेलेब मान्द्रामूलीजे उखान 8 “मदी त्याप्रे चाँदीजे मान्द्रामूली च्यू ख्य मेस्ये मान्द्रामूली त्या मल्बदेयलो च ङूदे हम्ब चाँदीजे मान्द्रामूली अम्प्रेत्दासेमे बत्ती नैन्देबे होर्दे कीम् फील्देबे बेस्से धमचीत्देबे अम्मलया? 9 मेलेब मान्द्रमूली प्रेमेस्ये ङूदे रङ्से ख्योन्यू मेस्ये खीम्चेयूने कोदेबे यीय, ‘ङैप्रे तङ्, चेनेयलो ङैदे ङैजे मेलेब मान्द्रमूली प्रे ख्यङ्।’ 10 ङ नमयूने यीय, येर्बेने पश्चात्ताप चेब पापी त्याजे लागि परमेश्वरजे स्वर्गदूतयूजे खूम्ने सोरो आनन्द क्यूक्क्य।” मेलेब चजे उखान 11 येशूदे यदे, “मी त्याजे च ङ्ही ख्य। 12 कन्छ चदे पने यदे, ‘पाइ, ङैजे भाने पर्देब अंश ङैने स्ये।’ होर्दे ङूदे रङ्से सम्पत्ति थमयूने कोम्मीदे।” 13 “तेदिन ङ्येदेने धन-सम्पत्ति क्वाने फूङ् पूत्देबे च कन्छ चीन्तङ् देशने गीली, मेस्ये हैयाने मज्जा चीत्देबे रङ्से सम्पत्ति उर्तीदे। 14 ङूदे ङूप्रे ख्यब नोर् नोर्यू क्वाने खर्च चेजेङ्कदे। हन्छ्वा बीलने हम्ब देशने अनिकाल केन् क्यूत्दे, मेस्ये ङूने अम्पूग्दे क्यूरमेदे। 15 ङू गीलीदेबे हम्ब देशजे मी ट्याने काम स्यदे। ङूदे ङूने रङ्से रङ्ने पायू छने कूल्बीदे। 16 पादे चब चसे चदेबे ङूदे रङ्से लो फ्याला चेमे ख्य होर्दे सूदेये ङूने चैत्याये अम्पीन ख्य। 17 “कन्छ्वाब ङूजे चेत रदे, ङूदे यदे, ‘ङैजे पजे मेलाने काम फरब कूम त्वोयू कलाबे चदेबे लमये रख्यङ्, तर ङब ठीदेबे सीब मेल्न ख्यङ्। 18 ङ लङ्देबे ङैजे प ट्याने प्रीय, मेस्ये ङूने यीय, “पाइ, ङैदे स्वर्गजे विरुद्धने मेस्ये नैजे विरुद्धने पाप चीक्क ख्यङ्। 19 जेम्से मेस्ये ङ नैजे च यब लायकजे त्वो। ङैने नैजे मेलाने काम फरब त्वोयू सर चीत्देबे टूङ्से पीनो”।’ 20 होर्दे ङू लङ्देबे रङ्से प ट्याने गीलीदे। “तर ङू चीन्तङ् ख्यङ्बने ङूजे पदे ङूने तङ्कदे होर्दे बेस्से ङ्येम्कदे मेस्ये ग्येइदेबे लादे हाथम्देबे म्वाँइ चीत्दे। 21 “चदे ङूने यदे, ‘पाइ, ङैदे स्वर्गजे विरुद्धने मेस्ये नैजे विरुद्धने पाप चीक्क ख्यङ्। ङ फेरि नैजे च यब लायकजे त्वो।’ 22 “तर पदे रङ्से त्वोयूने यदे, ‘छ्योट्टो पात्ता ज्य कोला रेत्देबे ङूने होम्मी। ङूजे ला औंलाने औँठी, मेस्ये तोप्ने पैङ्गी होम्मी, 23 चूलाचीतेब खोर्ब त्या रेत्देबे से मेस्ये चदेबे ङीन आनन्द चीदे। 24 चेनेयलो अम्ब ङैजे च सीये ख्य, फेरि सोम्बो क्यूर ख्यङ्, मले ख्य मेस्ये प्रे-ख्यङ्।’ होर्दे थमयू आनन्द चेमेदे। 25 “हन्छ्वाब ङूजे च केन् रङ्ने ख्य मेस्ये ङू कीम् ट्याने फ्योरब ङूदे स्य-प्रू प्वेब के तदे। 26 ङूदे त्वोयू नङ्जे त्याने ङू ट्याने कोदेबे ‘अने च क्यून्न? यदेबे लोत्दे। 27 “ङूदे ङूने यदे, ‘नैजे च्योन् फ्योरदे मेस्ये नैजे पदे स्वोत्देबे चूलाबे चीतेब खोर्ब त्या सेत्दे चेनेयलो ङूदे ङूने चेलाबे न-छ चैत्याये अन्क्यूल्लाबे ल्वारब तूदे।’ 28 “तर ङू छी लङ्दे मेस्ये नङ्ने प्र अन्ङ्यीन्, ङूजे पदे फीने गीलीदेबे ङूने होमने बोङ् चीदे। 29 तर ङूदे पने यदे, ‘ले, अन्छ्वा वर्षसेमे ङैदे त्वोप्र क्यूत्देबे नैजे सेवा चीन्न ख्यङ् होर्दे नैजे आज्ञा कलङ्बेये अम्मन्दे अन्ची, होरनेयली ङैदे रङ्से ख्योन्यूप्रे आनन्द मन्देने नदे कलङ्बेये ङैने चीद ल्वाजे पीच त्याये अम्पीन्। 30 तर नैजे सम्पत्ति वेश्ययूप्रे उर्दीदेबे नैजे च रब च्वब खोर्ब त्या ङूजे लागि सेत्दे।’ 31 “होर्दे पदे ङूने यदे, ‘च, नब ङैप्रे येतार्ने टून ख्यङ्, होर्दे ङैजे सम्पत्तियू क्वाने नैजेने। 32 तर ङीन सूग पर्देब मेस्ये आनन्द चेब पर्देब ठीक्ने ख्य, चेनेयलो अम्ब नैजे च्योन् सीये ख्य, फेरि सोम्बो क्यूट्ट ख्यङ्, मेले ख्य तर चूजो प्रे ख्यङ्’।” |
Ghale New Testament © Nepal Bible Society, 2011.
Nepal Bible Society