लूका 12 - घले नयाँ करारबोङ्बे आर्तेब मेस्ये बोङ्पीनब मत्ती १०:२६-३३ 1 हन्छ्वाब हजारदे हजार मीहुल रूप् क्यूत्दे, अन्छ्वासेमे क्यूत्दे यी आठे-आठे क्यूत्दे त्यादे त्याने छ्य मेदे, येशूदे खूम् ङूजे स्यूस्स्यायूने यने सुरु चीत्दे, “नमयू फरिसीयूजे क्यङ् पूलाबे चेब खमिरदे होस्स्यार क्यूर। हम्ब खमिर थमयूजे कप्टी व्यवहार ख्यङ्। 2 उप्देबे हीतेब से चैये अन्तङ् क्यूस्से त्वो, हम्ब तङने तङ्क्य, मेस्ये फूदेबे था अम्प्रेब से चेये त्वो, हम्ब क्वाने था प्रेक्क्य। 3 होरेक्यूत्देबे च नमयूदे मून्दूङ्ने य ख्य, हम्ब ओथ्याङ्ने तैय। नङ्सू कोठाने आलाक्के यब पो कीम्जे धूरीदे ड्वाङ्गे क्यूप्पीय। 4 ङैजे ख्योन्यू, ङ नमयूने यीय, थमयू तङ्देबे अम्फलाची थमयूदे ङ्व त्या सेखूइय, तर होर्दे ङ्येदे सूजो चैये चे अन्खू। 5 तर सू तङ्देबे फ पर्दीय यलो, ङ नमयूने चेलाबे आर्तीय: हम्बप्रे फ पर्दीय सूप्रे मी सेत्देबे नरकने छाबेब शक्ति ख्यङ्। ङ नमयूने यीय, ङूप्रेने फ। 6 नोर् ङ्हीने च्यूङ्नी ङ ला सोङ अन्ख्व? हम्ब नङ्ने तीत्यात्याये परमेश्वर्दे अन्-येल्ग। 7 तर नमयूजे ब टजे फूत्याये चीले ख्यङ्। होरेक्यूत्देबे अम्फलाची, नमयू कूम च्यूङ्नीयू यली थेप् लूजे ख्यङ्। 8 “ङ नमयूने यीय, सूदे ङैने मीयूजे खूम्ने ङैजे प्रभु यदेबे स्वीकार चीक्क्य, ङूने मीजे चदेये परमेश्वरजे दूतयूजे खूम्दे रङ्सेजे यदेबे स्वीकार चीक्क्य। 9 तर सूदे ङैने मीयूजे खूम्दे स्वीकार अन्ची, परमेश्वरजे दूतयूजे खूम्दे हम्बनेये स्वीकार अन्ची। 10 सूदे मीजे चजे विरुद्धने क्यम्क्य, ङूने क्षमा क्यूक्क्य, तर सूदे पवित्र आत्माजे विरुद्धने अन्ज्य पो क्यम्क्य, ङूने क्षमा क्यूस्से त्वो। 11 “कन्छ्वाब थमयूदे नमयूने सभा-कीम्यू, हुकुम चील्लेबयू मेस्ये सरकारजे हाकिमयूजे खूम्दे रेक्क्य, हन्छ्वाब नमयू रङ्सेजे लागि जवाफ केर्बे पीन, या च य पर्दे, यदेबे हम्बजे सूर्त अन्चील्लाची, 12 चेनेयलो हम्ब बीलने नमयूदे च य पर्दे ख्यङ् हम्ब पो पवित्र आत्मादे नमयूने लोम्मीय।” मूर्ख फ्योबो मीजे उखान 13 “मीहुल नङ्ने त्यादे येशूने यदे, “गुरु, ङैजे अतने अंश बन्डा चीम्मी यदेबे येमी।” 14 तर येशूदे ङूने यदे, “ख्योन्, सूदे ङैने नमयू फ्याने न्याय चे या नमयूजे सम्पत्ति क्वेब चीम्मीदे?” 15 येशूदे थमयूने यदे, “होस्स्यार क्यूर्, लोभ रब सेयूप्रे चीन्तङ् टूङ्, चेनेयलो मीजे जीयाने ङूजे धन-सम्पत्ति कोलाने ख्यङ्लीने हम्बदे तम्दम् जीयाब अम्पीन्।” 16 येशूदे थमयूने उखान त्या यदे, “फ्योबो मी त्याजे रङ्ने बेस्से से लोदे। 17 ङूदे सेम्ने ह्वे चीत्दे, ‘ङैजे से येनब ने त्वो, जेम्से ङ केर्चे यी?’ 18 होर्दे ङूदे यदे, ‘ङ येरे चीक्क्य: ङैजे से येनब माङ्गा हूल्देबे ते केन् बन्दीय, हैयाने ङैजे सेयू टक्क्कने मेस्ये सामानयू यीक्क्य। 19 मेस्ये ङ रङ्से प्राणने यीय, “कूम वर्षसेमे पूग्देब कूम सम्पत्ति नैजे लागि म्यूरे ख्यङ्। आनन्द क्यूत्देबे टूङ्, च, थूङ्, मेस्ये मोज-मज्जा ची”।’ 20 तर परमेश्वरदे ङूने यदे, “ओ मूर्ख, दीनी मून्देने नैजे प्राण कूबीय, मेस्ये कम्ब थोकयू नदे रङ्से लागि म्यूरे ख्यङ्, हम्ब सूजे क्यूर?’ 21 “रङ्सेजे लागि धन-सम्पत्ति म्यूर्चे, तर परमेश्वरजे खूम्दे फ्योबो अन्क्यूर मीजे गती यरने क्यूक्क्य।” सूर्त अन्चील्लाची मत्ती ६:२५-३४ 22 येशूदे ङूजे स्यूस्स्यायूने यदे, “होरेक्यूत्देबे ङ नमयूने यीय, रङ्से प्राणजे लागि च चकै मेस्ये ङ्वने च ह्वे यदेबे सूर्त अन्चील्लाची। 23 चेनेयलो प्राण चसे यली मेस्ये ङ्व ह्वेब कोला यली थेप् केन् ख्यङ्। 24 अङ्रयूने ले: थमयूदे न लू थरक्य, न बली तोल्क्य, न से येनब माङ्काने क्यूक्क्य, तर परमेश्वरदेने थमयूने चसे पीन्क्य। नमयू ब ययू यली कूम लू पर्देब ख्यङ्। 25 नमयू नङ्ने सूदे फिक्री चीत्देबे रङ्सेजे छेने छीत्या थेप् रेङ चे खूइया? 26 नमयू येर चीदत्या कामये चे अन्खू यलो, सूजो पोजे चेने सूर्त चे? 27 “लिलीजे मीन्दाने ले, अम्ब केरे ठोङ्क्य, अम्बदे न काम बोङ्बे फर्क्य न पी खेल्क्य, तर ङ नमयूने यीय, सोलोमन मूरुमये हन्छ्वा बुद्धिप्रे न मीन्, धन-सम्पत्ति कोलाने ख्यङ्ली ङू हम्ब मीन्दायू ताकी त्याये ज्य त्वो। 28 तर दीनी ख्यब मेस्ये नैन्दे मीने छाबेब रेम्ने परमेश्वरदे यरेबे ज्य मीन्दा फर्से पीन्क्य यलो, परमेश्वर्दे नमयूने झन् थेप् ज्य कोला अन्होम्मेया? खोइ नमयूजे विश्वास? 29 नमयू च थूङ, चैसे च यदेबे सूर्त चीत्देबे मेस्ये मल्देबे अन्टोङ्लाची, 30 चेनेयलो संसारजे मीयू क्वाने अम्ब सेयू मल्देबे टूङ्क्य। नमयूजे पदे स्ये ख्यङ् यी नमयूने अम्ब सेयूजे हर्जो ख्यङ्। 31 तर परमेश्वरजे राज्य मेल्, मेस्ये अम्ब सेयू क्वाने नमयूने पीन्क्य। 32 “हुल चीद अम्फलाची! चेनेयलो परमेश्वर पदे नमयूने रङ्सेजे राज्य पीन्दीङ् रख्यङ्। 33 नमयूजे सम्पत्ति सोङ्देबे दूख्प्रेयूने पीन्। रङ्सेजे लागि थूल्कू अन्क्यूप्पब थैलीयू बन्दी। कलङ्बेये नाश अन्क्यूप्पब धन स्वर्गने फूङ् ची। हैयाने खूमान्यू अन्र मेस्ये बूये अन्लादी। 34 चेनेयलो केने नैजे धन क्यूक्क्य, हैयानेने नैजे सेम्ये क्यूक्क्य। चङ्ख क्यूर् मत्ती २४:४२-५१ ; मर्कूस १३:३२-३७ 35 “नमयूजे रङ्से ढप्ने कूच्यू बोल्यो ख्या मेस्ये नमयूजे बत्ती नेन्नू। 36 ङ्येन्जे भात्यार् चदेबे ल्वारब मालिकजे लम् लेन्नब त्वोप्र नमयू क्यूर मेस्ये मालिक रदेबे ख्यो ढ्याक्-ढ्याक् चे बितीकने ङूदे ख्यो पूक्मीय। 37 कीम्नोबो रब त्वोयू चङ्ख क्यूत्देबे टूनब तूरलो, थमयूदे असी प्रेक्क्य। तम्दम्ने ङ नमयूने यीय, ङूदे रङ्से कूच्यू बोल्यो ख्यादेबे थमयूने चसे चने टूङ्से पीन्क्य, मेस्ये रदेबे थमयूजे सेवा चीक्क्य। 38 कादेये कीम्नोबो गदेबे मून गूङ्ब या नप्तेले रलीने रङ्से त्वोयू चङ्ख टूनब तूरलो ङूदे थमयूने कूम स्याबास पीन्क्य। 39 तर अम्ब था चीन्नू, खूमान् कम्ब बीलने रीय यदेबे कीम्नोबोदे था प्रेल्लोब ङूदे खूमान्ने कीम् पर्देबे क्योबस्ये अम्पीन ख्यङ्दे। 40 नमयूये तयार क्यूर्, चेनेयलो नमयूदे सेम्नेये अम्मन्नब बीलने मीजे च रीय।” 41 होर्दे पत्रुसदे यदे, “ओ प्रभु, अम्ब उखान च ङीजे लागित्या यी, सूजो क्वाजे लागिने।” 42 प्रभुदे यदे, “बुद्धिमान मेस्ये भर् पर्ते ख्वब कीम् लेब त्वो सू ख्यङ्? कीम् मालिकदे हम्ब त्वोने रङ्सेजे कीम् म्हीतीने तोक्तेब दिनसेमे थमयूजे भाने पर्देब चसे पीनने खेर्तीय? 43 त्वोदे कीम्नोबो रब काम फर्नब तूरलो ङूदे असी प्रेक्क्य। 44 तम्दम्ने ङ नमयूने यीय, ङूदे हम्ब त्वोने साप्ता सम्पत्ति फ्याने हक पीन्क्य। 45 तर हम्ब त्वोदे रङ्से सेम्ने “ङैजे कीम्नोबो रने गेय” यदेबे ङूदे सूजो त्वो-त्वोमयूने ठरेमेदे, होर्दे चदेबे थूङ्दे स्योदेबे मात्ते मेदे यलो, 46 ङूदे आशाने अन्चेब बीलने मेस्ये सेम्ने अम्मनब दिनने ङूजे कीम्नोबो रीय, ङूने दण्ड पीन्क्य, मेस्ये ङूजे दसा परमेश्वर्ने अम्मन्देब मीयूजेप्र क्यूक्क्य। 47 “रङ्से कीम्नोबोजे सेम्जे पो स्येदेये चेपर्तेब काम अन्चील्ला तयार अङ्क्यूरब त्वोने कीम्नोबोदे कूम ठरीय। 48 तर कीम्नोबोजे सेम्जे पो था अम्प्रेत्देबे ठरेपर्देब काम चेब त्वोने छीत्या ठरीय। सूने कूम पीने ख्य, हम्बने कूमने स्येय, मेस्ये सूने थेप् सूम्दीये ख्य, ङूप्रे अझ थेप् स्येय। शान्ति दी, फूट् मत्ती १०:३४-३६ 49 “ङ पृथ्वी फ्याने मी ने-नने र ख्यङ्, हम्बब बरू तरने प्ल्याङ्कलो क्यूर ख्यङ्दे! 50 बप्तिस्मा त्या ख्यङ्, हम्ब बप्तिस्मा ङैदे कीनपर्दे ख्यङ्। हम्ब बप्तिस्मा अन्कीन्दासेमे ङैने सोरो दु:ख क्यूक्क्य। 51 नमयूदे ङ पृथ्वीने शान्ति रेने र मन्न औ? दी, ङ नमयूने यीय, बरू ङ फूट् चेने र ख्यङ्। 52 जेम्सेमेस्ये कीम्-म्हीत्ती ङ ख्यबये त्या-त्याने फूट् क्यूक्क्य, सोम्जे विरुद्धने ङ्ही, मेस्ये ङ्हीजे विरुद्धने सोम् लङ्क्य। 53 थमयूनङ्ने स्याबीय-पजे विरुद्धने च, चजे विरुद्धने प, म चीमीजे विरुद्धने, चीमी मजे विरुद्धने, य्वामी रङ्से मसङ्जे विरुद्धने, मेस्ये मसङ् ङूजे य्वामीजे विरुद्धने।” बीलजे च्यूनू 54 येशूदे मी हुलने यदे, “नमयू पश्चिमदे मूक्प योङ्रब तङ्देबे झाट्टै यीय, ‘झीरी र मे टूङ्’, मेस्ये होरेने क्यूक्क्य। 55 कन्छ्वाब दक्षिणतेलेजे उन्दू चील्लीय हन्छ्वाब नमयूदे यीय, ‘गर्मी क्यूक्क्य’, मेस्ये होरेने क्यूक्क्य। 56 ओ कप्टी! नमयू पृथ्वी मेस्ये मूजे च्यूनूयू लेत्देबे च क्यूक्क्य यब पो य ख्व ख्यङ्, तर दीनीजे सेमेजे अर्थ लेत्देब चेने अन्स्ये? 57 कम्ब पो पक्क ख्यङ् यदेबे नमयू रङ्सेदे चेने पक्क चेअन्ख्व? 58 नमयूने उजूर प्वेब मीप्रे हाकिम ट्याने प्रब, लम्नेने हम्ब मीप्रे मील्लेने बोङ् ची। नत्र ङूदे नने न्याय चेब मी ट्याने थेन्देबे कूबीय, न्याय चेब मीदे नने अफसरजे लाने जिम्मा पीन्क्य, मेस्ये ङूदे नने झ्यालखानने चङ्पीय। 59 ङ नने यीय, नदे पूरा नोर् अम्फातासेमे हैयादे छूर्दे अम्प्रे।” |
Ghale New Testament © Nepal Bible Society, 2011.
Nepal Bible Society