यूहन्ना 11 - घले नयाँ करारलाजरस सीयेब 1 बेथानिया तजे लाजरस मीन् ख्यब मी त्या न क्यूरे ख्य। ङूजे अची ङ्ही मरियाम मेस्ये मार्थाये होनेजेने ख्य। 2 प्रभुने अत्तर छेल्मीदेबे रङ्सेजे ट फूदे ङूजे तोप् फील्मेब मरियाम अम्बने ख्य। अम्ब मरियमजे च्योन् लाजरस नेन ख्य। 3 अम्ब अची ङ्हीदे येशू ट्याने येरे यदेबे सम्चर् चङ्पीदे, “प्रभु, नदे सूने माया चे ख्य, ङू नेन ख्यङ्।” 4 तर अम्ब पो तदेबे येशूदे यदे, “लाजरस नेन ख्यङ्, तर ङू सीबस्ये त्वो, परमेश्वरजे महिमा चेने येर क्यूर ख्यङ्, मेस्ये अम्बदे परमेश्वरजे चजे महिमा क्यूस्स्य।” 5 येशूदे मार्था, मार्थाजे च्योन् मरियम मेस्ये लाजरसने माया चे ख्य। 6 लाजरस नेन ख्यङ् यब तलीने ङू केने ख्य, होनेने ङ्हीया थेप् टूनूदे। 7 होर्दे ङ्येदे येशूदे स्यूस्स्यायूने यदे, “प्रे, जेम्से ङीन फेरि यहूदियाने ल्वाबे।” 8 स्यूस्स्यायूदे ङूने यदे, “गुरुज्यू, मूरूथानी-केला नने यहूदीयूदे लूङ्दे खान्दीदे से मे ते, फेरि न होने चेने प्रमे?” 9 येशूदे जवाफ पीन्दे, “नोत्याने बाह्र घण्टा अन्क्यूर औ स्व? नोदे र प्र चेब मी केनेक्यूक्को होने च्या-थूङ्बस्ये त्वो, चेनेयलो ङूदे अम्ब संसारजे ओथ्याङ्ने तङ्क्य, 10 तर मून्दे र-प्र चेब मी केने-क्यूक्को होने च्या-थूङ्बीय, चनेयलो हम्ब मीने ओथ्याङ् अन्क्यूर्।” 11 होर्दे ङ्येदे ङूदे थमयूने यदे, “ङीनजे ख्योन् लाजरस ङ्यूम्या गीले ख्यङ्, तर ङूने ङ्यूम्यादे लङने ङ होने प्रीय।” 12 स्यूस्स्यायूदे ङूने यदे, “प्रभु, ङू ङ्यूम्या गीले ख्यङ् यलो ङू तम् क्यूक्क्य।” 13 येशूदे लाजरस सीयेबजे बारेने येन ख्य, तर थमयूदे ब तम्दम्ने ङ्यूम्नबजे बारेने य टूङ् मन्दे। 14 येशूदे थमयूने चेलाबे येमीदे, “लाजरस सीये ख्यङ्। 15 नमयूदे विश्वास चीस्स्य यदेबे नमयूजे लागि ङ हैयाने अङ्गीलेब ज्यने क्यूत्दे। चने क्यूरीली ङीन ङू ट्याने प्रे।” 16 होर्दे दीदूमस् यब थोमादे रङ्से प्रे-प्रेजे स्यूस्स्यायूने यदे, “लौ स्व, ङीनये प्रे, मेस्ये गुरुप्रेने सीब पर्तीलीने सीबस्ये।” लाजरसजे अची ङ्हीने येशूदे सान्त्वना पीनब 17 कन्छ्वाब येशू फ्योरदे, हन्छ्वाब खङ्सने लाजरस येक्कदेबे स्यीर्या क्यूरे ब था प्रेत्दे। 18 बेथानिया यरूशलेमजे ट्याने ख्य। अम्बने यरूशलेमदे धेन्ने किलोमिटर सोम्लाप्र चीन्तङ् पर्ते ख्य। 19 योङ्जे बारेने सेम् येम्मेने कूम यहूदीयू मार्था मेस्ये मरियम ट्याने र ख्य। 20 येशू रेन ख्यङ् यब पो तदेबे मार्था गीलीदेबे ङूने तूदे। तर मरियम कीम्नेने टूनूदे। 21 होर्दे मार्थादे येशूने यदे, “प्रभु, न अन्-याने ख्ययलो ङैजे योङ् अन्सीये ख्यङ्दे। 22 तर चूजोये ङैने था ख्यङ्, नदे परमेश्वरप्रे च स्येय, परमेश्वरदे नने पीन्क्य।” 23 येशूदे ङूने यदे, “नैजे योङ् फेरि सोम्बो क्यूक्क्य।” 24 मार्थादे येशूने यदे, “संसारजे आखिरी दिनने सीयेबयू खङ्सदे तो लङ्ब ङूये फेरि सोम्बो क्यूत्देबे लङ्क्य”, यदेबे ङैने था ख्यङ्। 25 येशूदे ङूने यदे, “सीयेबयूने सोम्बो चेब मेस्ये जीया पीनब ङ ख्यङ्। ङैने विश्वास चेब मी सीबलीने सोम्बो क्यूक्क्य। 26 होर्दे जीया चब मेस्ये ङैने विश्वास चेब सूत्याये कलङ्बेये सीबस्ये त्वो। न अम्ब पोने विश्वास चीक्क्या?” 27 ङूदे येशूने यदे, “प्रभु न संसारने रब ख्रीष्ट परमेश्वरजे च ख्यङ् यदेबे ङैदे विश्वास चे ख्यङ्।” 28 अन्छ्वा यदेबे मार्था थे चेकीदे, मेस्ये रङ्सेजे च्योन् मरियमने कोदेबे आलाक्के यदे, “गुरुज्यू फ्योरदे, मेस्ये नने कोन ख्यङ्।” 29 अम्ब पो तबने मरियाम ग्वे लङ्देबे येशू ट्याने थेचेकीदे। 30 हन्छ्वाब येशू तने अम्फ्योर ख्य, तर मार्थादे केने त्व ख्य होयानेने ङू ख्य। 31 सेम् येम्मेने कीम्ने रब यहूदीयूदे मरियम ग्वे लङ्दे फीने गीलेब तङ्देबे ङू खङ्सने ङ्वने गीलेस्ये मन्देबे थमयू ङूजे ङ्ये-ङ्ये गीलीदे। 32 कन्छ्वाब मरियाम येशू ख्यब नेने फ्योरदे मेस्ये येशूने तङ्दे हन्छ्वाब, “हे प्रभु, न येने ख्ययलो ङैजे योङ् अन्सीये ख्यङ्दे” यदेबे येशूजे तोप्ने स्यूव पीन्दे। 33 कन्छ्वाब येशूदे मरियाम मेस्ये ङूप्रे रब यहूदीयूये ङूनब तङ्दे, हन्छ्वाब येशूजे सेम् ठोदे होर्दे सोरो अन्सूग क्यूत्दे। 34 येशूदे थमयूने लोत्दे, “नमयूदे लाजरस कैयाने हीते ख्य?” थमयूदे येशूने यदे, “प्रभु, रदेबे लेख्ख।” 35 येशू ङूदे। 36 येरेक्यूत्देबे यहूदीयूदे यदे, “ले ले, ङूदे लाजरसने सोरो माया चे टोङ्।” 37 तर कोइ कोइदे यदे, “म्या अन्तङबने म्या तङ ख्व चीम्मेब मीदे अम्ब लाजरसनेये अन्सीब चीम्मे अङ् ख्वया? 38 होर्दे येशूजे सेम् फेरि ठोदेबे खङ्सने गीलीदे। पूक् त्याने अम्ब खङ्स ख्य मेस्ये अम्बजे ल लूङ्त्यादे चेये ख्य। 39 येशूदे यदे, “ल चेयेब लूङ् ती चीप्पी।” लाजरसजे अची मार्थादे ङूने यदे, “हे प्रभु, दीनीसेमेब हम्ब पूङ् र क्यूरेस्ये, चेनेयलो ङू सीइदेबे स्यीर्या क्यूरे ख्यङ्।” 40 येशूदे ङूने यदे, “ङैदे नने य ते, ‘नदे विश्वास चील्लो परमेश्वरजे महिमा तङ्क्य’?” 41 थमयूदे लूङ् खेदे चीप्पीदे। होर्दे येशूदे तो लेत्देबे यदे, “ओ पाइ, ङ नने धन्यवाद पीन्क्य, चेनेयलो नदे ङैजे बिन्ती ङ्यीन्दे। 42 नदे ङैजे बिन्ती येतार्ने ङ्यीन्क्य यदेबे ङैदे स्ये ख्यङ्। तर येने मेर्नब मी हुलजे लागि ङैदे अम्ब य ख्य, यी नदे ङैने कूल्बे ख्यङ् यदेबे अम्बयूदे विश्वास चीस्स्य।” 43 होर्दे अम्ब पो येक जेनमेस्ये ङूदे के केन् योन्देबे यदे, “लाजरस, फीने योङ्ख।” 44 हम्ब सीयेब मी ङूजे ला-तोप् मेस्ये त्वा कोलादे केरे तोले ख्य होरने फीने योङ्रदे। येशूदे थमयूने यदे, “हम्बने तोलेब कोला क्वाने फाबी, होर्दे ङूने प्रस्ये पीन्।” येशूने सेब चूक्ली मत्ती २६:१-५ ; मर्कूस १४:१-२ ; लूका २२:१-२ 45 मरियाम ट्याने रब कूम यहूदीयूदे येशूदे चेब कामयू तङ्देबे ङू फ्याने विश्वास चीत्दे। 46 तर थमयू नङ्जे कोइब फरिसीयू ट्याने गीलीदे मेस्ये येशूदे चेब कामयू स्योम्मीदे। 47 होर्दे केन् पूस्र्यायू मेस्ये फरिसीयूदे पात्ता केन् सभाजे मीयू कोदेबे यदे, “जेम्से ङीन च चे? चेनेयलो अम्ब मीदे ब कूम हार्मन्देब कामयू चीन्न ख्यङ्। 48 अम्बने येरेने क्यापीदेयलो क्वादेने अम्ब फ्याने विश्वास चीक्क्य मेस्ये रोमजे मीयू रदेबे ङीनजे पवित्र ने नाश चीप्पीय मेस्ये ङीनजे जातिये नाश चीप्पीय।” 49 तर थमयू नङ्ने कैयाफा यब मी त्या ख्य, ङू हम्ब वर्षजे पात्ता केन् पूस्र्या ख्य, ङूदे थमयूने यदे, “नमयू चैये अन्स्ये ख्यङ्! 50 पूरा देश नाश क्यूप्प यली मीयूजे लागि मी तीत्यात्या सीबब ज्य ख्यङ् यदेबे नमयूदे अन्स्ये।” 51 अम्ब ङूजे रङ्सेजे तर्फदे य ते ख्य, तर हम्ब वर्षजे पात्ता केन् पूस्र्या ख्य, होरेक्यूत्देबे देशजे लागि येशू सीब पर्दे ख्यङ् यदेबे अगमवाणी क्यम्क ख्यङ्। 52 देशजे लागित्या ङूदे अम्ब पो येक दी, तर का-मुलुकने स्वा स्वा क्यूरेब परमेश्वरजे छगूम्-पूर्गूम्यू नेत्याने फूङ् चेने अम्ब येक ख्य। 53 येरेक्यूत्देबे हम्ब दिनमेस्ये थमयूदे ङूने सेब मोतो चीत्दे, 54 होरेक्यूत्देबे येशू यहूदीयूजे खूम्ने क्वादेने तङ्लाबे र प्र अन्ची, तर हैयादे मी अन्टोङब याङ्यूङ् नेजे ट्याने ख्यब एफ्राइम यब सहरने गीलीदे, मेस्ये हैयाने स्यूस्स्यायूप्रे टूङ्दे। 55 यहूदीयूजे निस्तार दीन्बर ट्याने फ्योर ख्य, होर्दे त तदे कूम मीयू रङ्से रङ्सेने शुद्ध चेजे लागि निस्तार-दीन्बर सुरु क्यूर यली खूम्ने यरूशलेमने गीलीदे। 56 होर्दे थमयूदे येशूने मल्दे, मेस्ये थमयू मन्दिरने फूङ् क्यूत्देबे मेर्नूब त्यादे त्याने यदे, “नमयूदे कर थेको, ङू अम्ब दीन्बरने रीया?” 57 पूस्र्या केन्यू मेस्ये फरिसीयूदे ब येशूने ङ्येब खूस्य यदेबे कादेये ङू केने ख्य यदेबे कोइदे था प्रेल्लो खबर ची यदेबे आज्ञा पीने ख्य। |
Ghale New Testament © Nepal Bible Society, 2011.
Nepal Bible Society