याकूब 4 - घले नयाँ करारपरमेश्वरने सूम्दीबेब 1 चै पोदे नमयूजे अन्द्रने लडाइँ मेस्ये च्य-फा चीक्क्य? अम्ब टक्कने नमयूजे मोज-मजा चेब अन्ज्य इच्छायूदे योङ्रीय, अम्ब अन्ज्य इच्छायू नमयू नङ्ने लडाइँ चीन्नीय। 2 नमयूदे चत्या-से प्रेब सेम् चीक्क्य, तर नमयूदे अम्प्रे। नमयूदे मीयूने सेक्य मेस्ये लोभ चीक्क्य, तर प्रे खूस्ये त्वो। नमयूदे च्य-फा मेस्ये लडाइँ चीक्क्य, तर नमयूदे सेम् चेब से प्रस्ये त्वो, चेनेयलो परमेश्वरप्रे नमयूदे अन्स्य। 3 नमयूदे परमेश्वरने चत्यासे स्येय तर अम्प्रे, चेनेयलो रङ्से इच्छात्यामे पूरा चेने अन्ज्य तर्तीप्दे स्येय। 4 वेश्य मीयू, अम्ब संसारने माया चेब परमेश्वरजे शत्रु ख्यङ् यब पो च नमयूने था त्वा? येरेक्यूत्देबे सूदे संसारने माया चीत्तीङ् रीय हम्बदे रङ्सेने परमेश्वरजे शत्रु क्यूस्स्ये पीन्क्य। 5 धर्मशास्त्रदे सीत्तीने येरे यीय यदेबे नमयूदे मन्न औ? परमेश्वरदे ङीनने येम्मेब आत्माजे लागि ङू बेस्से ठेन्क्य, 6 तर ङूदे झन् थेप् अनुग्रह पीन्क्य? येरेक्यूत्देबे धर्मशास्त्रदे यीय”, “परमेश्वरदे केन्त्वेब मीयूजे विरोध चे ख्यङ्, तर चीद स्यूलूक्कै क्यूरब मीयूने अनुग्रह चीक्क्य। 7 येरेक्यूत्देबे रङ्सेजे जीया परमेश्वरने सूम्दीपीदेबे ङूजे पो ङ्यीन्। शैतानजे विरोध ची, मेस्ये हम्ब नमयू ख्यनेदे छ्योङ्बीय। 8 नमयू परमेश्वरजे ट्याने ख, मेस्ये परमेश्वर नमयूजे ट्याने रीय, पापीयू! नमयूजे ला चोखो ची, सेम् ङ्ही चेब मीयू! नमयूजे सेम् शुद्ध ची। 9 सेम् पोन्, शोक् ची, मेस्ये म्यामू तल्देबे ङू। नमयूजे रीगब पो क्यापीदेबे शोक् ची, मेस्ये नमयूदे प्रेब आनन्दजे पोब क्यापीदेबे सेम् पोनब क्यूर्। 10 प्रभूजे खूम्ने रङ्सेने चीद स्यूलूक्कै ची, मेस्ये ङूदे नमयूने तो लङ्क्य। 11 अत-अजी च्योन्यू, त्यादे त्याजे विरुद्धने अन्ज्य पो अन्चील्लाची। सूदे रङ्से च्योन्जे विरुद्धने अन्ज्य पो क्यम्क्य, या रङ्से च्योन्ने दोष लैदीय, हम्ब मोशाजे नियमजे विरुद्धने क्यम्क्य मेस्ये हम्बदे मोशाजे नियमजे दोष तन्क्य। तर कादेये नदे मोशाजे नियमजे दोष तन्क्य यलो न मोशाजे नियम अनुसार चेब अन्क्यूर्, तर मोशाजे नियमजे न्याय चेबम क्यूत्दे स्व। 12 मोशाजे नियम पीनब मेस्ये न्याय चेब तीत्यात्या ख्यङ्, ङूदे जूक्तीमे खूइय मेस्ये नाशये चीप्पे खूइय। तर रङ्से खीम्चेने दोष लैदेब नमयू सू? 13 “दीनी या नैदे ङीन अम्ब या हम्ब सहरने प्रस्ये, हैयाने वर्ष त्यासेमे टूङ्स्ये मेस्ये छोङ् चीत्देबे नफ चेस्ये।” 14 यब मीयू जेम्से ङ्यीन्, नैदे च क्यूक्क्य नमयूदे अन्स्ये। नदे केरे जीया चैय? नमयूब लूङ्कूर्मप्र ख्यङ्? हम्ब लूङ्कूर्म खात्यात्या तङ्क्य, होर्दे सू-मल्बीय। 15 अम्बजे सट्टने नमयूदे येरे य पर्तेब ख्य, “कादेये परमेश्वरजे इच्छा क्यूत्दे यलो ङीन जीया चस्ये मेस्ये येर-होर काम फरस्ये।” 16 तर चूजो नमयू रङ्सेने केन् त्वोत्देबे ल तप्क्य। येर केन् त्वेब साप्ता पोयू ज्य दी। 17 येरेक्यूत्देबे सूदे भलो चेब स्येदेये अन्ची ङूदे पाप चीक्क्य। |
Ghale New Testament © Nepal Bible Society, 2011.
Nepal Bible Society