याकूब 3 - घले नयाँ करारलीने तह लैदेब 1 अत-अजी-च्योन्यू, नमयू नङ्ने कूम लोम्मेब मी अन्क्यूर्लाची। चेनेयलो ङीन लोम्मेब मीयूजे न्याय थेप् कडा क्यूक्क्य यदेबे नमयूदे स्ये ख्यङ्। 2 चेनेयलो ङीन क्वादेने कूम गल्ती चीक्क्य। रङ्सेदे क्यमब पोने सू-मीदे गल्ती अन्ची, रङ्से ङ्व टक्कने ङूदे काबूने ये खूइय, मेस्ये हम्ब मी सिद्ध क्यूर खूइय। 3 कादेये काबूने येनजे लागि तयूजे ङूर्ने लगाम पूत्देयलो थमयूजे ङ्व टक्कने केर्देयोर् कूपतीङ् रीको होर्देयोर्ने कूप खूइय। 4 क्यू फ्याने प्रब जहाजयूनेये लेच्च, सोरो केन् उन्दूदे हम्ब जहाज प्रीय, हम्ब क्यू फ्याने प्रब जहाज केन्-केन् ख्यङ्लीने हम्ब जहाजजे ङ्यलम्ने चीदत्या पूइयप्र सेदे रङ्से इच्छा अनुसार केने कूपतीङ् रीको होनेने कूपीय। 5 होरप्रने लीये चीदत्या अङ्ग क्यूत्देबे केन्-केन् पोयूने त्वोक्क्य। ले, चूक्लीत्या प्ल्याङ्नब मीजे फेलेम्दे थ्वाच्ये नाने भस्सम् चीक्क्य। 6 लीये प्ल्याङ्नब मीप्रने ख्यङ्। अम्ब ङ्वजे अङ्गयू नङ्ने धर्म त्वब दूनीयाप्रने ख्यङ्। अम्बदे ङ्व टक्कनेने खोट् लैदीय मेस्ये पूरा जीयाने मी प्ल्याङ्लाबे चीप्पीय, होर्दे प्ल्याङ्नब नरकजे मीने हम्ब ल्यागीय! 7 साप्ता थर्जे रोलायू, स्यूनब ययू, ल्वोदे स्यून्देबे प्रब सेयू, समुद्रने ख्यब सेयूने मीदे काबूने येन खूइय, मेस्ये मीदेने तह लैदीये ख्यङ्। 8 तर लीने सू मीदेये तह लैदे अन्खू। अम्ब ली सोरो फत्या अन्ज्य तूक्दे फ्यायेब चार्पाल्या दुष्ट ख्यङ्। 9 अम्ब लीदेने प्रभू मेस्ये प परमेश्वरजे सार्या ङीन चीक्क्य, मेस्ये अम्ब लीदेने परमेश्वरजे रूप्ने बन्दीयेब मीने ले तप्क्य। 10 अम्ब ङूर् नङ्देने असी मेस्ये लेये योङ्रीय। ङैजे अत-अजी च्योन्यू येरब ज्य अन्क्यूर्। 11 च, क्यू मूरुम् त्यादेने लेमब मेस्ये खब क्यू योङ्रीया? 12 ङैजे अत-अजी च्योन्यू, अञ्जीरजे तङ्बोने जैतूनजे सी या अङ्गुरजे तङ्बोने अञ्जीरजे सी ल्व खूइया? खब क्यू प्ल्यारब मूरुम्दे लेमब क्यू योङ्र अन्खू। थर् ङ्ही बुद्धि 13 नमयू नङ्ने बुद्धि ख्यब मेस्ये पो क्वब मी सू ख्यङ्? रङ्सेजे ज्य आनि-बानीजे जीया चदेबे बुद्धि ख्यब मीप्रने स्यूलूक्कै क्यूत्देबे ङूदे रङ्से कामयू तम्मीस्य। 14 तर कादेये नमयूजे ठेनब मेस्ये रङ्सेजे फाइदात्या लेब सेम् ख्यङ् यलो अम्ब पोने केन् अन्तोल्लाची, मेस्ये तम्दम् पोने लूच्च अन्चील्लाची। 15 येर बुद्धि परमेश्वरदे पीनब दी। तर अम्ब संसारजे ख्यङ्, परमेश्वरजे आत्माजे दी, तर शैतानजे बुद्धि ख्यङ्। 16 चेनेयलो ठेनब सेम् मेस्ये रङ्से फाइदात्या लेब सेम् कैयाने क्यूक्क्य, हैयाने कचेला मेस्ये साप्ता थर्जे दुष्ट कामयू क्यूक्क्य। 17 तर कम्ब बुद्धि स्वर्गदे रीय हम्ब खूम्ने शुद्ध ख्यङ्, होर्दे हम्बदे शान्ति पीन्क्य, स्यूलूक्कै, मील्लीदे टूङब क्यूक्क्य। येर बुद्धि दयादे फ्यानब क्यूक्क्य मेस्ये सोरो ज्य कामजे फल पीन्क्य। अम्ब बुद्धि साक्पूजा मेस्ये कप्टी अन्क्यूर्। 18 शान्ति रेने काम फरबयूदे शान्तिजे लू थर्क्य मेस्ये धार्मिकताजे बलि तोल्क्य। |
Ghale New Testament © Nepal Bible Society, 2011.
Nepal Bible Society