याकूब 2 - घले नयाँ करारसाक्पूजा अन्चेब 1 अत-अजी-च्योन्यू, नमयूदे महिमाजे प्रभू येशू ख्रीष्ट फ्याने विश्वास चे ख्यङ्, होरेक्यूत्देबे नमयूदे सूनेये साक्पूजा अन्चील्लाची। 2 कोदेये नमयू रुप् क्यूरब नेने कोइ मी मर्जे औँठी मेस्ये ज्य-ज्य कोलायू होत्दे रदे, मेस्ये कोइ दूख्प्रेमीदे ङीङ् प्र्याङ्येब थूल्कू कोलायू होत्दे रदेयलो, 3 नमयूदे हम्ब ज्य कोला ह्वेब मीने गेसेन् चीत्देबे, “अने ज्य नेने टूङ्ख यीय”, मेस्ये हम्ब दूख्प्रेब मीने “न होने मेर्” या “मो ङैजे तोप्ट्याने टूङ्” यीय यलो, 4 च नमयूदे रङ्से अन्द्रने साक्पूजा चे तेया? मेस्ये अन्ज्य सेम् टेल्देबे न्याय चेबयू अन्क्यूर या? 5 ङैजे छेब अत-अची च्योन्यू चेलाबे ङ्यीनो, संसारजे दूख्प्रेयूने परमेश्वरदे विश्वासने फ्योबो चीम्मेने, मेस्ये परमेश्वरने प्रेम चेब मीयूजे लागि पीन्क्य यदेबे चेब कबुलजे राज्यने हक लादेब क्यूरने सेल तेया? 6 तर नमयूदेब दूख्प्रेबयूने ह्यल चे ख्यङ्। च फ्योबोयूदे नमयूने सतनम् पीन ते या? च थमयूदे नमयूने अड्डने अन्सबया? 7 च थमयूदे येशूजे मीन्ने ह्यल चे ते या? अम्ब मीन्दे चीत्देबे नमयू क्व ख्यङ्। 8 कादेये, “नदे रङ्सेने प्रेम चेप्रने रङ्से खीम्चेनेये प्रेम ची” यदेबे धर्मशास्त्रने लिख्दीयेब परमेश्वरजे राज्यजे नियमने मन्दीदे यलो नमयूदे सोरो ज्य काम चेब क्यूक्क्य। 9 कादेये नमयूदे मीयूने साक्पूजा चीत्देयलो नमयूदे पाप चीक्क्य, मेस्ये नमयूने नियम अम्मन्देब दोष लादीय। 10 चेनेयलो सूदे मोशाजे नियम क्वाने मन्दीय तर नियमयू नङ्जे पोत्या गल्ती चीक्कदे यलो, ङूदे मोशाजे नियमयू क्वाने अम्मन्देब दोष प्रेक्क्य। 11 चेनेयलो “वेश्य काम अन्चील्लाची” यब परमेश्वरदेने “मी अन्सेल्लाचीये” यदे। कादेये नदे वेश्य काम अन्चे ख्यङ् तर मी सेब काम चेख्यङ् यलो, नदे मोशाजे नियम अम्मन्देब ठर्तीय। 12 येरेक्यूत्देबे नमयूदे क्यमब पो मेस्ये कामब मीयूने स्वतन्त्र चेब नियम अनुसार न्याय प्रेक्कब मीयूजेप्र क्यूस्स्य। 13 चेनेयलो कम्ब मीदे दया अन्तन्, हम्ब मीने न्याय चीप्प परमेश्वरदे दया तन्स्ये त्वो। दया तनब मीदे परमेश्वरजे न्याय क्यूप्प ट्या प्रेक्क्य। विश्वास मेस्ये काम 14 ङैजे अत-अची-च्योन्यू, कादेये कोइ मीदे “ङैने विश्वास ख्यङ्” यीय, तर काम चीत्देबे विश्वास तन-अङ्खूदेयलो चै फाइदा क्यूक्क्य स्व? ङूदे चेब हम्ब विश्वासदे ङूने जूक्तीमे खूइया स्व? 15 कादेये कोइ अत-अची-च्योन्यूने ह्वेब कोला मेस्ये दिनजेने चब सेजे हर्जो क्यून्न ख्यङ्, 16 मेस्ये नमयू नङ्ने कोइदे ङूने “चेलाबे प्र, टूलाबे टूङ्, कलाबे च” त्यामे यीय, तर ङूजे ङ्वने चैदेब सेब चैत्याये अम्पीन्देयलो, येरे यदेबेत्या चै फाइद क्यूक्क्य स्व? 17 होरप्रने विश्वास चेब अनुसार काम तन अङ्खूदेयलो हम्ब विश्वास सीयेसरने क्यूक्क्य। 18 तर कोइदे यीस्ये, “नैप्रे विश्वास ख्यङ्, ङैप्रेब कामयू ख्यङ्।” काम अन्चेब नैजे विश्वास ङैने तन्, मेस्ये ङैदे चेब कामयूदे ङ रङ्सेजे विश्वास नने तन्क्य। 19 तीत्यात्या परमेश्वर ख्यङ् यदेबे नमयूदे विश्वास चे ख्यङ् यलो, अम्ब पो सोरो ज्यने, छेत् आत्मायूये विश्वास चीक्क्य मेस्ये फदे स्य लूतूतू फ्रीक्क्य। 20 मूर्खयू, विश्वासब चे तर हम्ब अनुसार काम अम्फरब चैकम्ते क्यूक्क्य यब पोजे गवाही चैदीया? 21 कन्छ्वाब चाक्या फ्याने ङीनजे मेमे अब्राहामदे रङ्से च इसहाकने चेर्तीदे, हन्छ्वाब परमेश्वरजे खूम्ने ङूदे काम तन्देबे धर्मी ठर्दीक तेया? 22 ङूदे चेब कामयू प्रे-प्रे विश्वासदेये काम चीत्दे, मेस्ये ङूदे चीक्कब कामदेने ङूजे विश्वास पूरा क्यूक्क ख्य यब पो चेलाबे तङ खूइय। 23 “अब्राहामदे परमेश्वरने विश्वास चीत्दे, मेस्ये हम्ब विश्वासदे चीत्देबे ङू धार्मिकता ठर्तीदे”, यब पवित्र धर्मशास्त्रजे पो पूरा क्यूत्दे, येर्बे अब्राहाम परमेश्वरजे ख्योन् क्यूत्दे। 24 नमयूदे तङ ख्यङ् काम फर्देबे मी धर्मी ठर्ते टोङ्, विश्वास चीत्देबेत्या दी। 25 होरप्रने राहाब वेश्यदेये, कन्छ्वाब ङूदे च्यूव चीट्टब मीयूने गेसेन चीत्देबे सूजो लम्ने कूल्बीदे, हन्छ्वाब हम्ब कामयूदे ङू धर्मी ठर्दे देया? 26 मीजे ङ्वने स त्वोदेयलो, मी सीबीय, होरप्रने विश्वास चे अनुसार काम अम्फर्लो विश्वासये सीयेब क्यूक्क्य। |
Ghale New Testament © Nepal Bible Society, 2011.
Nepal Bible Society