याकूब 1 - घले नयाँ करार1 परमेश्वर मेस्ये प्रभू येशू ख्रीष्टजे त्वो, ङ याकूबदे अम्ब चिट्ठी लिख्दीन ख्यङ्: का-मुलुकने स्वा-स्वा क्यूत्देबे टूनब बाह्र खलकजे मीयूने नमस्कार। सकस् मेस्ये परीक्षायू 2 ङैजे अत-अजी च्योन्यू, नमयू फ्याने परी-परीजे भबी-तबी पर्दीरब नमयूजे सेम् थेप् सूग्नू। 3 चेनेयलो नमयूदे चेब विश्वासजे परीक्षादे सैदे ख्वब बोङ् पीन्क्य यब पो नमयूदे स्ये खूस्य। 4 भबी-तबी पर्तीरब पात्ताङ्येसेमे सैदे ख्वब क्यून्नू, होरेक्यूत्देयलो नमयूने चैये खोट् त्वब, पाको मेस्ये साप्ता पोने ज्य क्यूर खूइय। 5 तर कादेये नमयू कोइने बुद्धिजे हर्जो ख्यङ्लो हम्बदे प्रो-अन्लङ्लाबे मेस्ये सेम्-यङ्ला पीनब परमेश्वरने स्यस्य, मेस्ये हम्ब ङूने पीन्क्य। 6 तर ङूदे छीत्याये शङ्का अन्चील्लाबे विश्वास चीत्देबे स्यस्य। शङ्का चे मीब उन्दूदे तो-तप्-मोतप चेब समुद्रजे क्यू छाल प्रने क्यूक्क्य। 7 प्रभूदे च-त्यासे पीन्क्य यदेबे होर मीदे मन्न अम्पर्ती, 8 चेनेयलो येर सेम् ङ्ही क्यूरब मी ङूजे साप्ता कामने धेरेन् क्यूस्स्ये त्वो। 9 दूख्प्रेन्नब विश्वासीयूने परमेश्वरदे असी पीन्देबे तो लङ्ब सूग खूस्य, 10 मेस्ये फ्योबोयू दूख्प्रे क्यूप्पलीने सूग खूस्य, चेनेयलो मीब स्यूजे मीन्ताप्र रूल्बीय। 11 चेनेयलो सोरो ठ्वब मीया प्ल्यारीय, मेस्ये स्यू खर्लाबे चीप्पीय। हम्ब ज्य तङ्नब मीन्ता सने तल्देबे खर्बीय। होरप्रने फ्योबो मीये रङ्से काम धन्द चीन्नूबने जीया प्रीय। 12 भबी-तबी पर्तीरब पात्ताङ्येसेमे सैदे ख्वब मीदे असी प्रेक्क्य, चेनेयलो येर जाँचयू सैदीकब मीदे जीयाजे मुकुट प्रेक्क्य, हम्ब मुकुट परमेश्वरने प्रेम चेब मीयूने पीन्क्य यदेबे परमेश्वरदे चेब कबुल ख्यङ्। 13 येर भबी-तबी पर्तीरब, “परमेश्वरदे ङैजे परीक्षा चे ख्यङ्” यदेबे सूदेये अन्-यस्य। चेनेयलो अन्ज्य सेदे परमेश्वरजे परीक्षा चे अङ्खू, मेस्ये परमेश्वर रङ्सेदेये सूजेये जाँच अन्ची। 14 तर मीयू क्वाने रङ्सेजे अन्ज्य इच्छादे लोभ चीस्सेपीन्देबे परीक्षाने पर्दीय। 15 होर्दे अन्ज्य इच्छादे ख्वाजेम क्यूक्क्य मेस्ये हम्बदे पाप जन्मेदीय मेस्ये हम्ब पाप थेप् थेप् क्यूप्पदेबे काल रेक्क्य। 16 ङैजे छेब अत-अजी-च्योनयू, लूच्च पोयूदे छाक्तीकने। 17 सोरो ज्य मेस्ये सिद्ध बरयू क्वाने स्वर्गदे रीय, ओथ्याङ्जे परमेश्वर प ट्यादे अम्ब बरयू क्वाने रीय। फेर्दीनब छायाप्र ङू कलङ्बेये अम्फेर्दी। 18 ङूदे सृष्टि चीक्कब साप्ता थोकयू नङ्ने ङीन पात्ता खूम्जे फलप्र क्यूर खूस्य यदेबे परमेश्वरदे रङ्से इच्छा अनुसार सत्यजे वचन क्यम्देबे ङीनने सृष्टि चीत्दे। पो ङ्यीन् मेस्ये काम ची 19 ङैजे अत-अची च्योन्यू, च्योर्लाबे ङ्यीनो, कोलेबे क्यम् मेस्ये कूम प्रो अन्लङब क्यूर पर्तीय यब पो नमयू क्वादेने ह्वे चीन्नू। 20 चेनेयलो मीजे छीदे परमेश्वरने छेब काम फर अङ्खू। 21 येरेक्यूत्देबे अन्ज्य आनि-बानी मेस्ये दुष्ट पोयू क्वाने क्यापी मेस्ये नमयूजे सेम्ने हीतेब पो स्यूलूक्कै क्यूत्देबे मन्दी, नमयूजे प्राणने उद्धार चीम्मे ख्वब शक्ति अम्ब पोने ख्यङ्। 22 वचन ङ्यीन्देबेत्या रङ्सेने धोका अम्पीन्लाची, तर हम्ब पोदे च येको हम्बने चेब क्यूरो। 23 कोइ मीदे वचन ङ्यीन्क्य तर हम्ब अनुसार अन्चीत्देयलो, हम्ब मी ऐनने रङ्से त्वा लेब मीप्रने क्यूक्क्य। 24 चेनेयलो ङूदे रङ्सेने लेक्क्य मेस्ये थैचेकीय, होर्दे रङ्से त्वा कर ख्य यब पो खात्याने क्योङ् येल्गीय। 25 तर हम्ब मीयूने स्वतन्त्र पीनब सिद्ध नियम सूदे ङ्यीन्क्य मेस्ये मन्दीनीय, होर्दे ङ्यीन्देबे येल्बे दी, तर काम फरबये क्यूक्क्य, थमयूदे चेब कामने थमयूदेने असी प्रेक्क्य। 26 कादेये कोइमीदे परमेश्वरने चेलाबे पूस्तीन ख्यङ् मन्नीय, तर रङ्से लीने तह अन्लैदीदेयलो रङ्सेने धोका पीन्क्य, होर्दे हम्ब मीदे सीत्तीनेत्या परमेश्वर पूस्तीनब क्यूक्क्य। 27 नदे प-म त्वब टा-ट्वेयू मेस्ये प्ल्यङ् सीयेब मदीयूजे सकस्ने दोङ्मी मेस्ये संसारने ख्यब दुष्ट सेयूट्यादे आलाक् क्यूत्देबे टूङ्, परमेश्वर पदे शुद्ध मेस्ये दोष त्व ठर्तीयेब धर्म अम्ब ख्यङ्। |
Ghale New Testament © Nepal Bible Society, 2011.
Nepal Bible Society