हिब्रू 9 - घले नयाँ करारअम्ब संसारजे पवित्र नेने परमेश्वर पूस्तेब 1 खूम्जे करारने परमेश्वर पूस्तेब धर्मजे छ्यप्यू मेस्ये परमेश्वर पूस्तेब पवित्र नेये अम्ब पृथ्वीनेये ख्य। 2 परमेश्वरने पूस्तेबजे लागि पवित्र पाल-कीम् ख्य, हम्ब पवित्र पाल-कीम्जे पात्ता खूम्ने ख्यब कोठा नङ्ने सामदान, टेबल मेस्ये परमेश्वरने चेर्तीयेब क्यङ्यू ख्य, हम्ब नेने पवित्र ने य ख्य। 3 होर्दे दोस्रो कोठा पर्दादे कायेब नेजे नङ्ने ख्य, हम्ब नेने पात्ता केन् पवित्र ने य ख्य, 4 हैयाने धूप नेनब मर्जे तीया मेस्ये मर्दे तोलेब करारजे बेङे ख्य। हम्ब करारजे बेङे नङ्ने मन्न हीतेब मर्जे तीया, पूप्चे क्यून्नब हारूनजे पीर्क मेस्ये करारजे आज्ञा लिख्दीयेब लूङ्जे प्ल्याङ्यू ख्य। 5 परमेश्वर होने ख्यङ् यदेबे तनने महिमाजे करूबयूदे हम्ब करारजे बेङे फ्याने ख्यब कृपाजे ने उप्न ख्य। तर अम्ब पोयूजे बारेने ङी चूजो छीप्-छीप् य-अङ्खू। 6 येर्बे अम्ब थोकयू क्वाने मील्ली जेनङ्येदे पूस्र्यायू रङ्सेजे छ्यप् मेस्ये चे पर्तेबे काम चीदे-चीदे येतार्ने फीजे पवित्र पाल-कीम् नङ्ने क्योबलीम् चे ख्य। 7 तर नङ्जे पात्ता केन् पवित्र नेने पात्ता केन् पूस्र्यात्यामे वर्षजे त्याफेत्या नङ्ने क्योबीय, होरे क्योबब रोलायूजे का टेल्देबे प्रीय होरेने अन्क्योब। ङू रङ्सेदे मेस्ये मीयूदे चीक्कब पापजे लागि हम्ब रोलाजे का चेर्तीय। 8 पवित्र आत्मादे ङीनने अम्ब छ्यप्यू तन्देबे लोम्मे ख्यङ्। कन्छ्वासेमे फीजे पवित्र पाल-कीम् क्यून्नीय, हन्छ्वासेमे पात्ता केन् पवित्र पाल-कीम् नङ्ने क्योबब लम् प्रेस्स्ये त्वो। 9 दिन्नसेमेजे लागि अम्ब नमूनात्या ख्यङ्, चेर्तीयेब भेटी मेस्ये बलियूदे परमेश्वरने पूस्तेब मीयूजे विवेकने शुद्ध चे अङ्खू यदेबे अम्बदे तन ख्यङ्। 10 तर हम्ब क्वाने च-थूङ चेब मेस्ये ङ्व ठूदेबे शुद्ध चेब थर्-थर्जे छ्यप्यू त्यामे ख्यङ्, या फीजे धर्मजे छ्यप्यूत्यामे ख्यङ्, अम्ब छ्यप्यू सूजो सर् ज्य छ्यप् अम्फ्योरदासेमे त्यामे ख्यङ्। येशू ख्रीष्टजे का 11 तर साप्ता ज्य सेयूजे पात्ता केन् पूस्र्या क्यूत्देबे ख्रीष्ट खूम्ने रेक ख्य, सोरो थेप् केन् मेस्ये सिद्ध पवित्र पाल-कीम् नङ्ने ङू गीलीदे। अम्बब मीजे लादे बन्दीयेब दी, या सृष्टि चेबये दी। 12 र-बोका मेस्ये बार् पीचजे का टेल्देबे दी, तर ङू रङ्सेजे का टेल्देबे कलङ्बेये नाश अन्क्यूरब मुक्ति पीन्देबे त्याफेने येतार्जे लागि पात्ता केन् पवित्र ने नङ्ने ङू क्योइदे। 13 र-बोका मेस्ये लप्यूजे का होर्दे प्ल्याङ्नब मीने नेन्देबे चेर्तेब कीत पीचजे मील अशुद्ध मीयू फ्याने थर्बीब थमयूजे ङ्व शुद्ध क्यूक्क्य यलो, 14 ख्रीष्टजे कादे नमयूजे चैये काम अन्लादेब विवेकने अझ थेप् कूम शुद्ध चीम्मीय, मेस्ये नमयूदे सोम्बो परमेश्वरजे सेवा चे खूस्य। चेनेयलो येतार्ने क्यून्नब परमेश्वरजे आत्माप्रे क्यूत्देबे ख्रीष्टदे रङ्सेने चैये खोट् त्वब बलिजे रूप्ने परमेश्वरने चेर्तीपीदे। 15 येरेक्यूत्देबे परमेश्वरदे सेलबयूने कलङ्बेये नाश अन्क्यूप्पब हक पीनने, पदे चेब कबुल प्रेस्स्य यदेबे अम्ब सर् करारजे लागि चजो-पजो चेब ख्रीष्ट क्यूर ख्यङ्। चेनेयलो खूम्जे करारजे बीलने मीयूदे चीक्कब पापदे जेम्से मुक्ति प्रेक्क्य चेनेयलो अम्ब कामजे लागि ख्रीष्ट सीयेजन्क ख्यङ्। 16 कोइ मीजे इच्छादे लिख्दीयेब तमसूकजे पो चीत्देयल्लो हम्ब लिख्देब मी खूम् सीये जेङ्कब गवाही क्यूरपर्तीय, 17 कोइ मीजे इच्छादे लिख्दीयेब तमसूक लिख्देब मी सीब ङ्येदेब हम्ब तमसूक पक्क क्यूक्क्य, चेनेयलो अम्ब तमसूक लिख्देब मी सोम्बो ख्यङ्दा हम्ब लिख्दीयेब तमसूक पक्क अन्ठर्दी। 18 येरेक्यूत्देबे पात्ता खूम्जे करारये रोलायूजे का अन्चर्दीता सेमे पक्क अन्क्यूर ख्य। 19 कन्छ्वाब मोशादे मीयू क्वाजे खूम्ने नियमजे आज्ञायू क्वाने येमीदे, होर्दे बार् पीच मेस्ये बोकाजे काप्रे क्यू च्यूम्देबे पी-मल्लम् मेस्ये हिसपजे लेम् ख्यब चीद हाँगादे मोशाजे नियमजे किताब फ्याने मेस्ये मीयू क्वा फ्यानेने थर्बीदे। 20 होर्दे ङूदे येरे यदे, “परमेश्वरदे नमयूने आज्ञा चीत्देबे पीनब करारजे का अम्ब ख्यङ्।” 21 होरप्रने ङूदे पवित्र पाल-कीम् मेस्ये परमेश्वरने पूस्तेब बीलने चील्लेब साप्ता तीयाँयू फ्याने हम्ब का थर्दे। 22 तम्दम्ने मोशाजे नियम अनुसार कूमप्र पोब मीयू क्वा-फ्याने का थर्देबे शुद्ध चीक्क्य, मेस्ये का अम्फन्दासेमे पापजे क्षमा क्यूरने अङ्खू। 23 कादेये स्वर्गने ख्यब सेयूजे के-थाब पोयूने शुद्ध चेने येर छ्यप्यू चैतीदेयलो, स्वर्गजे सेयूने शुद्ध चेनेब सोरो थेप् ज्य बलिजे हर्जो पर्तीदे। 24 अम्ब तम्दम्जे पवित्र पाल-कीम्जे नमूना चीत्देबे मीजे लादे बन्दीयेब पवित्र नेने ख्रीष्ट अन्क्योइ, तर ङू स्वर्ग नङ्ने क्योइदे, मेस्ये ङू ङीनजे लागि परमेश्वरजे खूम्ने क्यूर ख्यङ्। 25 पात्ता केन् पूस्र्या वर्षजे पीछीने रङ्सेजे का दी, तर रोलायूजे का टेल्देबे हम्ब पात्ता केन् पवित्र नेने क्योबप्रने, येशूदे घरी-घरी रङ्सेने बलि चेर्तेजे लागि स्वर्ग क्योये दी। 26 नत्रलो संसार सृष्टि चेमेस्येने ङूदे येतार्ने दु:ख चीन्न पर्ते ख्यङ्दे। तर अम्ब जूग् जेन्टब बीलने पाप हर्दीबेने येतार्जे लागि त्याफे रङ्से जीया बलि पीनने ङू रदे। 27 मीयू क्वाने त्याफे सीब पर्तीय यब पो पक्क ख्यङ्, होर्दे ङ्येदे ङूजे न्याय परमेश्वरदे चीक्क्य। 28 होरप्रने ख्रीष्ट कूम मीजे पाप प्लेकेजे लागि त्याफे बलि क्यूत्दे। ङू फेरि दोस्रो पोलोने रीय। हन्छ्वाबब पाप प्लेने दी, तर ङूजे लम् लेन्नब मीयूजे उद्धार चेने रीय। |
Ghale New Testament © Nepal Bible Society, 2011.
Nepal Bible Society