हिब्रू 7 - घले नयाँ करारपात्ता केन् पूस्र्या मल्कीसेदेक 1 अम्ब मल्कीसेदेक शालेमजे मूरुम् मेस्ये पात्ता केन् परमेश्वरजे पूस्र्या ख्य। मूरूमयूने ट्यादेबे अब्राहाम ल्वारीनूब मल्कीसेदेकदे ङूने तूदेबे असी पीन्दे। 2 अब्राहामदे ङूने साप्ता थोकजे भा च्यूने भात्या स्यादेबे पीन्दे। अम्ब मीन्जे अर्थ अनुसार ङू खूम् धार्मिकताजे मूरुम् मेस्ये होर्देङ्येदे शालेमजे मूरुम् या शान्तिजे मूरुम् ख्य। 3 ङूजे प-म त्वो, वंशये त्वो, जीया सुरु क्यूर मेस्ये सीयेब चैये था त्वो, तर परमेश्वरजे चप्रने, ङू येतार्जे लागि पूस्र्या क्यून्नीय। 4 जेम्से सेम्ने ह्वे ची, ङू कर फत्या मी केन् ख्यङ्दे! ङूने अब्राहाम मेमेदेये ट्यारेब सेजे भा च्यूने भात्या पीन्दे। 5 पूस्र्या काम फरने सेलेब लेवी वंशजे मीयूदे साप्ता थोकजे भा च्यूने भात्या रङ्सेजे अत-च्योन्यू फ्याने स्य्वा प्रेब आज्ञा मोशाजे नियमदे इस्राएलीयूने पीन ख्य। थमयू अब्राहामजे छगूम्-पूर्गूम् क्यूल्लीने अम्ब नियम मन्दे पर्दे ख्य। 6 तर लेवीजे वंशने अम्पर्तेब अम्ब मल्कीसेदेकदे भा च्यूने भात्या अब्राहामजे लादे कीन्दे, मेस्ये परमेश्वरजे कबुल प्रेब मीयूने ङूदे असी पीन्दे। 7 मी केन्दे मी चीदने असी पीन्क्य यब पोने स्वाल्-जवाफ चीन्नने अम्पर्ती। 8 सीब पर्तेब पूस्र्यायूदे भा च्यूने भात्या लङ्क्य, तर धर्मसशास्त्रदे य ख्यङ्, येतार्ने सोम्बो क्यून्नब मल्कीसेदेकदेये भा च्यूने भात्या लङ्दे। 9 अब्राहामदे भा च्यूने भात्या मल्कीसेदेकने पीन्ब भा च्यूने भात्या प्रेब लेवीदेये पीन ख्य यदेबे कोइ मीदे यखूइय। 10 चेनेयलो मल्कीसेदेकदे अब्राहामने तूब लेवीब अब्राहाम मेमेजे ङ्व नङ्ने ख्य। येशू मल्कीसेदेकप्रने 11 लेवी पूस्र्याजे गज्ज्य अनुसार परमश्वरदे पीनब मोशाजे नियम इस्राएलीयूदे प्रेख्य। लेवीदे चेब पूस्र्या कामदे साप्ता कूरु सिद्ध चे-ख्वयलो हारूनजे गज्ज्य अनुसार अन्क्यूत्देबे फेरि मल्कीसेदेकजे गज्ज्य अनुसार सूजो पूस्र्या सेलने चेने हर्जो ख्य स्व? 12 चेनेयलो पूस्र्या पदने सूजो टूङ्रब मोशाजे नियमये सूजोने क्यूर पर्ते ख्य। 13 चेनेयलो ङूजे बारेने अम्ब पोयू येक ख्य, ङू ब सूजो खलकजे ख्यङ्, हम्ब खलकजे सूदेये चाक्क्याने काम कलङ्बेये अम्फर ख्य। 14 चेनेयलो ङीनजे प्रभू यहूदाजे खलकदे योङ्र ख्यङ् यब पो ङीन क्वानेने चेलाबे था ख्यङ्। अम्ब खलकजे पूस्र्या क्यूक्क्य यब पोने मोशादे चैत्याये अन्-य ख्य। 15 मल्कीसेदेकप्र सूजो पूस्र्या रेक ख्यङ्-यलो अम्ब पो अझ थेप् चेलाबे तङखूइय, 16 ङूब लेवी खलकजे बारेने मीयूने पीनेब नियम अनुसार क्यूर दी, तर कलङ्बेये नाश अन्क्यूप्पब जीयाजे शक्ति अनुसार पूस्र्या क्यूर ख्यङ्। 17 चेनेयलो ङूजे बारेने धर्मशास्त्रने येरे लिख्दीये ख्यङ्, “मल्कीसेदेकदे प्रेब गज्ज्यप्रने न येतार्जे लागि पूस्र्या ख्यङ्।” 18 चेनेयलो हम्ब खूम्जे आज्ञाब चैकम्ते मेस्ये शक्ति त्व क्यूत्देबे खारेज क्यूरे ख्यङ्, 19 चेनेयलो मोशाजे नियमदे चै पोये सिद्ध चे अङ्खू। तर जेम्से थेप् सोरो ज्य ङीनदे प्रे ख्यङ्, हम्बदे चीत्देबे परमेश्वर ट्याने ङीन फ्योबीय। 20 होर्दे अम्बब कसमने अन्चलाबे क्यूरब पूस्र्या दी। 21 तम्दम्ने मालाङ् खूम् पूस्र्या क्यूरबयूदेब कसमने अन्चील्लाबे पूस्र्याजे काम चीत्दे, तर ङू ब कसम चदेबे पूस्र्या क्यूत्दे, मेस्ये ङूजे बारेने परमेश्वरदे य ख्यङ्, “परमप्रभूदे कसम च ख्यङ्, मेस्ये ङूदे रङ्सेजे सेम् सूजो चीस्ये त्वो, ‘येतार्जे लागि न पूस्र्या ख्यङ्’।” 22 येशूदे अम्ब कसम चदेबे सोरो ज्य करारजे जेमेन् चे ख्यङ्। 23 खूम्जे पूस्र्यायू कूम ख्य, चेनेयलो सीब पर्देब ङ्वदे थमयू क्वानेने पूस्र्या काम चीन्नूस्ये अम्पीन ख्य। 24 तर येशू कलङ्बेये अन्सीबब क्यूत्देबे ङूजे पूस्र्या काम येतार्ने टूनीय। 25 होरेक्यूत्देबे येशूने विश्वास चीत्देबे परमेश्वर ट्याने रबयू क्वानेने येतार्जे लागि ङूदे उद्धार चीम्मे खूइय। चेनेयलो थमयूजे लागि परमेश्वरप्रे प्रार्थना चीम्मेने ङू येतार्ने सोम्बो क्यून्नीय। 26 चेनेयलो ङीनजे लागि पवित्र, दोष त्वब, चैये खोट् त्वब, पाप त्वब, मेस्ये पात्ता फ्या स्वर्गने लङ्केब पात्ता नङ्ने केन् येर पूस्र्या त्या क्यूर पर्ते ख्यङ्। 27 सूजो पात्ता केन् पूस्र्यायूदेप्र खूम् रङ्से पापजे लागि होर्देमेस्ये मीयूदे चीक्कब पापजे लागि येतार्ने ङूदे बलि पीन्न अम्पर्ती। ङू रङ्सेने बलि क्यूस्स्ये पीन्देबे येतार्जे लागि त्याफेने ङूदे अम्ब काम पूरा चीप्पीदे। 28 चेनेयलो मोशाजे नियमदे बोङ् त्वब मीयूने पात्ता केन् पूस्र्याजे काम फरने सेल्क्य, तर येतार्जे लागि सोरो सिद्ध चीक्कब परमेश्वरजे चने मोशाजे नियम यली ङ्येदे रब कसमजे वचनदे पात्ता केन् पूस्र्याजे काम चेने सेल्क्य। |
Ghale New Testament © Nepal Bible Society, 2011.
Nepal Bible Society