हिब्रू 4 - घले नयाँ करारपरमेश्वरजे मीयू अराम टूङब दिनने गैन सङ्ब 1 होरेक्यूत्देबे परमेश्वरजे गैन सङब नेने क्योब प्रेब कबुल ङीनप्रेये ख्यङ्, मेस्ये नमयू नङ्ने सूत्याये कबुल अनुसार परमेश्वरजे गैन सङब नेने क्योब अम्प्रेन्ने यदेबे ङीन होस्स्यार क्यूत्देबे टूङे। 2 चेनेयलो थमयूनेप्र सूगब खबर ङीनेये स्योक्क ख्यङ्। तर थमयूदे तैकब परमेश्वरजे वचनदे थमयूने चैये फाइदा अन्क्यूर्, चेनेयलो थमयूदे हम्बने विश्वासये अन्ची मेस्ये अम्मन्दी। 3 चेनेयलो ङीन विश्वास चेयूब हम्ब गैन सङब नेने क्योबीय, परमेश्वरदे येरे य ख्यङ्, “येरेक्यूत्देबे ङैने छी रब ङैदे येरे कसम चदे, ‘ङैजे गैन सङब नेने नमयू कलङ्बेये क्योब प्रेस्स्ये त्वो’।” परमेश्वरजे योजनायू पूरा संसार सृष्टि क्यूरमेस्येने पूरा क्यूक्कलीने ङूदे येरे यदे। 4 चेनेयलो परमेश्वरदे धर्मशास्त्रजे सूजो नेत्याने ङ्यीर्या-दिनजे बारेने येर तर्तीप्दे येये ख्यङ्, “परमेश्वरदे काम क्वाने चीक्क-ङ्येदे ङ्यीर्याने गैन् सङ्दे।” 5 होर्दे परमेश्वरदे धर्मशास्त्रजे अम्बनेने फेरि यदे, “ङैजे गैन सङब नेने थमयू कलङ्बेये क्योब प्रेस्स्ये त्वो।” 6 हैयाने क्योबने कोइ कोइ मी फेरि लम ख्यङ्, मेस्ये थमयू सू-सूने खूम् सूगब खबर स्योक्क ख्य, थमयूदे हम्ब पोने विश्वास अन्चीत्देबे हम्ब गैन सङब नेने क्योये अम्प्रे। 7 फेरि परमेश्वरदे “दीनी” यब दिनत्या तोक्तीदे। ङूदे खूम्ने क्यम्कब पो फेरि कूम-ङयेदे दाऊद मूरुम्ने क्यम्से पीन्दे, “दीनी नमयूदे ङूजे के तदेयलो, नमयूदे रङ्से सेम् कोङ अन्चील्लाची।” 8 चेनेयलो कादेये यहोशूदे नमयूने गैन सङब नेने सेबीकयलो परमेश्वरदे सूजो दिनजे बारेने ङ्येदे अन्-य ख्यङ्दे। 9 येरेक्यूत्देबे परमेश्वरजे मीयूजे लागि अराम टूङब खास दिनजे गैन सङ पर्तेने लम ख्यङ्। 10 चेनेयलो परमेश्वर रङ्सेदे काम चेजेन्देबे गैन सङप्रने परमेश्वरजे गैन सङब नेने क्योबब सूनेयली रङ्सेदे चीन्नब छम्प्रेदे गैन सङ्क्य। 11 येरेक्यूत्देबे ङीन हम्ब गैन सङब नेने क्योबने बोङ् चीदे, मेस्ये आज्ञा अम्मन्देब मीयूप्र सूये नाश अन्क्यूप्पस्य। 12 चेनेयलो परमेश्वरजे वचन सोम्बो मेस्ये काम फर ख्वब ख्यङ्, मेस्ये पट्टी-ङ्हीदेने छ्यर धर ख्यब तरवार यली थेप् छ्यर ख्यङ्। अम्बदे प्राण मेस्ये आत्माने हम्बजे जोर्न्या जोर्न्या होर्दे नोङ्र्याजे नङ्ने ख्यब स्यीम्ने भा-भा चीत्देबे ती-छो भोङ् चेब, सेम्जे पो मेस्ये इच्छाने जाँचते खूइय। 13 परमेश्वरजे खूम्ने सृष्टिजे साप्ता थोक अन्तङ अन्क्यूर्। ङूजे म्यादे साप्ता थोकने चेलाबे तङ खूइय, ङीन रङ्सेदे चेब साप्ता कामजे हीसाब ङूने पीन पर्तीय। येशू पात्ता केन् पूस्र्या ख्यङ् 14 स्वर्गने गीलेब परमेश्वरजे च येशू ङीनजे पात्ता केन् पूस्र्या ख्यङ्, होरेक्यूत्देबे ङीनदे चीन्नब अम्ब विश्वासने थेप् बोल्यो क्यूत्देबे टूङ पर्तीय। 15 चेनेयला ङीनजे पात्ता केन् पूस्र्यादे ङीन बोङ् त्व क्यूप्प ङीन्जे अवस्था अङ्ख्वब क्यूप्प ङीनप्रे तोङ्मेने अङ्ख्वब अन्क्यूर्। तर ङीनप्रने ङूये साप्ता थोकजे जाँचने पर्तीदेलीने पाप अन्चे ख्य। 16 येरेक्यूत्देबे ङीनने हर्जो क्यूरब बीलने तोङ्मेने ङीनदे कृपा मेस्ये अनुग्रह प्रेखूस्य यदेबे ङीन आँट चीत्देबे अनुग्रह प्रेब सिंहासनजे ट्याने प्रे। |
Ghale New Testament © Nepal Bible Society, 2011.
Nepal Bible Society