हिब्रू 2 - घले नयाँ करारबोङ्बे आर्तेब 1 होरेक्यूत्देबे ङीनदे तम्दम् पो च-तदे हम्ब पोने थेप् चेलाबे सेम् पीन पर्तीय, नत्र ङीन हम्ब तम्दम् पोदे यप्र अन्क्यूल्लाबे खेदे प्रब क्यूप्पीय। 2 स्वर्गदूयूदे मीयूङ् ङीनजे मेमेयूने येमेब परमेश्वरजे पो सत्य ठर्दीकदे, होर्दे हम्ब पो अम्मन्देबयू मेस्ये हम्ब अनुसार अन्चेबयूदे प्रेपर्देब सजाइ प्रेत्दे। 3 येर सोरो केन् मूक्ति प्रेब पोने मतलब अन्चीत्देयलो ङीन केरे प्लीम्ब प्रेक्क्य स्व? अम्ब मुक्तिजे पो प्रभूदे खूम्ने स्योक्क ख्य। प्रभूजे वचन ङ्यीन्कबयूदे अम्ब तम्दम् ख्यङ् यदेबे ङीने पक्क चीम्मीदे। 4 परमेश्वरदेये च्यूनूयू, हार्मन्देत्या कामयू, कूम शक्तिजे कामयू मेस्ये ङूजे रङ्से इच्छा अनुसार पवित्र आत्मादे पीनब बरयू पीन्देबे अम्ब मूक्ति पीनब पोजे गवाही पीन्दे। मूक्ति पीनब ख्रीष्ट 5 ङीनदे पो चील्लीम् चेब हम्ब ङ्येदे रब संसारने परमेश्वरदे स्वर्गदूतयूजे हक नङ्ने अन्-येन्। 6 तर कोइदे धर्मशास्त्रजे नेत्याने येरे यदेबे गवाही पीने ख्यङ्, “मी जाबो चला ख्य स्व, नदे हम्बजे येर ख्याल चे? या मीजे च चला स्व, न ङूजे सूर्त चे? 7 खात्यात्या नदे ङूने स्वर्गदूतयू यली छीत्यात्या चीद चीम्मीदे। नदे ङूने महिमा मेस्ये गेसेन् प्रेब मुकुट कूमीक ख्यङ्। 8 साप्ता सेयू फ्याने नदे ङूने हुकुम चील्लीसे पीन्दे।” नदे साप्ता सेयू मीजे हक नङ्ने येम्मीब ङूजे हक यली फीने चैये बाँकी क्यूस्स्ये अम्पीन्। तर दीनीजे सेमेने ङीनदे साप्ता सेयू मीजे हक नङ्ने क्यूक्कब अन्तङ्। 9 तर ङीनदे येशूने तङ्क्य। ङूने खात्यात्यामे स्वर्गदूतयू यली ते-चीद चीम्मीदे, सीब पर्दे सकस् भोक्तीकदेबे महिमा मेस्ये गेसेन्जे मुकुट ङूने कूमीदे। येर्बे परमेश्वरजे अनुग्रहदे चीत्देबे मीयू क्वाजे लागि ङू सेक्कदे। 10 परमेश्वरदे साप्ता थोकयू सृष्टि चीत्दे, मेस्ये साप्ता थोक ङूजे लागि बन्दीदे। ङूदेने रङ्सेजे कूम च-चीमीयूने महिमाने रेजे लागि चून्तीदे। होर्दे थमयूने मुक्ति पीनजे लागि परमेश्वरदे येशूने सकस्यू भोक्तीस्ये पीन्देबे सिद्ध चीम्मेब पो सोरो ठीक ख्य। 11 चेनेयलो पवित्र चीम्मेब मेस्ये पवित्र चीक्कबयूये क्वाने कीम् म्हीतीत्या ख्यङ्। होरेक्यूत्देबे थमयूने अत-अची च्योन्यू यदेबे क्वने येशू अन्त्वा। 12 ङूदे य ख्यङ्, “ङैजे अत-अची च्योन्यूजे खूम्ने नैजे मीन् बोङ्बे स्योक्क्य, सभाजे अन्द्रने नैजे सार्या चीक्क्य।” 13 मेस्ये फेरि, “ङ ङू फ्याने भर् चीक्क्य।” मेस्ये फेरि ङूदे य ख्यङ्, “ले, परमेश्वरदे ङैने पीनब अम्ब च-चीमीयूप्रे ङ येने ख्यङ्।” 14 हम्ब च-चीमीयू स्य-काजे ङ्व क्यूरबदे येशूये थमयूप्रने स्य-काजे ङ्व टेल्देबे जन्मीदीदे, येर्बे ङू रङ्से सीबदेबे, सीबला चेब शक्ति ख्यब शैतानने ङूदे नाश चीस्स्य, 15 मेस्ये सीब पर्दीय यदेबे सोरो फैनब पोदे जीया भरी त्वो-त्वोम क्यून्नबयूने ङूदे छुटकारा चीम्मीस्य। 16 चेनेयलो तम्दम्ने ङू स्वर्गदूतयूजे लागि तोङ्मेने र दी, तर अब्राहामजे छगूम्-पूर्गूम्यूने तोङ्मेने र ख्यङ्। 17 येरेक्यूत्देबे साप्ता पोने ङू रङ्से अत-अची च्योन्यूप्र क्यूर पर्तीदे, मेस्ये मीयूजे पापने क्षमा चीम्मेने परमेश्वरजे सेवा चेब कामने ङू कृपा चेब मेस्ये भर् पर्तेब पात्ता केन् पूस्र्या क्यूत्दे। 18 ङू रङ्सेये जाँचने पर्तीदेबे दु:ख भोक्तेब क्यूत्देबे जेम्से जाँचने पर्तेबयूने ङूदे तोङ्मे खूइय। |
Ghale New Testament © Nepal Bible Society, 2011.
Nepal Bible Society