हिब्रू 12 - घले नयाँ करारपरमेश्वरदे सूधारदीय 1 येरेक्यूत्देबे विश्वासजे यर साक्षी पीनब कूम मीयूजे हुलदे ङीनने घेर्तीन ख्यङ् होरेक्यूत्देबे साप्ता थर्जे अप्ठर् चेब ले-क्वीयू मेस्ये ङीनने बाधा पीनब पापने छाबीदेबे ङीनजे खूम्ने हीतेब परमेश्वरजे लागि ग्यब काम धेरेन् क्यूत्देबे पूरा चीते। 2 ङीनजे विश्वासने सुरु मेस्ये पूरा चीम्मेब येशूने लेन्नूदे, ङूजे खूम्ने हीम्मेब आनन्दजे लागि न प्वेब पोने चैत्याये अम्मन्लाबे ङूदे क्रूसजे सकस् भोक्तीदे, मेस्ये परमेश्वर देन् छ्यानब सिंहासनजे स्येत्देयोर् देन् छ्यान ख्यङ्। 3 पापीयूदे ङूजे विरुद्धने चेब सोरो कूम अन्ज्य पोयू सैदीनबने ह्वे ची, मेस्ये नमयू थेल्लीदेबे सेम् चीद अन्चलाची। 4 नमयूदे पापजे विरूद्धने छेम्प्रे चीप्प सीबता सेमेब नमयूदे छेम्प्रे चे अम्पर्दे ख्यङ्। 5 होरदे परमेश्वरदे नमयूने रङ्से चप्र चीत्देबे पीनब अर्तीजे पो नमयूदे येल्क औ?, “ङैजे च, परमप्रभूदे नने सूधारतेब पोने सीत्तीने अम्मन्लाची, ङूदे दण्ड पीन्ब सेम् अन्सीला ची, 6 चेनेयलो परमेश्वरदे सूने प्रेम चीक्क्य हम्बने सूधारदीय, मेस्ये रङ्सेदे चजे रूप्ने मन्देबयू क्वानेने ङूदे दण्ड पीन्क्य।” 7 सूधारतेजे लागि सकस् प्रेप्प नमयूदे सैदीय। नमयूने परमेश्वरदे रङ्से चनेप्र माया चेख्यङ्, चेनेयलो पदे सूधारदेजे लागि दण्ड अम्पीनब च कम्ब ख्यङ् स्व? 8 कादेये सूधारतेजे लागि पीनब सकस् क्वादेने भोक्तीकप्रने नमयूदे हम्ब दण्ड अम्भोक्तीक ख्यङ्देयलो नमयू रङ्से पजे खास चयूने दी, तर वेश्य काम चीत्देबे जन्मीदेब चयू ख्यङ्। 9 अम्बत्यामे दी, अम्ब संसारने ख्यङ्ब ङीनने सूधारतेजे लागि दण्ड पीनब रङ्से प ख्य, मेस्ये ङीनदे पने गेसेन् चीत्दे। हम्बयली थेप् ङीनजे परमेश्वर पजे आज्ञा मन्दीदेबे जीया अम्प्रेया? 10 चेनेयलो संसारने ख्यब पयूदे ज्य थेदासेमे ते-दिन ङीनने दण्ड पीन्दे। तर परमेश्वरदे ङीन ङूप्रने पवित्र क्यूर खूस्य यदेबे ङीनजे फाइदाजे लागि सूधारदीय। 11 सूधारतेजे लागि दण्डयू पीम्ब खूम्ब ज्य अन्थे, तर सकस् क्यूक्क्य, होर्देङेयेदे सकस्दे खार्तीकयूजे लागि हम्ब सकस्दे धर्मी जीयाजे लागि शान्तिजे इनाम प्रेब चीम्मीय। 12 येरेक्यूत्देबे गेल्लीकब लायू तो लङ्, बोङ् त्वब पूजीयू बोल्यो ची। 13 नमयू प्रब लम् ज्य ची, होरेक्यूल्लो बोङ् त्वब पूजीयूदे बोङ् प्रेस्स्य मेस्ये तम् क्यूप्पस्य। विश्वास अन्क्यापीलाचेने बोङ्बे आर्तेब 14 मीयू क्वाप्रेने थून्देबे मेस्ये पवित्र क्यूत्देबे टूङने बोङ् ची, पवित्र अन्क्यूत्दासेमे सूमीदेये परमप्रभुने तङ् अङ्खू। 15 होस्स्यार क्यूर, परमेश्वरजे अनुग्रह सूमीदेये अम्प्रे अन्क्यूस्स्य, मेस्ये सेम्ने अन्ज्य पोजे छ डोम्बदेबे हम्ब अन्ज्य छदे त्यात्याने अन्थून अन्चीस्स्य, मेस्ये कूम मीयूने अशुद्ध अन्चीस्स्य। 16 सूमीये छाडा स्वभावजे अन्क्यूल्लाची मेस्ये एसावप्र धर्मी त्वब अन्क्यूल्लाची। ङूदे जन्मीदीबने प्रेब जेठ चजे हकने छा-त्या चसेजे लागि सोङ्बीदे। 17 नमयूदे थाने ख्यङ्, ङ्येदे असी प्रेजे लागि मल्लीने ङूदे हम्ब प्रेअङ्खू। चेनेयलो ङूदे म्यामू तेल्देबेये हम्ब असी मल्लीने पश्चाताप चेब मौका अम्प्रे। 18 लादे छ्वे ख्वब गङ्ने नमयू अन्रेक ख्यङ्। प्ल्याङ्न मी उम्द, चूक्प्र मून्दूङ्, लङ्रीरी मूक्प, मेस्ये सोरो अन्ज्य हून्डनेये अन्रेक ख्यङ्। 19 धूङ्कूर्जे केन् आवाजजे ट्याने, मेस्ये आवाज त्याजे ट्यानेये नमयू अन्रेक ख्यङ्, हम्बजे आवाज तब-मीयूदे “जेम्से सूजो पो त्याये थेप् अन्क्यम्स्य” यदेबे बिन्ती चीत्दे। 20 चेनेयलो, “कादेये कोइ रोलादे हम्ब गङ् छूक्कदेयलो हम्बने लूङ्दे खान्दीदे से” यब आज्ञा थमयूदे सैदे अङ्खू। 21 हैयाने मीयूदे लेप्प सोरो फत्या तङख्य, चेनेयलो मोशादेये “ङ फदेबे फ्रीक्क्य” यख्य। 22 तर नमयूब सियोन गङ्ने, सोम्बो परमेश्वरजे सहरने, स्वर्गजे यरूशलेमने, मेस्ये चीलने अङ्ख्वब स्वर्गदूतयूजे आनन्द चेब नेने रेक ख्यङ्। 23 स्वर्गने मीन् लिख्दीकब, खूम् जन्मीदीकब परमेश्वरजे च-चमीयूजे सभाने नमयू रेक ख्यङ्। नमयू क्वाजे न्याय चेब परमेश्वरजे खूम्ने, सिद्ध चीक्कब धर्मी मीयूजे आत्माजे अन्द्रने, 24 परमेश्वर मेस्ये मीयूजे अन्द्रने सर् करारजे पो मील्लेब येशू मेस्ये ङूजे छीट्का काजे खूम्ने नमयू र ख्यङ्। अम्ब कादे हाबिलजे कादे यली थेप् ज्य पो क्यम ख्यङ्। 25 होस्स्यार क्यूत्देबे टूङ्, नमयूप्रे क्यमबजे केने अम्मन्दे अन्चील्लाची। अम्ब पृथ्वीने बोङ्बे आर्तेबने अम्मन्देब इस्राएलीयू प्लीने अम्प्रे यलो झन् स्वर्गदे क्यमबने अम्मन्दीदे यलो ङीनजे अवस्था करम क्यूक्क्य? 26 हन्छ्वाब ङूजे केदे पृथ्वीने लीङ्बीदे, तर जेम्सेब ङूदे येरे यदेबे कबुल चीक्क ख्यङ्, “ङ फेरि त्याफे, पृथिवीनेत्यामे दी, तर स्वर्ग सजने लीङ्क्य।” 27 “फेरि त्याफे” यब पोदे अम्ब तन्क्य हम्ब लीङ ख्वब सेयू, या सृष्टि क्यूक्कब सेयू हर्दीपीय, तर लीङ अङ्ख्वब सेयू बोल्यो टूनीय। 28 येरेक्यूत्देबे लीङने अङ्ख्वब राज्य प्रेब क्यूत्देबे ङीन परमेश्वरने धन्यवाद पीने। येर्बे परमेश्वरने मन्देब, गेसेन् चेब मेस्ये फब क्यूत्देबे ङूने पूस्तीदे। 29 चेनेयलो तम्दम्ने ङीनजे परमेश्वरब भस्सम् चेब प्ल्याङ्नब मी ख्यङ्। |
Ghale New Testament © Nepal Bible Society, 2011.
Nepal Bible Society