हिब्रू 11 - घले नयाँ करारविश्वासजे नमूना 1 होर्दे विश्वासब, आशा चीन्नब पो तम्दम्ने क्यूट्टीय यदेबे सेम्ने पक्क चेब मेस्ये अन्तङब पोजे प्रमाण ख्यङ्। 2 चेनेयलो येर विश्वास तोङ्बो जूग्जे मीयूप्रे क्यूत्देबे परमेश्वरदे थमयूने सेम् पर्तीदे। 3 परमेश्वरजे वचनदे अम्ब स-मू साप्ताने सृष्टि चीत्दे, मेस्ये कम्ब तङ्न ख्यङ् हम्ब म्यादे तङ अङ्ख्वब सेदे क्यूट्टदे यब पो ङीनदे विश्वास चीत्देबे क्वख्व ख्यङ्। 4 विश्वास चीत्देबेने कयिनदे यली हाबिलदे परमेश्वरने थेप् सेम् पर्तेब बलि चेर्तीदे, मेस्ये अम्ब काम चीत्देबे हाबिल धर्मी ठर्तीकदे। हाबिलदे चेर्तेब बलि परमेश्वरदे स्वीकार चीत्दे। हाबिल सीये जेङ्कली ङूदे चेब विश्वासजे कारणदे ङू अझ क्यम्न ख्यङ्। 5 विश्वास चीत्देबेने हनोक सोम्बो ख्यङ्बने तो स्वर्ग लङ्कीदे, मेस्ये ङू केनेये मल्ब अम्प्रे, चेनेयलो परमेश्वरदे ङूने कूते ख्य। ङूने स्वर्ग कूदेयली खूम् ङूदे परमेश्वरने बेस्से सूग्लाबे चीम्मेब मी यदेबे स्येख्य। 6 विश्वास अन्चील्लाबे परमेश्वरने सूग्लाबे चेने अङ्खू। चेनेयलो परमेश्वजे खूम्ने सू रीय, हम्ब मीदे परमेश्वर ख्यङ् मेस्ये परमेश्वरने मलबयूजे लागि परमेश्वरदेने इनाम पीन्क्य यब पो पक्क रूप्ने विश्वास चे पर्तीय। 7 नोआदे विश्वास चीत्देबे हन्छ्वासेमे म्यादेने अन्तङब मेस्ये ङ्येदे क्यूरब पोजे बारेने परमेश्वरदे बोङ्बे आर्तीब ङूदे चेलाबे मन्दीदे, होरदे रङ्से कीम् म्हीत्तीने जूक्तेजे लागि नोआदे क्यू-जहाजत्या बन्दीदे। येरे संसारजे मीयूजे दोष तम्मीदे, मेस्ये विश्वास चीत्देबे ङू धर्मी क्यूरब हक प्रेत्दे। 8 अब्राहामदे विश्वास चीत्देबे परमेश्वरजे आज्ञा मन्दीदे, मेस्ये परमेश्वरदे प्र यब नेतेले गीलीदे, हम्ब नेजे हक परमेश्वरदे ङूने ङ्येदे पीन्स्ये ख्य, होरेक्यूल्ली ङू कर्तेयोर् प्रेन ख्य यब पो ङूने था त्वो। 9 विश्वास चीत्देबेने ङू सूजो देशजे मीप्र क्यूत्देबे कबुल चेब देशने इसहाक मेस्ये याकूबप्र पालजे कीम्ने बास टूङ्दे। थमयू अब्राहामप्रे-प्रेने हम्ब कबुलजे हक प्रेबयू ख्य। 10 चेनेयलो कलङ्नेयली क्यून्नब जा फ्याने बन्दीयेब सहर प्रेने ङूदे लेन्न ख्य, हम्ब सहरजे योजना चीत्देबे बन्देब परमेश्वर ख्यङ्। 11 सारादेये विश्वास चीत्देबे रङ्सेजे लो कूम गीलीलीने ख्वाजेम क्यूर ख्वब शक्ति प्रेत्दे। चेनेयलो कबुल चेबने ङूदे भर् पर्ते ख्वब ख्यङ् यदेबे मन्दे। 12 येरेक्यूत्देबे सीब मल्नब मीत्याप्रे परमेश्वर क्यूत्देबे चीलने अङ्ख्वब मूजे कर्चेन्यू ताकी मेस्ये समुद्र नने ख्यब पीसजे धूलोयू ताकी छगूम्-पूर्गूम् योङ्रदे। 13 थमयू क्वाने परमेश्वरदे चेब कबुल अम्प्रेप्पने विश्वास चीत्देबेने सीइ, तर चीन्तङ्देने हम्ब कबुल तङ्दे होर्दे स्वागत चीत्दे। अम्ब पृथ्वीने सूजो देशजे मीप्र क्यूत्देबे ङीन तेदिनजे लागि त्यामे बास टूङ्र ख्यङ् मन्दे। 14 येर पो यब मीयूदे रङ्से टूङजे लागि देश मल्न ख्यङ् यब पो कोय। 15 कादेये थमयू योङ्देबे रब देशजे पोयू ह्वे चीन्नूदेयलो, थमयू ल्वाबब मौका प्रे ख्यङ्दे। 16 तर थमयूदे झन् थेप् सोरो ज्य देश, या स्वर्ग देशने प्रब सेम् चीन्नूदे। येरेक्यूत्देबे परमेश्वरदे ङ थमयूजे परमेश्वर ख्यङ् यने अन्त्वा, चेनेयलो ङूदे थमयूजे लागि सहरत्या तयार चीत्देबे हीते ख्यङ्। 17 परमेश्वरदे अब्राहामजे जाँच चीप्प, विश्वासजे भरने अम्ब्राहामदे रङ्से च इसहाकने बलि पीन्दे। परमेश्वर्दे ङूप्रे कबुल चे ख्य, होरेक्यूल्ली रङ्सेजे तीत्यात्या चये बलि चेर्तेने ङू तयार क्यूत्दे। 18 अम्ब च इसहाकजे बारेने येरे येये ख्य “इसहाकदेने नैजे छगूम्-पूर्गूम्यू कूम चीक्कीय।” 19 परमेश्वरदे सीयेब मीनेये फेरि सोम्बो चीम्मे खूइय यब पो अब्राहामदे ह्वे चीत्दे, अम्ब पो नमूनाजे रूप्ने येनूलोब, अब्राहामदे सीयेब रङ्से च इसहाकने फेरि सोम्बो ल्वारे प्रेत्दे। 20 विश्वास चीत्देबेने इसहाकदे याकूब मेस्ये एसावने थमयूजे ङ्येदे रब जीयाजे लागि असी पीन्दे। 21 विश्वास चीत्देबेने सीब बील क्यूट्टब याकूबदे योसेफजे च ह्ङीने असी पीन्दे मेस्ये रङ्सेजे पीर्गने आठे चीत्देबे परमेश्वरजे जै-जै चीत्दे। 22 विश्वास चीत्देबेने सीब मेल्नब बीलने योसेफदे इस्राएलीयू मिश्रदेशदे योङ्देबे प्रीय यब पो क्यम-ख्य, मेस्ये ङू सीब ङ्येदे ङूजे ङ्वने चेपर्तेब पोयूये येये ख्य। 23 मोशा प्रेप्प ङूजे प-मदे ङूने सोरो ज्य तङ्दे मेस्ये विश्वास चीत्देबेने ल-सोम्सेमे ङूने फूदेबे येत्दे, मेस्ये मूरुम्दे चेब हुकुमने थमयू फने अम्फलाबे टूङ्दे। 24 स्योर्ब क्यूरङ्येदे विश्वास चीत्देबेने मोशादे फारोजे चीमीजे च क्यूर अन्ङ्यीन्। 25 पापजे खात्यात्या सून्ताकी भोक्तेयली परमेश्वरजे मीयूप्रे छरङ् भोक्तेने ङूदे सेम् पर्तीदे। 26 मिश्रदेशजे सीर सम्पत्ति यली ख्रीष्टजे लागि बदनाम क्यूरने ङूदे केन् सीर-सम्पत्ति थेदे। चेनेयलो ङूजे रङ्से सेम्दे ङ्येदे प्रेब इनाम त्यामे लेन्न ख्य। 27 मूरुम्जे छीप्रे अम्फलाबेने ङूदे विश्वास चीत्देबे मिश्रदेश पङ्गीदे। चेनेयलो म्यादे तङ अङ्-ख्वब परमेश्वरने तङप्रने ङूदे सेम् बोल्यो चीत्देबे टूनूदे। 28 पात्ता अतने सेबदे थमयूने चैये अन्चीस्स्य यदेबे ङूदे विश्वास चीत्देबे निस्तार-दीन्बरजे छ्यप् मन्दीदे मेस्ये बलिजे का ख्यो सङ्गर्ने थरने आज्ञा पीत्दे। 29 इस्राएलीयूदे विश्वास चीत्देबे स-खर्ने प्रेनप्र तोप्दे प्रदेबे लाल समुद्र थेत्दे, येरप्रने मिश्रीयूदे हम्ब थेन्नूब क्यूने डुब्दीदेबे सीइ। 30 विश्वास चीत्देबेने ङ्यीर्यासेमे ख्यूरीरी प्रेकमेस्ये यरीहोजे पूङ्रीयू हूली। 31 विश्वास चीत्देबे राहाब वेश्यदे च्यूव चीट्टब मीयूने चेलाबे स्वागत चेब क्यूत्देबे परमेश्वरजे आज्ञा अम्मन्देब मीयू सीइलीने ङू अन्सीइ। 32 ङ सूजो थेप् च य स्व? चेनेयलो गिदोन्, बाह्रक, शिमसोन, यिप्ताजे बारेने मेस्ये दाऊद, शमुएल होर्दे अगमवक्तायूजे बारेने ङ स्य्वेन्न अन्हो। 33 विश्वास चीत्देबेने थमयूदे देशयू फ्याने ट्यादे, चेलाबे न्याय चील्लीदे, परमेश्वरदे चेब कबुलयू प्रेत्दे, डेन्यायूजे ङूर्ये च्यूप् चीम्पीदे, 34 प्ल्याङ्नब मी उम्दयूये सेप्पीदे, तरवारदे तूप्रब छ्योङ्ये प्रेत्दे, बोङ् त्वब ख्य तर बोङ् प्रेत्दे, जीङ्ब पात्ता थेप् ट्या ख्वब क्यूत्दे, सूजो देशजे सिपाईयूने ताल्बे खूदे। 35 विश्वास चीत्देबेने मदीयूदे रङ्सेजे सीयेब मीयू फेरि सोम्बो क्यूरब तङ-प्रेत्दे। कोइ मीयूब सीब ङ्येदे झन् थेप् ज्य जीया प्रेने सीब पर्तीली छूर्दीदेबे र-अन्ङ्यीन् बरू सकस् भोक्तीनूदे। 36 कोइ मीयूने ह्यल चीत्दे, कोइने कोर्रादे ठरीदे मेस्ये सूजोयूब ख्यादेबे कैदनेये स्योप्पीदे। 37 कोइ मीयूने लूङ्दे ठरीदे। कोइने अर्रदे ख्वादे मेस्ये कोइने तरवारदे सेत्दे। ह्वेब चैये त्वोदेबे र-स्वान्जे खूज्य होत्दे मेस्ये कङ्गाल क्यूत्देबे कूम सतनम्, छरङ् प्रेत्देबे ती-छो प्रदे। 38 संसार थमयूजे लागि लायकजे त्व ख्य। चैत्याये अम्फेब चनमन ने, गङ्यू, तोरोङ्यू मेस्ये पृथ्वीजे पूक्यूने थमयू टूङे-टूङे प्रपर्दीदे। 39 होरदे थमयू क्वादेने चेब विश्वासजे लागि थमयूजे कूम सार्या क्यूत्दे, तर परमेश्वरदे चेब कबुलजे पो सूदेये अम्प्रे ख्य। 40 परमेश्वरदे ङीनजे लागि झन् थेप् ज्य पो हीते ख्य, येर्बे ङीनप्रे-प्रेने थमयू सिद्ध क्यूस्स्य। |
Ghale New Testament © Nepal Bible Society, 2011.
Nepal Bible Society