हिब्रू 10 - घले नयाँ करारख्रीष्टजे बलि येतार्जे लागि 1 मोशाजे नियमब जेम्से रमेल्नब सोरो ज्य पोयूजे तम्दम् रूप् दे ख्यङ्, तर हम्बजे नमूना त्यामे ख्यङ्। येरेक्यूत्देबे वर्षजे पीछी येतार्ने बलि पीनब येर कामदे परमेश्वर ट्याने रब मीयूने सिद्ध चीम्मे अङ्खू। 2 कादेये बलि चेर्तीदे शुद्ध क्यूर ख्वयलो, हम्ब काम अन्-रोक्तीक या? चेनेयलो परमेश्वरने पूस्तेब मीयू पलो त्यानेने शुद्ध चीक्कयलो होर्दे ङ्ये मेस्ये थमयूजे सेम्दे पाप यब पो अन्स्ये ख्यङ्दे। 3 तर हम्ब बलिदे वर्षजे पीछीने पापजे पो ह्वे चीम्मीय। 4 चेनेयलो लप् मेस्ये बोकाजे कादे पाप मल्बे अङ्खू। 5 येरेक्यूत्देबे कन्छ्वाब ख्रीष्ट संसारने रदे, हन्छ्वाब ङूदे पर्मेश्वरने यदे, “बलि मेस्ये भेटी नदे सेम् अम्पर्ती, तर नदे ङैजे लागि ङ्वत्या तयार चीम्मीक ख्यङ्। 6 होम् बलि मेस्ये पापजे लागि पीनब बलियू नदे सेम् अम्पर्ती। 7 होर्दे ङैदे यदे, ‘परमेश्वर, ङ अने ख्यङ्, धर्मशास्त्रने ङैजे पो लिख्दीयेप्रने नैजे इच्छा पूरा चेने ङ रख्यङ्’।” 8 खूम् ङूदे यदे, “बलि, भेटीयू, होम् बलि मेस्ये पापजे लागि पीनब बलियूने नदे सेम् अम्पर्ती। हम्ब बलि पीनब कामनेये न अन्सूग्।” (अम्बब मोशाजे नियम अनुसारत्या चे ख्यङ्)। 9 होर्दे फेरि ङूदे यदे, “परमेश्वर, नैजे इच्छा पूरा चेने ङ रख्यङ्।” ङ्येजे बली पीनब छ्यप्ने येन्नजे लागि खूम्जे बलि पीनब छ्यप्ने ङूदे खारेज चीप्पे ख्यङ्। 10 परमेश्वरजे इच्छा अनुसार येशू ख्रीष्टजे ङ्व बलि क्यूत्देबे ङीनने येतार्जे लागि पवित्र चीम्मीक ख्यङ्। 11 पूस्र्यायू क्वादेने त्याप्र-खल्जे बलि येतार्ने चेर्दीदेबे दिनजे पीछीने सेवा चीन्नीय, अम्ब चेर्दीनब बलिदे कलङ्बेये पाप मल्बे अङ्खू। 12 तर ख्रीष्टदे पापयूजे लागि येतार्ने पूक्तेब तीत्यात्या बलि पीन्दे, होर्दे ख्रीष्ट परमेश्वरजे स्येत्तेयोर् देन् छ्यान ख्यङ्। 13 मेस्ये ङूजे शत्रुयूने ङूजे तोप् त्याङ् नङ्ने अन्-येम्मीदासेमे ङू रेन्नीय। 14 चेनेयलो बलि त्यादेने सू-सू पवित्र चीम्मीक ख्यङ्, येशूदे थमयू क्वानेने येतार्जे लागि सिद्ध चीम्मे ख्यङ्। 15 पवित्र आत्मादेये ङीनने गवाही पीन ख्यङ्। मेस्ये प्रभूदे य-ख्यङ्, 16 “हम्ब दिनयूङ्येदे थमयूप्रे चेब ङैजे करार अम्ब ख्यङ्, यदेबे परमप्रभु य-ख्यङ्, ङैजे नियम थमयूजे त्याङ्ने येम्मीय, मेस्ये हम्ब नियम थमयूजे सेम्नेये ङ लिख्दीमीय।” 17 होरदे फेरि ङूदे य ख्यङ्, “थमयूदे चीक्कब पाप मेस्ये अन्ज्य कामयू ङ कलङ्बेये ह्वे अन्ची।” 18 कन्छ्वाब अम्ब क्वाजे पाप क्षमा क्यूक्क्य, हन्छ्वाब पापजे लागि फेरि चैये-बलि पीन अम्पर्ती। छेम्प्रे चेजे लागि क्वब 19 येरेक्यूत्देबे अत-अची च्योन्यू, ङीन्जे लागि क्रूसने सीयेब येशूजे कादे ङीनने पात्ता केन् पवित्र ने नङ्ने क्योबब आँट पीन ख्यङ्। 20 ङूदे ङीनजे लागि सर् मेस्ये जीया पीनब लम् पूक्मे ख्यङ्, होरेक्यूत्देबे पर्दा नङ्ने क्योबप्र येशूजे ङ्वने क्यूत्देबे ङीनब नङ्ने क्योब खूइय। 21 परमेश्वरजे कीम्ने ङीन्जे लागि पात्ता केन् पूस्र्यात्या ख्यङ्, 22 होरेक्यूत्देबे क्रूसने सीयेब येशूजे कादे ङीन्जे अन्ज्य विवेकने शुद्ध चीक्क्य। शुद्ध क्यूदे ङीन्जे ङ्व ठूदेबे तम्दम् सेम्दे विश्वासजे पुरा भर्ने ङीन परमेश्वरजे खूम्ने प्रे। 23 ङीनदे पक्क रूप्दे ग्रहण चेब आशाने अल्मल् अन्क्यूल्लाबे बोङ्बे चूङ्नूदे, चेनेयलो परमेश्वरदे चै कबुल चीत्दे हम्ब ङूदे पूरा चीक्क्य यदेबे भर् चीन्न खूइय। 24 ङीन त्यादे त्याने प्रेम चीत्देबे सोरो ज्य काम चीन्नजे लागि केरे बोङ् पीनखूइय यब पोयूने विचार चीदे। 25 कोइ मीयू सङ्गतिने अम्प्रब बनी ख्यङ्, तर ङीनब सङ्गतिने फूङ् क्यूरने अन्क्यालाचीदे। मेस्ये नमयूदे प्रभु रब दिन ट्यार्याङ् फ्योरब तङ्देबे त्यादे त्याने थेप् बोङ् पीन। 26 तम्दम् पो स्येदेये ङीनदे था प्रेदे-प्रेदेने पाप चीन्नूदेयलो जेम्सेमेस्ये पापने क्षमा चीम्मेब बलि सूजो चैये अन्क्यूर्, 27 तर सोरो फत्या न्याय क्यूरब दिन मेस्ये ङूजे शत्रुयूने नाश चेब छीप्रे-प्रे प्ल्याङ्नब मीत्यामे रेन्नब क्यूक्क्य। 28 मोशाजे नियम अम्मन्देब मीयूने मी ह्ङी या सोम् साक्षीयूजे गवाही क्यूल्लोम ङूने अन्ङ्येम्लाबे से पर्ते ख्यङ्। 29 नमयू रङ्सेदेने ह्वे ची: परमेश्वजे चने तोप्दे छ्यब, रङ्सेने पवित्र चीम्मेब करारजे काने अशुद्ध चेब मेस्ये अनुग्रह पीनब आत्माजे न प्वेब मीयूदे झन् सोरो अन्ज्य दण्ड प्रेब क्यूक्क्य। 30 चेनेयलो, “खी फाब काम ङैजे ख्यङ्, खी ङैदे फाय।” येरे यबने ङीनदे स्येख्यङ्, फेरि येरेये य ख्यङ् “परमप्रभुदे रङ्से मीयूजे न्याय चीक्क्य।” 31 सोम्बो परमेश्वजे लाने पर्ते यब पो सोरो फत्या ख्यङ्। 32 हम्ब खूम्जे दिनयूने ह्वे ची। परमेश्वरजे ओथ्याङ् प्रेक्कङ्येदे नमयू फ्याने अन्ज्य सकस्यू पर्तीरलीने कूम धेरेन् क्यूत्देबे टूङ्दे। 33 कलङ्ब मीयूदे नमयूजे न पूत्दे मेस्ये मीयूजे खूम्ने अन्ज्य सकस्यू पीन्देबे तामासा क्यूत्दे यलो कलङ्ब येरप्र दु:ख प्रेब मीयूने तोङ्मेजे लागि नमयू थमयू प्रे-प्रे मेर ख्य। 34 नमयूदे कैदने ख्यब मीयूने दया तन्दे, मेस्ये रङ्सेजे सम्पत्ति लूर्तीकीली सूगे-सूगे सैदीनूदे, चेनेयलो झन् थेप् येतार्ने क्यून्नब केन् सम्पत्ति रङ्सेप्रे ख्यङ् यब पो नमयूदे स्ये ख्य। 35 होरेक्यूत्देबे येर बोङ् पीनब नमयूजे विश्वास अन्-क्यापीलाची, अम्ब विश्वासदे केन् इनाम पीन्क्य। 36 परमेश्वरजे इच्छा पूरा चेने मेस्ये ङूदे चीक्कब कबुल अनुसारजे इनाम प्रेजे लागि नमयू धेरेन् क्यूत्देबे टूङ पर्ते ख्यङ्। 37 चेनेयलो धर्मशास्त्रने लिख्दीये ख्यङ्, “जेम्से खात्याने रपर्तेब रने रीय, मेस्ये ङू गस्ये त्वो। 38 तर ङैजे धर्मी मीयूब विश्वास चीत्देबे सोम्बो क्यून्नीय, मेस्ये कादेये ङूदे विश्वास अन्चे क्यूप्पदे यलो ङू तङ्देबे ङ अन्सूग क्यूक्क्य।” 39 तर विश्वास अन्चे क्यूप्पबयू मेस्ये नाश चीप्पेबयू ङीन दी, तर विश्वास चीत्देबे उद्धार प्रेक्कबयू नङ्जे ख्यङ्। |
Ghale New Testament © Nepal Bible Society, 2011.
Nepal Bible Society