गलाती 2 - घले नयाँ करारमूल स्यूस्स्यायूदे पावलने स्वागत चेब 1 चौध वर्ष ङ्येदे बारनाबासप्रे तीतसने प्रे स्योल्देबे ङ फेरि यरूशलेम गीलीदे। 2 परमेश्वरदे य-अनुसार ङ गीलीदे, मेस्ये ङैदे यहूदी तेबयूने प्रचार चेब हम्ब सूगब खबर थमयूजे खूम्ने स्योत्दे। तर ङैदे चैजे लागि यदेबे ग्येक ख्य या ग्येबीन ख्यङ् हम्ब थेन्ने अन्क्यूस्स्य यदेबे अगुवाप्र क्यूरबयूने आलाक्के ङैदे अम्ब पो स्योत्दे। 3 तर ङैप्रे ख्यब तीतस ग्रीक मी क्यूल्लीने खतना चेपर्तीय यदेबे सूदेये कर् अन्चङ्। 4 अम्ब खतनाजे पो लङ्दे, कोला लूच्च अत-च्योन्यू ङीन हुल नङ्ने नङ्सू क्योरदे चेनेयलो ख्रीष्टने क्यूत्देबे ङीनदे प्रेब स्वतन्त्रताजे च्यूव चीत्देबे ङीनने यहूदी नियमजे नङ्ने येमे ख्यङ्। 5 सूगब खबरजे सत्य नमयूजे लागि सुरक्षित क्यूस्स्य यदेबे थमयूजे खूम्ने ङी खात्यात्याये अन्झूक्दी। 6 गेसेन् प्रेब मी केन्यू थमयू करने ख्यङ्लीने ङैने चैफरकये अम्पर्ती। परमेश्वरदे मीजे त्वा लेत्देबे साक्पूजा चीस्येत्वो। होर्दे हम्ब मी केन्यूदे ङैजे पोने चैत्याये अन्थप्तीमी। 7 हम्बजे सट्टने परमेश्वरदे खतना चेबयूने सूगब खबर प्रचार चेब जिम्मा पत्रुसने पीनप्रने खतना अन्चेबयूने सूगब खबर प्रचार चेब जिम्मा ङैने पीन टूङ् यदेबे थमयूदे था प्रेत्दे। 8 पत्रुसने मूल स्यूस्स्या चीम्मीदेबे खतना चेब मीयूजे अन्द्रने काम चीस्स्ये पीनप्रने परमेश्वरदे ङैनेये यहूदी तेब मीयूजे अन्द्रने काम चेजे लागि मूल स्यूस्स्या चीम्मीदे। 9 याकूब, पत्रुस मेस्ये यूहन्ना मीयूब मण्डली थम्दीनब थमयूप्र ख्य, थमयूदे ङैफ्याने क्यूरब परमेश्वरजे अनुग्रह था प्रेङ्येदे ङैने मेस्ये बारनाबासने सङ्गतिजे केन् कामजे जिम्मा पीन्दे। ङीयूब यहूदी तेब मीयूट्याने प्रब मेस्ये थमयूब खतना चीक्कबयू ट्याने प्रब यदेबे थमयूदे पक्क चीत्दे। 10 थमयूजे अम्ब इच्छात्या ख्य, दूक्प्रेबमीयूने ह्वे चीत्देबे तोङ्मे पर्दीय। होरप्र काम ङ सोरो चीतीङ् रख्य। पावल प्रे पत्रुस अन्थूनब 11 तर कन्छ्वाब पत्रुस एन्टिओखियाने रदे, हन्छ्वाब क्वादेने तङ्लाबे ङैदे ङूजे विरोध चीत्दे। चेनेयलो ङूजे गल्ती ख्य। 12 याकूबदे कूल्बेब मीयू फ्योरयली खूम्ने ङूदे यहूदी तेब मीयूप्रेने टूङ्देबे च ख्य। तर कन्छ्वाब थमयू फ्योरदे हन्छ्वाब ङू यहूदी तेब मीयूप्रे आलाक् क्यूत्दे, चेनेयलो ङू खतना चीक्कब दलप्रे फ ख्य। 13 सूजो लम ख्यब यहूदीयूदेये होरप्रने स्वाङ् तनब काम चीत्दे। अन्छ्वासेमे क्यूरीकी, थमयूजे स्वाङ् तङ्देबे बारनाबासजे सेम्ये ढल्-पल् क्यूरी। 14 तर कन्छ्वाब सूगब खबरजे सत्य पोने थमयू अम्प्रब ङैदे तङ्दे, हन्छ्वाब थमयू क्वाजे खूम्ने ङैदे पत्रुसने यदे, “न यहूदी क्यूत्देबेये यहूदीप्र अन्क्यूल्लाबे यहूदी तेब मीयूप्र क्यूत्देबे प्रीययलो, यहूदी तेब मीयूने यहूदीजे छ्यप् मन्दी यदेबे केर्बे कर् चङ् खूइय?” 15 ङीन जन्मीदीबने यहूदी ख्यङ्, मेस्ये यहूदी तेब मीप्र पापी दी, 16 होरक्यूल्ली ङीनदे स्येख्यङ्, मोशाजे नियम मन्दीदेबे मी धर्मी ठर्तीस्ये त्वो, तर येशू ख्रीष्ट फ्याने विश्वास चेबत्या धर्मी ठर्तीय। येरेक्यूत्देबे ङीदे ख्रीष्ट येशूने विश्वास चीत्दे, येरे ङीन मोशाजे नियम मन्दीदेबे दी, तर ख्रीष्ट फ्याने चेब विश्वासदे धर्मी ठर्तीय, चेनेयलो मोशाजे नियम मन्दीदेबे सूये धर्मी अन्ठर्दी। 17 तर कादेये ख्रीष्टने धर्मी ठर्तेने बोङ् चीप्प ङीनदे पापने चीन्नब क्यूक्क्य यलो, ख्रीष्टदे पाप चीस्स्ये पीन्क्या स्व? अँह, पीन्स्ये त्वो। 18 चेनेयलो रङ्सेदेने नोङ्बैब से ङैदे फेरि बन्दीय यलो, ङ रङ्सेदे रङ्सेने अपराधी ख्यङ् यदेबे प्रमाण पीन्क्य। 19 चेनेयलो परमेश्वरजे लागि ङ सोम्बो क्यूर खूस्य यदेबे मोशाजे नियमने ङ सीये ख्यङ्। 20 ङ ख्रीष्टप्रेने क्रूसने खील् ठोक्दीदेबे पीले ख्यङ्, जेम्सेमेस्ये सोम्बो क्यूरब ङ दी, तर ख्रीष्ट ङै नङ्ने सोम्बो क्यूत्देबे टून ख्यङ्। चूजो ङ कम्ब जीया ङ्वजे रूप्ने सोम्बो क्यून्न ख्यङ् हम्ब परमेश्वरजे च-फ्याने विश्वास चीत्देबे अम्ब जीया चैय, ङूदे ङैने प्रेम चीत्दे, मेस्ये ङैजे लागि रङ्सेजे प्राण पीन्दे। 21 परमेश्वरजे अनुग्रहने ङ ह्यल चे अन्खू, चेनेयलो मोशाजे नियमदे धर्मी ठर्दे ख्व यलो ख्रीष्ट धन्ने सीइदे। |
Ghale New Testament © Nepal Bible Society, 2011.
Nepal Bible Society