एफिसी 6 - घले नयाँ करारच-चीमी मेस्ये प-मजे बारेने अर्ती 1 च-चीमीयू, रङ्से प-मदे यब पो ङ्यीन्, चेनेयलो अम्ब परमेश्वरने सेम् पर्दे ख्यङ्। 2 रङ्से प मजे गेसेन् ची। कबुल अनुसारजे अम्ब खूम्जे आज्ञा ख्यङ्, 3 नमयूने भलो क्यूस्स्य, मेस्ये पृथ्वीने नमयूजे छे रेङ क्यूस्स्य। 4 पयू, रङ्से च-चीमीने छी लङ्स्ये अम्पीन्लाची, तर थमयूने प्रभुजे शिक्षा मेस्ये तालिम पीन्देबे हूर्कीदी। त्वो मेस्ये मालिकयूने अर्ती 5 त्वो-त्वोमयू ख्रीष्टजे सेवा चेप्रने ईमानदारी क्यूत्देबे नमयूजे संसारजे मालिकयूदे यब आज्ञा मन्दी। 6 मीयूने सूग्ला चेबदेप्र म्याजे खूम्ने तनब काम त्या अन्चील्लाची, तर ख्रीष्टजे त्वो-त्वोमयूप्र क्यूत्देबे सत्य रूप्ने सेम्-नङ्दे मेस्येने परमेश्वरजे इच्छा पूरा ची। 7 मीयूजे लागि दी, तर प्रभुजे लागि सेवा चेप्र सेम् नङ्दे मेस्येने ची। 8 त्वो-त्वोम क्यूल्लीने या स्वतन्त्र क्यूल्लीने ज्य काम चेब मी जती क्वानेने प्रभुदे इनाम पीन्क्य, अम्ब पो नमयूने थाने ख्यङ्। 9 मालिकयू, होरप्रने रङ्से त्वो-त्वोमयूप्रे ज्य व्यवहार ची। मेस्ये थमयूने लला अन्चील्लाची। चेनेयलो नमयू ङ्हीजेने मालिक स्वर्गने ख्यङ् यब अन्-यल्लाची। परमेश्वरदे न्याय चीप्प सूनेये साक्पूजा अन्ची। परमेश्वरजे लास्या 10 जेम्से आखिरीने, नमयू प्रभुजे केन् शक्तिदे प्रभुने बोल्यो क्यूर। 11 शैतानजे जूक्तीयूजे विरुद्धने मेर ख्वजे लागि परमेश्वरजे लास्यायू टक्कने टेल्। 12 जीङब ङ्व प्रे काजे विरुद्धने नमयू दी, तर मूने ख्यब शक्तियू मेस्ये दुष्ट हुकुम चील्लेबयूजे विरुद्धने, होर्दे मून्दूङ् जूग्जे हुकुम चील्लेयू, हक चील्लेबयू, मेस्ये मूजे दुष्ट आत्मायूजे विरुद्धने ख्यङ्। 13 येरेक्यूत्देबे परमेश्वरजे लास्यायू टक्कने लङ्, मेस्ये अन्ज्य दिनसेमेने जीङ खूस्य मेस्ये आखिरीसेमे जीङ्देबेये न मेर खूलाची। 14 येरेक्यूत्देबे तयारी क्यूर। सत्यब कूच्यूप्र ढप्ने ख्यादेबे गूने धार्मिकताजे पाता होत्देबे मेर्, 15 मेस्ये मीलापजे सूगब खबर तोप्ने ह्वेब पङ्गीप्र ह्वे मेस्ये पूरा तयार क्यूर्। 16 होर्दे विश्वासजे ढाल लङ्, हम्बदे चीत्देबे नमयूदे शैतानजे प्ल्याङ्नब मीजे बाण से-खूइय। 17 टजे रक्षा चेब मुक्तिजे टोप कू, मेस्ये पवित्र आत्माजे पार्ज्य टेल, हम्बब परमेश्वरजे वचन ख्यङ्। 18 येतार्ने प्रार्थना ची, परमेश्वरने तोङ्मी य। कम्ब बीलनेनेने यली पवित्र आत्माजे बोङ्दे प्रार्थना चीत्देबे टूङ्। अम्ब पो सेम्ने हीत्देबे येतार्ने होस्स्यार क्यूत्देबे परमेश्वरजे पवित्र मीयू क्वाजे लागि येतार्ने प्रार्थना चीन्नू। 19 ङैजे लागिये प्रार्थना ची, कन्छ्वाब ङ क्यमने रङ्से ङूर पूक्य हन्छ्वाब ङैने वचन पीन्स्य, मेस्ये ङैदे अम्फलाबे सूगब खबरजे नङ्सू पो क्यम खूस्य, 20 ङ झ्यालखानने टूनूलीने अम्ब सूगब खबरजे लागि ङ ख्रीष्टजे दूत क्यूर ख्यङ्। प्रार्थना चीम्मी मेस्ये ङैदे केर्बे क्यम पर्दे ख्य होर्बेने बोङ्बे क्यम खूस्य। पात्ता ङ्येजे नमस्कार 21 ङ कर ख्यङ् मेस्ये च चीन्न ख्यङ्, हम्ब नमयूनेये था क्यूस्स्य यदेबे छेब च्योन् मेस्ये प्रभुने विश्वासीलो सेवा चेब मी तूखीकसदे साप्ता पोने नमयूने स्योक्क्य। 22 ङीनजे खबर कर ख्यङ् नमयूने था क्यूस्स्य मेस्ये नमयूजे सेम्दे आँट प्रेस्स्य यब विचारदे ङैदे ङूने नमयूट्याने कूल्बे ख्यङ्। 23 परमेश्वर प मेस्ये प्रभु येशू ख्रीष्ट ट्यादे अत-च्योन्यूने विश्वासप्रे-प्रेजे शान्ति मेस्ये प्रेम ख्यङ्! 24 ङीनजे प्रभु येशू ख्रीष्टने येतार्ने प्रेम चेब मीयू क्वाप्रेने परमेश्वरजे अनुग्रह क्यूस्स्य। |
Ghale New Testament © Nepal Bible Society, 2011.
Nepal Bible Society