एफिसी 4 - घले नयाँ करारख्रीष्टजे ङ्वने त्याक्यूरब 1 ङ प्रभुजे लागि झ्यालखानने टूङब कैदी त्या ख्यङ्, नमयूने बिन्ती चीक्क्य, यी प्रभुदे चेकामजे लागि नमयूने क्व ख्यङ् हम्ब मफीजे जीया च। 2 येतार्ने स्यूलूक्कै, सोझो मेस्ये धेरेन् क्यूत्देबे त्यादे त्याने प्रेम चीदेबे सैदीदेबे, 3 शान्तिजे बन्धन्ने पवित्र आत्माने त्याने क्यून्नजे लागि बोङ् ची। 4 ङ्व तीत्यात्या ख्यङ्, मेस्ये पवित्र आत्माये तीत्यात्याने ख्यङ्-केर्बे नमयू कोब आशा त्या तन्देबे क्व ख्य, नेये हम्ब आशाने क्वब ख्यङ्। 5 प्रभुये त्या, विश्वासये त्याने मेस्ये बप्तिस्माये तीत्याने ख्यङ्। 6 ङीन खोत्ताजेने प परमेश्वर तीत्याने ख्यङ्। ङू क्वाजेने प्रभु ख्यङ्। साप्ता काम चेब ङूने ख्यङ् मेस्ये ङू क्वाप्रेने क्यूक्क्य। 7 तर ख्रीष्टदे पीनेब नाप अनुसार ङीन क्वानेने अनुग्रह पीने ख्यङ्। 8 येरेक्यूत्देबे धर्मशास्त्रने येरे येये ख्यङ्: “ङू तो स्वर्गने गीलीब ङूदे कैदीयूने चुङ्देबे कूदीदे मेस्ये मीयूने बरयू पीन्दे।” 9 (जेम्से अम्ब “ङू तो स्वर्गने गीलीदे” यब च ख्यङ्? अम्बदे ङू पृथ्वीनेये मेस्ये माम्मो नङ्सेमेये तेलीदे यब पो क्व ख्यङ्। 10 येशू मो-तल्रदे ङू स्वर्गयूयलीने थेप् तो गीलीदे, येरे साप्ता थोकने ङूदे भरीपूर्न चेखूस्य।) 11 होर्दे ङूजे बरयू अम्बने ख्यङ्, कोइ मूल स्यूस्स्यायू, कोइब अगमवक्तायू, कोइ परमेश्वरजे सूगब खबर स्य्वेब मीयू, कोइ पास्टरयू मेस्ये कोइ छ्योम्मेब मीयू क्यूस्स्य। 12 थमयूजे जिम्माब परमेश्वरजे पवित्र मीयूने ख्रीष्टजे काम चेख्वाब चेने मेस्ये ङूजे ङ्व मण्डलीजे उन्नती चेजे लागि ख्यङ्। 13 येर्बे अम्ब बरयूजे कामयूदे ङीनने विश्वासजे मेस्ये परमेश्वरजे चजे ज्ञानने त्या क्यूर प्रेजे लागि तोङ्मीय, मेस्ये तीया ङीन पाको मी क्यूत्देबे ख्रीष्टजे पूरा नापसेमे फ्योबीय। 14 होर्दे छट्टू मीजे पीरीपीरीजे शिक्षाजे छल्दे कने प्लेके होनेने कूबब चीद-चीद पीचयूप्र ङीन अन्क्यूल्लाचीदे। थमयूदे योनब ठग शिक्षादे सूजो मीयूने अन्ज्य लम्तेले कूबीय। 15 बरू प्रेमने टुङ्देबे सत्य क्यम्देबे साप्ता पोने ङूप्रने या ख्रीष्टप्र क्यूप्प पर्तीय, ख्रीष्टब ङीनजे ट ख्यङ्। 16 ङूजे हक नङ्ने साप्ता फरक फरक अङ्गयू मील्लीदेबे टून ख्यङ्, मेस्ये पूरा ङ्व ठीक-ठीक नेने थूदेबे टून ख्यङ्। त्या-त्या अङ्गदे चेपर्देब काम चीत्दे यलो पूरा ङ्व प्रेमने ठोङ्बीय। ओथ्याङ्जे छगूम्-पूर्गूम् क्यूत्देबे जीया-च 17 जेम्से ङ नमयूने बोङ् चीत्देबे प्रभुजे मीन्ने यीय मेस्ये गवाही पीन्क्य, नमयू जेम्से यहूदी तेबयूप्र क्यूत्देबे चे-कामये अन्लादेब सीत्तीजे पोयूने लादीदेबे जीया अन्चलाची। 18 थमयूने ज्ञान त्वब कारण थमयूजे सेम् सोरो कोङ क्यूत्देबे थमयू परमेश्वरजे जीया प्रे अन्ख्व क्यूरे ख्यङ्, मेस्ये थमयूजे बुद्धि चैत्याये अन्तङ् क्यूरे ख्यङ्। 19 थमयूजे सेम् कोङ क्यूरे ख्यङ्, मेस्ये पीरीपीरीजे अशुद्ध काम चेब धोकोदे थमयू छाडा क्यूरे ख्यङ्। 20 तर नमयूदे ख्रीष्टजे बारेने लोमब शिक्षा येर त्वो। 21 तम्दम्ने नमयूदे येशूजे शिक्षा ङ्यीन्देबे ङूजे सत्य लोम्कदे यदेबे ङ मन्न ख्यङ्। 22 नमयूजे खूम्जे पापजे स्वभाव मेस्ये ङीङ् जीया चब तर्तीप्यू क्यापी, हम्ब धोका पीनब दुष्ट इच्छायूजे कारणदे नमयू नाश क्यून्न ख्यङ्। 23 नमयूजे सेम् प्रे आत्मा सर् क्यूस्स्य, 24 मेस्ये परमेश्वर प्रने तम्दम्जे धर्मी मेस्ये पवित्र क्यूरने सृष्टि चीतेबजे सर् स्वभावने टेल्। 25 येरेक्यूत्देबे लूच्च क्यमब क्यापीदेबे क्वादेने रङ्से रङ्से खीम्चेप्रे तम्दम् क्यम्, चेनेयलो ङीन ख्रीष्टजे ङ्वजे अङ्गयू ख्यङ्। 26 छी ची, तर पाप अन्चील्लाची। मीया नूम्बयली खूम्ने नमयूजे छी मल्बस्य, 27 मेस्ये शैतानने मौका अम्पीन्लाची। 28 खूमान्दे जेम्से अन्खूस्य। बरू ङूदे छेम्प्रे चीत्देबे ईमानदार क्यूत्देबे रङ्से लादे काम चीस्स्य, मेस्ये हर्जोने पर्देब मीयूने पीन खूस्य। 29 नमयूजे ङूर्दे अन्ज्य बोली अन्-योन्स्य, तर चैदेब ज्य मेस्ये सूधारदीदेबे ज्य स्यूलूक्कै बूलीत्या क्यमब ची, मेस्ये ङ्यीनब मीयूदे अनुग्रह प्रेस्स्य। 30 होर्दे परमेश्वरजे पवित्र आत्माने सेम्-नला अन्चील्लाची, हम्बदे उद्धारजे दिनजे लागि नमयूने छाप पूदे ख्यङ्। 31 साप्ता थर्जे सेम् लङ्, च्य-चीङ्, छी, घिन मेस्ये साप्ता थरीजे ठेनब, अन्ज्य पो क्वाने क्यापी। 32 तर ङ्येम्देबे त्यादे त्याने दयामाया ची। परमेश्वरदे ख्रीष्टने क्यूत्देबे नमयूने क्षमा पीनप्र नमयूदेये त्यादे त्याने क्षमा पीन्। |
Ghale New Testament © Nepal Bible Society, 2011.
Nepal Bible Society