कलस्सी 3 - घले नयाँ करारपवित्र जीया चब पोयू 1 कादेये नमयू ख्रीष्टप्रेने जीया च ख्यङ् यलो स्वर्गजे पोयू मल्, होयाने ख्रीष्ट परमेश्वरजे स्येत्देयोर् टून ख्यङ्। 2 पृथ्वीने ख्यब पोयूने दीलाबे स्वर्गजे पोयूने सेम् पीन्। 3 चेनेयलो नमयू सीये ख्यङ् मेस्ये परमेश्वरने नमयूजे जीया ख्रीष्टप्रे फूये ख्यङ्। 4 नमयूजे तम्दम् जीया ब ख्रीष्टने ख्यङ् होर्दे ङू फेरि रब नमयूये ङूप्रे-प्रे महिमाने क्यूक्क्य। 5 होरेक्यूत्देबे नमयूने ख्यब खूम्जे अन्ज्य बानीयू क्वाने क्यापी: वेश्य, अशुद्ध पो, भस्त्व, दुष्ट इच्छा प्रे लोभ। लोभब थर्त्या मूर्तिपूजा ख्यङ्। 6 आज्ञा अम्मन्दीलाबे येर अन्ज्य व्यवहार तनब मीयूफ्याने परमेश्वरदे रङ्से छी फैन्क्य। 7 खूम् नमयूये येरप्रने व्यवहार तन्देबे जीया चेन ख्यङ्। 8 तर जेम्से नमयूदेये प्रो लङब, छी चेब, ठेनब, मीजे पो चेब, मेस्ये रङ्से ङूर्दे अन्ज्य बोली योनब येर व्यवहारयू क्वाने क्यापी। 9 त्यादे त्याने लूच्च अन्क्यम्लाची, चेनेयलो ङीङ् स्वभाव मेस्ये हम्बजे छ्यप्यू नमयूदे क्यापीक ख्यङ्। 10 मेस्ये सर् स्वभाव प्रेक्क ख्यङ्, हम्ब स्वभाव सृष्टि चेब परमेश्वरजे रूप् अनुसार ज्ञानने सर् क्यूप्पीन ख्यङ्। 11 अने ग्रीक मेस्ये यहूदी, या खतना चीक्कब या अन्चीक्कब, अछ्य्वेब, नेपङ्गी, त्वो मेस्ये स्वतन्त्र ख्यब सूनेये साक्पूजा अन्क्यूर्, तर साप्ता थोकने मेस्ये साप्ता कूरूप्रेने ख्रीष्ट ख्यङ्। 12 होरेक्यूत्देबे परमेश्वरदे सेल मीयूप्र पवित्र मेस्ये छेब क्यूत्देबे नमयूब ङ्येमब सेम्, दया चेब, तोङब सेम्, चीद क्यूरब मेस्ये अन्-आतीलाबे रेन्न ख्वब क्यून्नू। 13 त्यादे त्याजे पो सैदीदे टूङ्, कोदेये कोइ मीजे विरुद्धने गल्ती तनब पो ख्यङ्लो त्यादे त्याने क्षमा पीन्। केर्बे प्रभुदे नमयूने क्षमा पीन्दे होरप्रने नमयूदेये क्षमा पीन् पर्दीय। 14 अम्बयू यली पात्ता थेप् ब प्रेमने कोला ह्वेप्र ह्वे, हम्बदे साप्ता सेयूने त्या चीत्देबे येक्क्य। 15 ख्रीष्टजे शान्तिदे नमयूजे सेम्ने राज्य चीस्स्य। अम्ब शान्तिजे लागि परमेश्वरदे नमयूने ङ्वत्याजे अङ्गयू क्यूरने क्व ख्यङ्, अम्बजे लागि नमयू येतार्ने धन्यवाद पीन्नू। 16 ख्रीष्टजे वचनदे नमयूजे सेम् बेस्से फ्यानीस्य। पूरा बुद्धि चील्लीदेबे त्यादे त्याने लोम तन ची मेस्ये आर्ती, होर्दे रङ्से सेम्देमेस्येने परमेश्वरने धन्यवाद पीन्देबे जै-जै चेब आत्माजे प्रू पूई। 17 नमयूदे काम प्रे पोने चने चील्लीने येशूने क्यूत्देबे परमेश्वर पने धन्यवाद पीने पीने हम्बयू क्वाने प्रभु येशू ख्रीष्टजे मीन्ने ची। ख्रीष्टने विश्वास चेब कीम्-म्हीतीजे बारेने लोम्मेब पो 18 मजयू, प्रभुने सेम् पर्देब क्यूत्देबे रङ्से रङ्सेजे प्ल्यङ्जे हक नङ्ने टूङ्। 19 प्ल्यङ्यू, नमयूदे रङ्से मजयूने माया ची मेस्ये थमयूने क्वा व्यवहार अन्चील्लाची। 20 च-चीमीयू, नमयूदे रङ्से रङ्सेजे म-पजे आज्ञायू क्वाने मन्दी, चेनेयलो अम्ब पोदे परमेश्वर सूग्क्य। 21 पयू, रङ्से च-चीमीयूने प्रो लङ्ला अन्चील्लाचीदो, नत्रलो थमयू सेम्नेय। 22 त्वो-त्वोमयू, अम्ब संसारजे रङ्से मालिकयूजे म्याजे खूम्नेत्या थमयूने सूग्लाबे चे दी, तर पूरा सेम् ज्यदे प्रभुने गेसेन् चेब क्यूत्देबे थमयूजे हक नङ्ने टूङ्। 23 नमयूदे चै कामने फर्लीने ज्यान पीन्देबे बोङ्बे फर्, मीयूजे सेवा चेप्र दी, तर प्रभुजे सेवा चेप्र ची, 24 चेनेयलो नमयूने प्रभुदे कबुल चेब इनाम पीन्क्य यदेबे था ख्यङ्। नमयूदे प्रभु ख्रीष्टजे सेवा चीन्न ख्यङ्। 25 सूदे अन्ज्य काम चीक्क्य हम्बजे फल ङूदेने प्रेक्क्य। अम्ब कामने परमेश्वरदे सूनेये साक्पूजा अन्ची। |
Ghale New Testament © Nepal Bible Society, 2011.
Nepal Bible Society